Кайфү Тошики

海部 俊樹 Кайфү Тошики, 1931 оны 1-р сарын 2-нд Японы Айчи аймгийн Ичиномия хотод төрж, 2022 оны 1-р сарын 9-нд нас барсан) Японы төр, нийгмийн зүтгэлтэн. 1989-1991 онуудад Японы Ерөнхий сайдаар сонгогдон ажилласан.

Т.Кайфү гэрэл зурагчны гэрт төрсөн. Токио дахь Васэда Их сургуулийг 1954 онд төгсөөд хувийн хэвшилд ажилласан. Энэ үед Японы Либерал-Ардчилсан намд элсэж улс төрийн үйл ажиллагаагаа эхлүүлсэн байна. Хэсэг хугацаанд парламентын гишүүний туслахаар ажилласан байна.

1960 онд тэрээр анх парламентад сонгогдож, Төлөөлөгчдийн танхимын хамгийн залуу гишүүн болж байжээ. Түүнээс хойш парламентын гишүүнээр тасралтгүй сонгогдсон юм. Ерөнхий сайд асан Мики Такэогийн дэмжлэгийг хүлээдэг байсан. Парламентын хороодод янз бүрийн албан тушаал хашиж байсан Кайфү Либерал-Ардчилсан намын аппаратын гишүүн байхдаа намын залуучуудын бодлогыг хариуцаж байсан ажээ.

1989 онд Либерал-Ардчилсан намын дээд албан тушаалтнууд авлигын хэрэгт холбогдсоны дараа Кайфү Тошики намын болон Төр, засгийн удирдах албан тушаалд дэвшжээ. Тэрээр 1989 оны наймдугаар сард Намын даргаар сонгогдож, тус улсын Ерөнхий сайдаар батламжлагдав.

Япон Улсын Ерөнхий сайд Кайфү Тошики нь 1991 оны 8 дугаар сард Монголд айлчилсан нь тус улсаас төдийгүй Өрнөдийн орнуудаас Монгол Улсад Засгийн газрын өндөр түвшинд хийсэн анхны албан ёсны айлчлал болов. Энэхүү айлчлалаар Ерөнхий сайд Кайфү Монгол Улсад ардчиллыг хөгжүүлэхэд чиглэсэн бодлогыг Япон улс дэмжихээ зарласан юм.