Уругвай

Уругвай межуе на сѣверовостоку з Бразилиев, на юговостоку омывать го Атлантичный океан, на югу — Ла Плата, на западѣ — рѣка Уругвай, за котров лежить Аргентина (урядна назва державы указуе на пологу на выходном березѣ рѣкы Уругвай).

Уругвай зыскав независимость од Бразилии 25. августа 1825. 25. август в Уругваю — штатный святок, День Независимости.

Уругвай подѣленый на 19 департаментох. Голова державы и влады — президент. Законодарный орган двохпалатный парламент (сенат и палата представительох).

Корѣнне обывательсто суть Индиане. Расове зложѣня обывательства (2011, шацунок): бѣлы 87.7%, чорны 4.6%, корѣнны 2.4%, иншы 0.3%, невыяснены 5%. Вѣровызнаня (2006, шацунок): католици 47.1%, иншы христиане 11.1%, невыяснены 23.2%, Юдеи 0.3%, атеисты 17.2%, иншы 1.1%. Городске обывательства чинить 80%, в агломерации главного города Монтевидео жие 50% обывательства.

Далшы найвекшы городы суть Салто, Пайсанду. В городах внутра державы економика переважно звязана з переробков земледѣлской продукции (пакованя мясной продукции, потравинарство), а тыж выробов текстилу. Уругвай ориентованый на експорт земледѣлской продукции; главны агропродукты суть: целулоза, мясо, соя, рискаша, пшениця, молочна продукция, рыба и др. Главны промысловы продукты суть: потравины, електричны машины, транспортный обладунок, ропа, текстил, хемикалии, напиткы. Главны експортны партнеры: Китай 19%, Бразилия 16,1%, США 5,7%, Аргентина 5,4%. Од 1 януара 2020 минимална мѣсячна платня в Уругваю 16300 песо ($USD438,47), за едну годину 81,5 песо ($USD2,19).

Уругвай лежить в субтропичной зонѣ з мѣрнов климов. Середня температура найстуденѣйшого зимушного мѣсяця юлия +10°C, середня температура найтеплѣйшого мѣсяця януара +25°C, зрѣдка подниме ся до 38°C. Дождь паде еднако во вшиткых сезонах, выпады од 970 мм на югу ростуть поступно до 1270 мм рочно на сѣверѣ. На березѣ океана на глубку 8–10 км суть лагуны, пѣсковы плажы. Дале на запад — горбкаста краина з высотами до 500 м н.м.; на югозападѣ — пасмо ровнин, подобне на аргентинску пампу, на сѣверозапад заходить южный конець плато Парана, што ся силно одличуе од иншой територии Уругвая. Грунты суть плодны, трава зелена на пашу доступна цѣлорочно, статок може перебывати на отвореном просторѣ цѣлорочно.

• Трёшников А.Ф. Географический энциклопедический словарь: Географические названия. /Гл. ред. А. Ф. Трёшников. — 2-е изд., доп. — М.: Сов. энциклопедия, 1989.— 592 с. ISBN 5-85270-057-6 русс.
• URUGUAY. //CIA World Factbook. https://www.cia.gov/the-world-factbook/countries/uruguay/. [перевірено 2021-04-10].  англ.
• УРУГВАЙ. //Энциклопедия Кругосвет. https://www.krugosvet.ru/enc/strany_mira/URUGVA.html. [перевірено 2020-04-07].  русс.

 

Вікісклад має мултімедіалны дата на тему:

Уругвай