ဘာမန် ကိုဝ်ရဳယျာ (အၚ်္ဂလိက်: Mon Buddhist Temple, South Korea) ဝွံ ဒှ်ဘာဗုဒ္ဓဘာသာ ကောန်ဂကူမန် မလုပ်လၟိဟ် ဂိုဏ်ရာမညနိကာယ ပ္ဍဲဍုင်ကိုဝ်ရဳယျာ သၠုင်ကျာမွဲရ။ ဘာလကျာ်မန်ဝွံ ဂကောံမန်ကိုဝ်ရဳယျာ ကေုာံ ညးနွံပိုန် ဘာမန်ကိုဝ်ရဳယျာ တၠဂုဏ်အစာဉာဏရံသဳ အာဂတ ပၠတရဴတုဲ နူကဵု ဘာမလိင်မံင်ဂှ် စတမ်နူကဵု သြန်တမ် နူကဵု ဂကောံပွိုင်တိုက်ဖအံက် ပန်ကိုဋ်ဝါန်တုဲ ရာန်ကေတ်လဝ် ပ္ဍဲဂိတုသေတ်တေမ်ပါ ၂၀၁၈ နကဵုၚုဟ်မးသြန်ကိုဝ်ရဳယာ ၃၆၀၀ကိုဋ်ဝါန်ရ။ ပ္ဍဲကိစ္စမရာန်ဘာဝွံ တၠဂုဏ်အစာသဳလာစာရ (ရာမညရဋ္ဌဗုဒ္ဓတက္ကသိုလ်) လေဝ် ပါလုပ် ချဳဓရာင်လဝ် ဗိုင်ဟီုတွဟ် ဆဝ်ဗ္ၚုဟ်ကီု သီုမကဵုဒါန်သြန် ဗွဲမဂၠိုင်ကီုရ။ သဘင်စရိုဟ်ဍာ်ဘာဂှ် ကၠောန်ဗဒှ်လဝ် ပ္ဍဲကဵု ၁၃ သေတ်တေမ်ပါ ၂၀၁၉ တုဲ နကဵု ဂကောံဝေယျာဝစ္စ ၁၄ ဂကောံဂှ် ဒုင်တိုင်ခဳ ဘာဝွံ ဂွံဆက်တန်တဴအာရ။
ဘာမန် ကိုဝ်ရဳယျာ | |
---|---|
တင်ဂၞင်ဂမၠိုင် | |
ဒတန် | ကိုဝ်ရဳယျာသၠုင်ကျာ |
ဒတန်ဒၞး | 37°29′12″N 126°42′46″E / 37.48667°N 126.71278°E 126°42′46″E / 37.48667°N 126.71278°E |
မဆေင်စပ် ကုဘာသာ | ထေရဝါဒဗုဒ္ဓဘာသာ |
ဂိုဏ် | ရာမညနိကာယ |
ကၟိန်ဍုင် | South Korea |
က္ဍိုပ်သကိုပ် |
|
ဗိသုကာ | |
ညးမပတန် | ဂကောံမန်ကိုဝ်ရဳယျာ |
သၞာံမစပ္တန် | 2015 |
သၟာကမၠောန် ကောန်ဂကူမန် နူဍုင်မန်ဗၟာ အာကၠောန်စ ပ္ဍဲဍုင်ကိုဝ်ရဳယျာသၠုင်ကျာဂှ် စနူသၞာံ ၜိုတ် ၂၀၀၇ ဂှ်တုဲ လၟိဟ်မၞိဟ် ဂၠိုင်ကၠုင်ဒၟံင်ဂှ် ဒက်ကၠုင် ဂကောံမန်ကိုဝ်ရဳယျာ။ နကဵုဂကောံဂှ် လိင်လဝ် ရုင်ဂကောံမွဲရ။ ပ္ဍဲကဵု ကောံဓရီုဂကောံ ပ္ဍဲ ၁၉ ဖေဖဝ်ဝါရဳ ၂၀၁၅ ဂှ် နကဵုဂကောံ ဖျေဟ်သ္ဂုတ်သွာတ် သွက်ဂွံ ပတန်ဘာမန်မွဲတုဲ စတမ်နူဂှ်တုဲ ချဳဓရာင်ကၠုင် ပရေင်ကမၠောန် ပတန်ဘာမန် ပ္ဍဲဍုင်ကိုဝ်ရဳယျာ မပ္တံကဵု -
