ვააღიარაფილი ქიანეფიშ ერკებული

თინეფიშ უმენტაშობა რე სუბნაციონალური რეგიონი მუში ეთნო-ნაციონალური მუშჸოფათ, ნამუთ გეგშერთეს (გეგმიქიმინეს) მუნეფიშ ჯინჯიერ/ოდაბადე ქიანას დო თეშ გეშა თინეფშა სეპარატისტულ სახენწჷფოეფი უჯოხონა.

გოეროს მაკათური ქიანეფი, ნამუთ ნორთობურო რე აღიარაფილი გოეროშ შხვა მაკათური ქიანაშე თაქ მოჸონაფილი ვარე (სამანგ. 39 ქიანა ვააღიარენს ისრაელს მუჭოთ სახენწჷფოს).

•   აფხაზეთი დო   ობჟათე ოსეთი ნორთობურო აღიარაფილი რესპუბლიკეფი რე (აღიარაფილი რე გოეროშ ოთხი მაკათურიშე : რუსეთი, ნიკარაგუა, ვენესუელა დო ნაურუ). საქორთუოშ კონსტიტუციაშ მეჯინათ, აფხაზეთი რე ავტონომიური რესპუბლიკა, ობჟათე ოსეთი - ობორჯე ადმინისტრაციული ერთული. ფაქტობურო ვეკონტროლებუაფუ საქორთუოშ თარობაშე.
• კოსოვო ნორთობურო აღირაფილი სახენწჷფო ჸოფილი იუგოსლავიაშ ტერიტორიას. სერბეთიშ კონსტიტუცაშ მეჯინათ სერბეთიშ რესპუბლიკაშ ნორთი რე. კოსოვოშ ზოხორინალა აღიარჷ გოეროშ 62 მაკათური ქიანაქ.
•   პალესტინა, პალესტინაშ გოდუდიშულაფაშ ორგანიზაციაქ პალესტინაშ სახენწჷფოშ ზოხორინალა 1988 წანაშ 15 გერგობათუთას, ალჟირს ერუანული სხუნუშ აკოხუნას გჷმაცხადჷ. ორგანიზაცია ოკათჷ გოეროშ აკოხუნეფს დჷმაკვირაფალიშ სტატუსით დო მიშინუაფუ მუჭოთ პალესტინა.
•   საჰარაშ არაბეფიშ დემოკრატიული რესპუბლიკა, საჰარაშ არაბეფიშ დემოკრატიული რესპუბლიკაქ ზოხორინალა გჷმაცხადჷ 1976 წანას, თე რესპუბლიკა აღიარაფილჷ აფუ გოეროშ 84 მაკათურ ქიანას.
•   ჩინეთიშ რესპუბლიკა (R.O.C), ნამუთ 1949 წანას ჩინეთიშ ომენმაღალი ლჷმაშ წაგებაშ უკული აკონტროლენს ხვალო ტაივანს დო მუსხირენ შხვა მორჩილ კოკის დო ასე აღიარაფილი რე 25 ქიანაშე. დე ფაქტო რსხუეფს შხვა ქიანეფწკჷმა ასრულენს თიჯგურა ინსტიტუტეფით, მუჭოთი რე ტაიპეიშ ეკონომიკური დო კულტურული წჷმორინალობაშ ოფისი.
• ოორუე კვიპროსიშ თურქული რესპუბლიკა (TRNC) აკიქიმინჷ ოორუე კვიპროსის 1975 წანას, თე კოკის თურქეთიშ არმიიაშ მიშაჭკირუაშ უკული ბერძენი კვიპროსალეფიშე ხუნტაშ მონწყუალაშ საგამეთ. ხუნტაშ ღანკი რდ კოკიშ საბერძნეთწკმა მერსხუაფა. ფორმალურო ზოხორინალა გმაცხადჷ 1983 წანას დო ამდრარშახ ხვალო თურქეთიქ აღიარჷ. 2004 წანას გოეროშ ეგიდით ჩეტარჷ რეფერენდუმქ კვიპროსიშ ჟირ ნორთიშ გოართიანაფაშე. გოართიანაფას მეურდეს თურქი კვიპროსალეფი,მარა თეს წიმი ეწუდირთეს ბერძენეფქ. თიშ უკული დიპლომატიური ცადეფი თე საკითხიშ გჷნაჭყვიდირალო ვასრულებე. კვიპროსიშ ბერძენული ნორთიქ თიმ წანასევროპაშ სრხუშ მაკათურო გჷნირთჷ, მუქჷთ გოეროშ გენერალური მელამოსეშ მოსაზრაფათ ხოლო უმოსო გართულჷ ვითარაფა ღე რეგიონს.

• დნესტრიშპიჯეთი, დნესტრიშპიჯეთიქ ზოხორინალა 1990 წანას გმაცხადჷ, ალმახანაშო აღიარაფილი რე გოეროშ ვამაკათური ჟირი დე ფაქტო ქიანაშ აფხაზეთიშე დო ობჟათე ოსეთიშე.
•   სომალილენდი, სომალქ ზოხორინალა 1960 წანას ბრიტანეთიშე მიღჷ. დეკოლონიზაციაშ უკული ბრიტანული დო იტალიური სომალილანდეფიშ აკოართაფათ აკოქიმინჷ სომალქ. სომალილენდიქ ზოხორინალა 1991 წანას გჷმაცხადჷ, თინა ალმახანაშახ აკა სახენწჷფოს ვაუღიარებჷ.