Erika Fatland

august">27. august 1983) er ein norsk forfattar og sosialantropolog fødd i Haugesund. Ho er særleg kjend for reiseskildringar frå land i den russiske kultursfæren.

Erika Fatland
Statsborgarskap	Noreg
Fødd	27. august 1983 (40 år) Haugesund kommune
Yrke	skribent, reiseforfattar, antropolog
Ektefelle	Erik Fosnes Hansen

Fatland vaks opp i Ølen i Vindafjord kommune i Rogaland. I gymnastida si heldt ho til i Lyon og Helsingfors og heldt fram med universitetsstudium ved Københavns Universitet og Universitetet i Oslo, der ho fullførte mastergrad i sosialantropologi i 2008. Feltarbeidet som låg til grunn for mastergraden, vart gjort i Beslan i Nord-Ossetia i 2007, der ho intervjua informantar som var råka av gisseldramaet ved Skule nr. 1 i 2004; etterlatne, pårørande, overlevande, lærarar og styresmaktspersonar. I 2008-2009 var Fatland stipendiat ved Norsk utanrikspolitisk institutt.

I 2009 debuterte Fatland med barneboka Foreldrekrigen, ei humoristisk bok om skilsmisse.

I 2010 vende Fatland attende til Beslan for å arbeide vidare med stoffet frå feltarbeidet, i det føremålet å utvide det til ein reportasjebok. I tillegg til nye samtalar med informantane frå tidlegare, reiste ho denne gongen friare omkring, òg i naborepublikkane, og ettergjekk nokre av fotspora til terroristane. I Moskva og St. Petersburg intervjua Fatland granskarar av åtaket, såvel som folk frå den offisielle undersøkingskommisjonen som uavhengige om dei tre dagane gisseldramaet varte og storminga av skulen, der minst 333 menneske, blant dei 186 barn, miste livet. Boka Englebyen. Fortellinger fra Beslan vart gjeven ut i byrjinga av august 2011. Utanlandsrettane er selt til Danmark, Sverige, Nederland og Tyskland. Boka vart nominert til Brageprisen i klassen sakprosa.

Hausten 2012 gav Fatland ut boka Året utan sommer, ei bok om terroråtaka i Noreg i 2011. Boka er vorten seld til og er utkomen i fleire land, bl.a. Sverige, Danmark, Nederland og Tyskland.

Hausten 2014 kom boka Sovjetistan ut, ei reiseskildring frå dei postsovjetiske statane i Sentral-Asia med namn som sluttar på -stan. For denne boka fekk Fatland Bokhandelens fagbokpris i 2015. Sovjetistan er så langt seld til 21 land. I 2016 vart ho tildelt Wesselprisen.

I 2017 kom Grensen : en reise rundt Russland : gjennom Nord-Korea, Kina, Mongolia, Kasakhstan, Aserbajdsjan, Georgia, Ukraina, Hviterussland, Litauen, Polen, Latvia, Estland, Finland og Norge og dessuten Nordøstpassasjen. Denne boka vart omsett til færøysk i 2019, som var det 12. språket boka vart omsett til. I 2020 gav Fatland ut boka Høyt - En reise i Himalaya, ei reiseskildring basert på to reiser gjennom land og område i fjellkjeda: Nepal, Xinjiang, Tibet, Pakistan og India som ho hadde utført i 2018 og 2019 på til saman åtte månader.

Fatland er gift med forfattaren Erik Fosnes Hansen, og paret er busett i Oslo.

• Foreldrekrigen, Cappelen Damm 7. oktober 2009. ISBN 9788202296261. Illustrert av Per Dybvig.
• Englebyen, Cappelen Damm 11. juli 2011. ISBN 9788202347888.
• Året uten sommer, Kagge Forlag, 2012.
• Sovjetistan. En reise gjennom Turkmenistan, Kasakhstan, Tadsjikistan, Kirgisistan og Usbekistan, Kagge Forlag, 2014.
• Vinterkrigen. Cappelen Damm 2017. Illustrert av Marius Renberg.
• Grensen - en reise rundt Russland gjennom Nord-Korea, Kina, Mongolia, Kasakhstan, Aserbajdsjan, Georgia, Ukraina, Hviterussland, Litauen, Polen, Latvia, Estland, Finland og Norge samt Nordøstpassasjen Kagge 2017 ISBN 9788248921059
• Høyt - En reise i Himalaya Kagge 2020 ISBN 9788248926146