ကိစ္စလိင်ဒတန်ဂှ် ပွိုင်ပိဂိတု ကေတ်အခိင်တုဲ ညာတ်ကေတ် ဒၞာဲကရပ်ဖျာဇၞော် မကြပ်ကဵု သၞေဟ်ကွဳပၟတ်၊ သၞေဟ်ကွဳ ပ္ဍဲအရာပ်ဗူဖျံင်ဂှ် ဂပ်ဝ်ရ။ သွက်ဂွံလိင်ဘာဂှ် ဒးကဵု ဟရမ် (၁၅၀)ကိုဋ်၊ တုဲပၠန် ၚုဟ်လိင်ဂိတုဂှ် မွဲဂိတု ၉ ကိုဋ်ရ။ နကဵုဂကောံ ပကောံဓရီု ပ္ဍဲစၟတ်တ္ၚဲ ၉ နဝ်ဝေမ်ပါ ၂၀၁၄ ပ္ဍဲဘာသန္တိကရဝိဟာရ၊ နေဝ်အာန်သာန်တုဲ တုပ်စိုတ် သွက်ဂွံလိင်ဒၞာဲဂှ်ရ။ သွက်ဂွံဂွံသြန် ခရိတ်ဟရမ်ဂှ် ဆဝ်ဗ္ၚုဟ် ညးတၠသဒ္ဓါတအ်တုဲ ညးလ္ၚဵု စုတ်ကဵု စှ်ကိုဋ်၊ ညးလ္ၚဵု စုတ်ကဵု မသုန်ကိုဋ်၊ ညးလ္ၚဵု ပန်ကိုဋ်ဒှ်တမ် သီုဖအိုတ် မၞိဟ် (၁၁) တၠ ကလိဂွံသြန် ၆၃ ကိုဋ်ရ။ ပ္ဍဲတ္ၚဲကောံဓရီုဂှ် ညးက္ဍိုပ်သကိုပ်ဂကောံတအ် ထပ်လဝ်တဲ ပလဝ်စၟတ်သစ္စ ရေင်သကအ်၊ "ဘာမန်ဒှ်တုဲ ယဝ်ရ သြန်ဂိတု ဟွံရုမ်ဂပ်မ္ဂး ညးမအာဂတပၠတရဴတအ် ဒုင်စေက် စုတ်ဗပေင်ကဵုရောင်။" ရ။
ပ္ဍဲကဵု ၂၀ ဖေဖဝ်ဝါရဳ ၂၀၁၅ ပ္ဍဲသဘင် တ္ၚဲကောန်ဂကူမန် မရနုက်ကဵု (၆၈) ဂှ် ဆဝ်ဗ္ၚုဟ် ဒုင်ဒါန် သွက်သြန်ဂအုံပတန်ဘာမန်ဂှ် ကလိဂွံမၞိဟ် ၂၁၉ တၠ ဗိုင်ကဵုဒါန်တုဲ ကလိဂွံသြန် ၃၂၀ ကိုဋ် ပြင်င်ရ။ သြန်ဂအုံဂှ် ၜိုတ်ကြိုက်တန် ကလိဂွံလဝ်တုဲ သွက်ခရိတ်ဍာ် ခရိတ်ပၟတ် ကေုာံ ခရိတ်နာနာတအ်ဂှ် နွံပၟိက်ဒၟံင်ဏီတုဲ သွက်အရာဏအ်ဂှ် မၞိဟ်ဗၞတ်ကၠံတၠပြင်င် လၟေင်င်ဂိတု စုတ်ကဵုဒါန် ညးမွဲတၠ ညးလ္ၚဵု မသုန်လက်၊ ညးလ္ၚဵု ပိလက်၊ ညးလ္ၚဵုၜါလက် ညးလ္ၚဵုမွဲလက် မြဴသာ်ဝွံ ဗိုင်ကဵုဒါန်အိုတ်ရ။
စပ်ကဵု ကျာ်ဇၞော်ဂဇအ်ဘာ သ္ဂောအ်ကလိဂွံ ဝဳသာပတန်သာသနာဂှ် နူကဵု ဂကောံမန် ကလိဂွံ အဆက်ကု တၠဂုဏ်အစာ သဳလ (တိုက်ဓရ်ဖအံက်) အဃောမပတန်ဒၟံင်သာသနာ ပ္ဍဲဍုင်ကိုဝ်ရဳယျာတုဲ တၠဂုဏ်အစာဂှ် ဆက်ကဵု မိတ် ကုဒါယကာ ကောန်ဍုင်ကိုဝ်ရဳယျာမွဲတၠ မနွံယၟု Dr. Jeon Hyun Su (Psychiatric Clinic) ရ။ နူကဵုဒါယကာဂှ်မွဲကဆံင် ညး အာတ်အရီုအဗင် ကျာ်ဇၞော်ဂကူကိုဝ်ရဳယျာ မွဲဇကု မနွံယၟု မောန်ဗံင်ဂူ (Moon Bong Gu) ညးမဒှ် ကျာ်ဇၞော် ဌာနပတန်သာသနာဗုဒ္ဓဘာသာမုန်ဟက် (Chief monk of Buddhism Munhak Propagation Center) ရ။ နကဵု ကျာ်ဇၞော်ဏအ်ဂှ် ညးကေတ်ကဵု တာလျိုင် ပ္ဍဲအရာ မကော်ဘိက် နိမန်သင်မန်တုဲ မဿတာချဝ် (Mr. Cho) ဂှ် ဒှ်ညးမရေင်တၠုင် ပ္ဍဲအရာ မအာရုင်တအ်ရ။ ကိစ္စဝဳသာပတန်သာသနာဝွံ ဒးကေတ်အထံက်ဂလာန် နကဵုသင်လပါ် နူဍုင်ကိုဝ်ရဳယျာကီု သီုကဵု နူကဵု ဍုင်မန်ဗၟာကီုတုဲ လပါ်ဍုင်မန်ဗၟာဂှ် ကျာ်ဇၞော်အစာ ဘဒ္ဒန္တသဳလာစာရ (ဘာဗဂေါပရိယတ္တိ၊ ဍုင်မတ်မလီု) ကေုာံ ကျာ်ဇၞော်အစာ ဘဒ္ဒန္တကေသရ (ဘာဗိုလ်လ္ၚီ၊ ဍုင်ဒဂုင်) တအ် ဒှ်ညးမထံက်ဂလာန် နကဵုစၞး ဂကောံရာမညနိကာယ သွက်ဂွံပတန်သာသနာ ဍုင်ကိုဝ်ရဳယျာ ရ။ ဝဳသာပတန်သာသနာ မပတိုန်လဝ်ဂှ် ကလိဂွံအခေါင် ပ္ဍဲကဵု ၁၆ နဝ်ဝေမ်ပါ ၂၀၁၅ ဂှ်ရ။
သွက်ဂွံပတန်သာသနာ ပ္ဍဲကဵု ဘာမန်ကိုဝ်ရဳယျာဂှ် နူကဵု ဂကောံမန်ကိုဝ်ရဳယျာ နိမန်နင် တၠဂုဏ်အစာ ဉာဏရံသဳ နူကဵု တိုက်ပရိယတ္တိ ဘာကျာ်သြဳမန်၊ ကွာန်တံင်ပရင်တုဲ ၂၉ နဝ်ဝေမ်ပါ ၂၀၁၅ ဂှ် ကျာ်ဇၞော်စိုပ်ကၠုင် ဍုင်ကိုဝ်ရဳယျာတုဲ ဒါယကာတအ် ဗွဲမမိပ်မြဟ် ဓဝ်ပဳတိ မဇၞော်ဟေင် ဒုင်တၠုင်ဏာ ကျာ်ဇၞော် ဇရေင်ဘာဂှ်ရ။
ကျာ်ဇၞော် စိုပ်ကၠုင်တုဲ ပ္ဍဲ ၁၃ ဒဳဇြေန်ပါ ၂၀၁၅ ဂှ် ကၠောန်သဘင်တိုန်ဘာမန်တၟိဂှ် ဂကောံဒါယကာ လၟိဟ် ၁၅၀ ပြင်င် ပြာပ်ကၠုင်စိုပ် ပ္ဍဲကဵု သဘင်ဂှ်ရ။
