Inyo salah ciek dari ampek padusi nan masuak ka Senayan DPR RI tahun 2019-2024 dari Sumatera Baraik, nan tigo lainnyi iolah Nevi Zuairina, Lisda Hendrajoni jo Rezka Oktoberia. Athari Gauthi Ardi lahia di Padang, 15 April 1992 dan marupokan anak paliang tuo pasangan Epyardi Asa jo Emiko. Apaknyo Epyardi Asra sajak tahun 2021-2024 manjabai jadi Bupati Solok.

Maso Sikolah

Maso kaciak Athari hinggo baranjak ramajo dihabihan di Jakarta. Athari tamaik di SD Muhammadiyah 24 Jakarta tahun 2003, lalu lanjuik ka SMP Al-Azhar 12 Rawamangun tahun 2006 taruih masuak ka SMA 70 Jakarta tahun 2009. Salapeh itu inyo masuak parguruan tinggi. Inyo parnah masuak kuliah di jurusan Manajemen, Universitas Binus (2011-2012), jurusah Hukum di Universitas Pelita Harapan (2020), jo jurusan Hukum lo baliak di Universitas Bung Karno (2021) namun ndak tamaik. