Montenegro

C’ est on ptit payis, ene miete pus ptit kel Waloneye.

I n’ î vike ki 660.000 djins, li minme nombe ki les provinces do Roman Payis et do Lussimbork rashonnêyes. On les lome Montenegrin.

Lingaedjes oficirs

Li lingaedje oficir, c' est el montenegrin.

Ôtes lingaedjes

Mins nerén, ci payis cial ricnoxhe eto l' albanès, li bosniyin, li crowate eyet li serbe.

 

 

Li prumire grande limotche fourit l’ pårtixhaedje inte l’ Impire Romin do Levant et do Coûtchant. Li Sloveneye, l’ Crowaceye eyet l’ Bosneye divegnnut catolikes dabôrd ki l’ Serbeye, li Montenegro eyet l’ Macedône divegnnut ortodosses.

Pitchote a midjote, les Slåves arivnut dins l’ contrêye et metnut so pî les prumîs estats.

Li prumî dislaxhî estat serbe, le Rasseye, si diswalpêye eviè les anêyes 800. Å cominçmint do 14e sieke, li Montenegro si trouve dins on grand et pouxhant rweyåme serbe, ki comprind ossu l’ pårteye nonnrece del Serbeye, li Macedône et l’ Albaneye.

Li deujhinme limotche, ci serè l’ cene ki shurè l’ concwesse otomane.

Al difén do 14e sieke, les Otomans atacnut a enindjî les Balkans. E 1482, des sorvicants des gueres otomanes si rassåvnut dins les montinnes do Montenegro et askepyî l’ estat do Montenegro. Ci tot ptit rweyåme, nén pus grand k’ on cwårt a on tîce do Montenegro d’ enute et moenné pa des Vladikas (des sôres di Princes-Vekes come a Lidje), serè l’ seule intité serbe a dmorer dislaxheye des Otomans disk’ å 20e sieke.

Tant k' al Bosneye, al Serbeye, et les ôtes pårteyes do Montenegro, i sont, zels, mwaistris pa les Trouks.

Les Montenegrins, des rcrindous et firs guerîs, rezistêynut disk’ ås gueres del difén do 19e sieke ki les Slaves boutnut ls Otomans foû d’ leus payis. Did la leu spot : « les pus vayants des Serbes ».

E 1918, li Montenegro, k’ a divnou troes côps pus gros, est rataetchî å Rweyåme des Serbes, Crowates et Slovenes ki dvénrè l’ Yougoslaveye.

Do tins del guere di pårtixhaedje del Yougoslaveye, li Montenegro s’ a metou do costé des Serbes sins vraiymint pårticiper. Å moumint del guere do Kossovo, bén k’ fijhant pårteye do minme payis, li Montenegro s’ a dclåré neute et minme ascoyî des refudjîs kossovårs.

Gn a bråmint des cminåltés dins ci ptit payis la.

• des Montenegrins (å mitan)
• des Serbes et des bosnyins (al Bijhe
• des Kossovårs (å levant)
• des Albanais (do costé d’ l’ Albaneye)
• des crowates (do costé d’ Kotor et del Crowaceye)

Come les Serbes di Serbeye, les Montenegrins sont bråmint ortodosses (70 åcint). Mins gn a ossu 20 % d’ muzulmans, 3 % d’ catolikes.