စိုပ်တ္ၚဲအဒိုက် ကၟာတ်ကမၠောန်မ္ဂး ဒါယကာတအ် ပြာပ်ကၠုင်ဘာတုဲ ဂွံဒဂိုန်ဂိုင်ကေတ် သဳလ၊ လ္ၚောဝ်ကျာ်၊ ပတိုန်ပ္ကဴဝတ်၊ ပတုဲဝေယျာဝစ္စ၊ ဂွံကၠောန်ကာကုသိုလ် မဆေင်ကဵု ပရေင်ဘာသာတအ်ရ။ တုဲပၠန် ပ္ဍဲအခိုက်ကၞာ ပြဝေဏဳမန် မပတံကဵု ကဵုဒါန်သ္ၚာကထိုန်၊ သ္ၚာသၞုက်ဗြဲ၊ ဗဝ်သၟုတ်က္ၜင်တအ်လေဝ် ဂွံကၠောန်ကၠုင်ရ။
ပါဲနူ ပရေင်ဘာသာတုဲ ပရေင်မၞိဟ် မပတံ ကဵု ပရေင်ဍုက်ကေဝ် စုက်လုက် ကုကောန်ဍုင်ဇကု ကောန်ဂကူဇကုတအ်ဂှ် ကလိဂွံကၠုင်ရ။ ယဝ်ရ ဒးကေတ်အရီုအဗင် ဗီုကဵု ဆက်အာယုက်ဝဳသာ၊ လျိုင်ပရေင်ထတ်ယုက် (medical insurance) တအ်ဂှ် ကလိဂွံ လိက်အထံက်ဂလာန် နူကဵု ဘာမန်တုဲ ကၠောန်စလောဲသွာကၠုင်ရ။ တုဲပၠန် ပ္ဍဲဘာဂှ် သီုပံက်ဘာ ဗတောန်လိက် အရေဝ်ကိုဝ်ရဳယျာ၊ ဗတောန်ကဵု လိက်မန်၊ ကွတ်ကောန်ပျူတာ မပတံ မြဴသာ်ဝွံ ပရေင်ချဳဓရာင် နာနာသာ် ကၠောန်ကၠုင်ဒၟံင် ပ္ဍဲကဵု ဘာမန်ဂှ်ရ။
ပ္ဍဲကဵု ၇ ဖေဖဝ်ဝါရဳ ၂၀၁၆ ဂှ် ဂကောံမန်ကိုဝ်ရဳယျာ ကၠောန်ဗဒှ် သဘင်ပူဇဴဓမ္မဒေသနာ တုဲ တ္ၚဲယးဂှ် ကၠောန်သဘင်ကောန်ဂကူမန် မရနုက်ကဵု ၆၉ ဝါ ပ္ဍဲၝောအ်ခဒမ်မ္ၚဵု၊ အရာပ်ဗူဖျံင် ရ။ ပ္ဍဲကဵုတ္ၚဲဂှ် နူကဵု ဂကောံပွိုင်တိုက်ဖအံက် ဒုင်သဇိုင် ပိဏ္ဍပါတ် ကုခမဳသင် ကေုာံ ခရှ်မပြာပ်ကၠုင်စိုပ် သဘင်တ္ၚဲကောန်ဂကူမန်ဂှ်ရ။ ပ္ဍဲကဵုတ္ၚဲဂှ်ရ ဂကောံပွိုင်တိုက်ဖအံက်တအ် ကသပ်ပြဲမွဲ ကတဵုဒှ်ကၠုင် မိက်ဂွံကဵုဒါန် သြန်ဂအုံ သွက်ဂွံရာန်ဘာမန်တုဲ ဒုင်ကဵုဒါန် ကုကျာ်ဇၞော်ဘာမန် ဝတ္ထုဒါန် ပန်ကိုဋ်ဝါန်ရ။ အခိင်ဂှ် ပတန်ဂွံဘာမန် ဂွံပွိုင် ပိဂိတုညိကီုတုဲ ခရိတ်လိင်ဂိတုလေဝ် ဟွံချိုတ်ပၠိုတ်ဏီတုဲ ဆညးမွဲကီု ဟွံဂံင်ချပ် သွက်ဂွံရာန်ဘာမန်အပိုင်ဏီရ။
