Rundro ba Danö Niha ya'ia da'ö fanötöi ba Li Niha wehede li Indonesia ronda.
Rundro andre tefalua ia ha ba zibongi. Sasese te'ila ba zamalua rundro, la'ohe sete (senter), bözi-bözi (pentungan) ba owulo ba nose rundro. Sowanofu maifu hana walö tola lö'ö labözi-bözi geu döla-döla lisitiri na mowaö-waö ba zifasui omo? Hadia lö tokea-tokea niha mbanua ba wobözi-bözi da'ö fefu?. Na tafaigi geluaha rundro andre ya'ia da'ö : mowaö-waö ba gotalua nomo ba wozago moroi ba zo farikoisi, ba zanagö ma ba gameta'uö tanö bö'ö. Moroi ba wanofu da'ö yaŵa ba te'ila wa fahasara dödö wamalua ya'ia irege ono mbanua lö tobali fökhö khöra ba li wobözi döla-döla lisitiri, omasi ira, moloi ngawalö sedöna mofarikoisi otalua nomo. Na ba danö niha, la bözi goko ma koko, ba wame'e turia ba niha, wo so rundro.
Rundro andre tenga ha fohi'a dödö niha mbanua ba wamalua ya'ia. No la aturai bakha ba goi-goi wamareta. Rundro ma laŵaö ia sambua lala wozago gotalua nomo. Ba li Indonesia lamane Siskamling (sistem keamanan lingkungan). Rundro ma Siskamling so ba goi-goi Pasal 1 angka 6 Peraturan Kepala Kepolisian Negara Republik Indonesia Nomor 23 Tahun 2007 Tentang Sistem Keamanan Lingkungan (“Perkapolri 23/2007”).
Rundro nifalua ba gotalua nomo, inötö faoma haniha zirundro, samalua ya'ia ni'aturai zalaŵa ba sohalöŵö ba mbanua(Desa). Ba sito'ölönia töi-töi zirundro no lafalemba ba nose rundro, irege fefu nono mbanua tola la baso döira ba da'ö. Ba mbanua tanö bö'ö ba so göi zamalua rundro sifao ira amada saradadu ba folisi sohalöŵö sahatö ba mbanua.
This article uses material from the Wikipedia Li Niha article Rundro, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Konten tersedia di bawah CC BY-SA 4.0 kecuali dinyatakan lain. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Li Niha (DUHOCTRUNGQUOC.VN) is an independent company and has no affiliation with Wiki Foundation.