Aklat Ni Ezekiel

Isinulat ito ng propetang si Ezekiel kaya't nakapangalan din sa kaniya. Matutunghayan sa aklat na ito ang pinakakapatda-patdang mga kaganapan sa kabuoan ng Bibliya. Ayon sa aklat ni Ezekiel, ang propetang si Ezekiel na ipinatapon sa Babilonya ay nakaranas ng sunod sunod na pitong mga pangitan ng 22 taon mula 593 hanggang 571 BCE. Ang mga pangitain at ang aklat ay nakaistruktura sa mga tatlong tema: paghatol sa Israel(Kapitulo 1-24), paghatol sa mga bansa(Kapitulo 25-32), at mga hinaharap na pagpapala sa Israel(Kapitulo 33-48).

Layunin ni Ezekiel na magpabatid ng isang mensahe para sa mga nadalang-bihag sa Babilonia at sa mga naiwanan sa Jerusalem. Binigyan niya ng kadiinan ang kahalagahan ng pagbabago ng puso at kaluluwa, ang pananagutan ng isang tao sa mga kasalanan at kamalian, ang pagkakaroon niya ng pag-asang magbabagong-buhay ang sariling sambayanan. Itinatakwil ng Aklat ni Ezekiel ang paniniwalang ang mga kasalanan ng mga ama ay napupunta o naipapasa sa mga anak ng mga ito, at ipinagdiriinan ang diwa ng sariling tungkulin sa harapan ng Diyos.

Binubuo ng anim na bahagi ang Aklat ni Ezekiel:

• Ang pagkatawag ng Diyos kay Ezekiel bilang propeta
• Ang mga babala tungkol sa kahatulan ng Diyos at sa darating na pagkawasak ng Jerusalem
• Mga pahayag ng Panginoon tungkol sa kahatulan sa mga bansang umapi at nagligaw sa kaniyang bayan
• Pag-aliw para sa Israel matapos bumagsak ang Jerusalem, at pangako ng isang mas maningning na hinaharap
• Ang hula laban sa Gog
• Paglalarawan ni Ezekiel sa muling itatayong templo at bansa

May naghati rin dito sa ganitong apat na mga pangkat:

• Pagkakatawag ng Propeta at mga Kahatulan ng Diyos sa Juda (1-24)
• Mga Hula Tungkol sa mga Bansa (25-32)
• Mga Hulang Pang-aliw sa Israel (33-39)
• Tungkol sa Bagong Kaharian ng Mesias (40-48)

Hinulaan sa Aklat ni Ezekiel 26:7-21 na "Sapagka't ganito ang sabi ng Panginoong Dios, Narito, aking dadalhin sa Tiro si Nabucodonosor na hari sa Babilonia, na hari ng mga hari, mula sa hilagaan, na may mga kabayo, at may mga karo, at may mga nangangabayo, at isang pulutong, at maraming tao...At gagawin kitang(Tiro) hubad na bato: ikaw ay magiging dakong ladlaran ng mga lambat; ikaw ay hindi na matatayo; sapagka't akong Panginoon ang nagsalita, sabi ng Panginoong Dios...Ang mga pulo nga ay mayayanig sa kaarawan ng iyong pagbagsak; oo, ang mga pulo na nangasa dagat ay manganglulupaypay sa iyong pagyaon. Sapagka't ganito ang sabi ng Panginoong Dios: Pagka ikaw ay aking gagawing sirang bayan, na parang mga bayan na hindi tinatahanan, pagka tatabunan kita ng kalaliman, at tatakpan ka ng maraming tubig; Ibababa nga kita na kasama nila na bumababa sa hukay, sa mga tao nang una, at patatahanin kita sa mga malalim na bahagi ng lupa, sa mga dakong sira nang una, na kasama ng nagsibaba sa hukay, upang ikaw ay huwag tahanan; at ako'y maglalagay ng kaluwalhatian sa lupain ng buhay. Gagawin kitang kakilakilabot, at hindi ka na mabubuhay: bagaman ikaw ay hanapin ay hindi ka na masusumpungan pa uli, sabi ng Panginoong Dios. Ito ay hindi natupad dahil ang Tiro ay nakatayo pa rin hanggang ngayon. Tinangka ni Nabucodonosor II na kubukubin ang Tiro na tumagal ng 13 taon (585 BCE–572 BCE) at nagtapos sa isang kompromiso. Kalaunang inamin sa Ezekiel 29:18 ang pagkabigo ng pagwasak ni Nabucodonosor II sa Tiro. Dahil sa pagkabigong ito, inihayag sa sumunod na mga talata sa Ezekiel 29:19-20, na Kaya't ganito ang sabi ng Panginoong Dios: Narito, aking ibibigay ang lupain ng Egipto kay Nabucodonosor na hari sa Babilonia; at dadalhin niya ang kaniyang karamihan, at kukunin ang samsam sa kaniya, at kukunin ang huli sa kaniya; at magiging kaupahan para sa kaniyang hukbo. binigay ko sa kaniya ang lupain ng Egipto na pinakaganti sa kaniya dahil sa kaniyang ipinaglingkod, sapagka't sila'y nagsipagpagal ng dahil sa akin, sabi ng Panginoong Dios. Ito ay hindi rin natupad dahil hindi nasakop ni Nabucodonosor II ang Ehipto sa kanyang pakikidigma rito noong 568 BCE.