ပဟိုတ် သြန်တမ် နူကဵုဂကောံပွိုင်တိုက်ဖအံက် ပန်ကိုဋ်ဂှ်တုဲ ကောန်ဂကောံ ဂကောံကမ္မတဳဘာမန်တအ် ချပ်ဂၞန်စဳဇန်ကၠုင် သွက်ဂွံပကောံသြန်ဂအုံရာန်ဘာမန်တုဲ ဗိုင်ဆဝ်ဗ္ၚုဟ်တုဲ ဒါယကာ မကဵုဒါန်လေဝ် မံက်ကၠုင်အဆက်ဆက်ရ။
၁၆ သေတ်တေန်ပါ ၂၀၁၆ ဂှ် ဂကောံမန်ကိုဝ်ရဳယျာတအ် နိမန်နင် တၠဂုဏ်အစာသဳလာစာ (ရာမညရဋ္ဌဗုဒ္ဓတက္ကသိုလ်၊ ဍုင်မတ်မလီု) သွက်ဂွံကဵုတွဟ်ဓရ် ပ္ဍဲတ္ၚဲသဘင်သီသြောအ် (ချူသံက်)ရ။ သဘင်ဓရ်ဂှ် ဒှ်သဘင်ဓရ်မန် အလန်ဒုတိယ ပ္ဍဲကဵု ဍုင်ကိုဝ်ရဳယျာဂှ်ရ။ သဘင်ဓရ်အလန်ဏအ်လေဝ် ကၠောန်ဗဒှ်လဝ် ပ္ဍဲကဵု ၝောအ်ခမ်မ္ၚဵုတုဲ ပုရိသာတ်ဒါယကာကလင်ပင်မှိင်ဓရ် ကၠုင်စိုပ် ဗၞတ် ၂၀၀ ပြင်င်ရ။ ပ္ဍဲတ္ၚဲ သဘင်ပူဇဴဓမ္မဒေသနာဝွံ ဂကောံကွာန်တၟအ်ကၞေင် ဒုင်သဇိုင် ကဵုဒါန်ပိဏ္ဍပါတ် ကုဘိက္ခုသင် ကေုာံ ကၟုဲခရှ် မပြာပ်ကၠုင်စိုပ်တအ်ရ။ ကရောမ် တၠဂုဏ်အစာသဳလာစာရဂှ် တၠဂုဏ်အစာခမာစာရ (ရာမညရဋ္ဌ ဗုဒ္ဓတက္ကသိုလ်၊ ဍုင်မတ်မလီု)၊ တၠဂုဏ်အစာဂရု (ဘာရုင်ဒါန်၊ ဍုင်လၟိုင်)တအ်လေဝ် က္ညကၠုင်စိုပ်ကီုရ။
တၠဂုဏ်အစာသဳလာစာရ ဂွံတီကေတ် ဒဒှ်ရ ဂကောံမန်ကိုဝ်ရဳယျာတအ် မပကောံဒၟံင်သြန်ဂအုံ သွက်ဂွံရာန်ဘာမန်ဂှ်တုဲ သဒ္ဓါကတဵုဒှ် "ယဝ်ရ ရာန်ဘာမန်အပိုင်မ္ဂး တၠဂုဏ်အစာလေဝ် ကဵုဒါန် သြန် ၁၀၀ ကိုဋ်ကီုရောင်" ကဵုလဝ်တိကပါင်ရ။ "ယဝ်မင်ကဵုဒါယကာတအ် ဒှ်ရာန်ဘာမှ ဂွံကဵုဒါန်သြန်မ္ဂး လဇုဲလဇအာရောင်" တၠဂုဏ်အစာသဳလာစာရ ချပ်တုဲ ကြဴနူမကဵုလဝ် ကတိပါင်တုဲ ဗၞတ်ၜါပိဂိတုဂှ် ပြင်ဗစိုပ်နင် သြန် ၁၀၀ ကိုဋ်ဒကေတ် နူကဵု ဍုင်မန်ရ။
ခမဳသင် ကေုာံ ဒါယကာတအ် နွံကဵု ဓရ်လွဳ ညဳသာသၟဟ်န်တုဲ အကြာဗၞတ် ပွိုင်ပိသၞာံဟေင် ဘာမန်အပိုင် မထေက်တန်ကဵု ၚုဟ်မး (၃၆၀၀) ကိုဋ်ဂှ် ရာန်မာန်အာရ။ (သၞာံ ၂၀၁၆ ဂှ် ပကောံဂွံ ၈၀၀ ကိုဋ်ဝါန်၊ သၞာံ ၂၀၁၇ ဂှ် ပကောံဂွံသြန် ၇၀၀ ကိုဋ်ဝါန်၊ သၞာံ ၂၀၁၈ ပံင်သီုဖအိုတ် သြန်ဂအုံပေင်ကၠုင် ဗၞတ် ၁၇၀၀ ကိုဋ်ဂှ် စဗၟံက်ကၠုင် ရုပ်ရဴကမၠောန်ရာန်ဘာဂှ် ဂၠာဲဆဵု စမြိုင်မွဲ နွံအရှာံ ၁၃၃မဳတာပန်ကၠင် (133m2) တိုက်ပိထပ် မနွံအရာပ်ဗူဖျံင်၊ ဍုင်အေန်ချောင်၊ (လိက်စာဘာ 767-144 Bupyeong-dong, Bupyeong-gu, Incheon, South Korea) နူကဵုဘာဂှ် အာသၞေဟ်က္ၜင်ကျာအေန်ချောင် နွံဇမ္ၚောဲ ၄၀ ကဳလဝ်မဳတာတုဲ ယဝ်ရအာ ဍုင်ဇၞော်သိုဝ်မ္ဂး နွံဇမ္ၚောဲ ၃၁ ကဳလဝ်မဳတာရ။ တုဲပၠန် ပ္ဍဲပွဳပွူအရာပ်ဝွံ ဒှ်ဒေသ ကောန်မန် ကောန်ဗၟာတအ် မကောံကလောအ်ဂၠိုင်အိုတ်တုဲ ဆေင်ဖျာစၞစ ဍုင်မန်ဗၟာလေဝ် နွံတဴဗွဴမဂၠိုင်ကီုရ။
ဘာမန်ဝွံ နွံၚုဟ်မး ၃၆၀၀ ကိုဋ်ဝါန် (၅၀၀၀ကိုဋ်ဒကေဝ်)။ အခိင်မရာန်ဘာဂှ် သြန်နွံ ၁၇၀၀ ကိုဋ်ဓဝ်ရ။ တၠဂုဏ်အစာသဳလာစာ (ရာမညရဋ္ဌဗုဒ္ဓတက္ကသိုလ်) စိုတ်ဓါတ် ပ္ဍဲကမၠောန် ပတန်သာသနာဝွံတုဲ ကဵုဒြဟတ် ဗိုင်ဟီုတွဟ်ကဵုကီုရ။ အလဵုဇကု တၠဂုဏ်အစာဂှ် မွဲသၞာံ ကၠံကိုဋ် ကဵုကၠုင်ဒါန် ပွိုင်ပိသၞာံ ဒှ်အာ သြန် ပိကၠံကိုဋ်ပြင်ရ။
၂၁ သေတ်တေမ်ပါ ၂၀၁၈ ဂှ် ထပက်လိက်ကသုက် ကေုာံ ကဵု ဟရမ်ရာန်ဘာမန် အလန်ပထမ ဒးပသောင်ကဵု သြန် ၃၆၀ ကိုဋ်ဝါန်၊ သြန်ၚုဟ်သၟေဟ်တအ်ဂှ် အပ္ဍဲပွိုင်ပိဂိတုဂှ် သ္ဒးပသောင်ကဵု ညံင်ဂွံပြေအိုတ်ရ။ ညးတာလျိုင်တအ် ဒှ်ကၠုင်ဓဝိင် ဂွိင်ဖေက် ကဵုဟွံမာန်ကီုလေဝ် ဟိုတ်နူ ဒြဟတ်မဒါန်ဂကူမန်တအ်တုဲ ပ္ဍဲ ၂၂ အံက်တဝ်ပါ ၂၀၁၈ ဂှ် ပသောင်ဏာသြန် ၅၀၀ ကိုဋ်၊ ပ္ဍဲ ၁၄ ဒဳဇြေန်ပါ ၂၀၁၈ ဂှ် ၁၅၀၀ ကိုဋ်၊ ပ္ဍဲ ၂၁ ဒဳဇြေန်ပါ ၂၀၁၈ ဂှ် ၁၂၃၀ ကိုဋ် အပ္ဍဲပွိုင်ပိဂိတုဂှ် ဗွဲမအမ်သဝ် ၚုဟ်ဘာဂှ် ပသောင်ကဵုဏာမာန် သီုဖအိုတ်ရ။
စမြိုင်ဂှ် နူကဵု သ္ၚိ ဂွံဒှ်ဘာဂှ် သ္ဒးဖျေဟ် ဗီုပြင်တၟိ ခဒမ်ကျာ်၊ ဒၞာဲတွဟ်ဓရ်ဒှ်တမ်တုဲ ခရိတ်ပဠေဝ်ဘာ သီုဖအိုတ် အိုတ်အာ သြန် ၆၀၀ ကိုဋ်ပြင်င်ပၠန်ရ။ ကိစ္စပဠေဝ်ဘာ အာစိုပ်ဒတုဲအိုတ်တုဲ ကၠောန်သဘင်စရိုဟ်ဍာ်ဘာ ပ္ဍဲကဵု ၁၃ သေတ်တေမ်ပါ ၂၀၁၉၊ နူကဵု ဂကောံကွာန်တၟအ်ကၞေင် ဒုင်သဇိုင် ကဵုဒါန်ပိဏ္ဍပါတ်အာဟာရ သွက်တ္ၚဲစရိုဟ်ဍာ်ဘာတုဲ၊ ၁၄ သေတ်တေမ်ပါ ၂၀၁၉ ကၠောန်သဘင်ပူဇဴဓမ္မဒေသနာဂှ် နူကဵု ဂကောံကွာန်လၟိုင် ကဵုဒါန်ဖာပ်သင်ရ။ သဘင်ပူဇဴဓမ္မဒေသနာဝွံ အလဵုဇကု တၠဂုဏ်အစာ သဳလာစာရ (ရာမညရဋ္ဌဗုဒ္ဓတက္ကသိုလ်) ဟီုတွဟ်သင်ရိုဟ်ကဵု ဍောင်ဓဝ်ဓရ်ဒေသနာကျာ်ရ။
ဂကောံဝေယျာဝစ္စ ပ္ဍဲကဵု ဘာမန်ကိုဝ်ရဳယျာဝွံ ဒက်ပ္တန်လဝ် ဂကောံအလန်ဝေယျာဝစ္စ နွံဒၟံင် ၁၄ ဂကောံ။
ဂကောံ ၁၄ ဂကောံဝွံ ဒှ်ဂကောံတိုင်ခဳ ဘာမန်လေဝ် ဟီုစဂွံရ။
တၠဂုဏ်အစာ ဉာဏရံသဳ (နွံပိုန် ဘာမန်ကိုဝ်ရဳယျာ) လိက်ကၞပ်စၟတ်သမ္တီ သဘင်မ္ၚဵုစရိုဟ်ဍာ်ဘာ ရာမညနိကာယ ဘာမန်၊ ဍုင်ကိုဝ်ရဳယျာ။ (219-09-13)
This article uses material from the Wikipedia မန် article ဘာမန် ကိုဝ်ရဳယျာ, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). ပရောပရာတၚ်လညာတ်တၞဟ်ယဝ်ရဟွံမွဲတှ်ေပ္ဍဲ CC BY-SA 4.0 မဒုၚ်ကေတ်မာန်ရ။ Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki မန် (DUHOCTRUNGQUOC.VN) is an independent company and has no affiliation with Wiki Foundation.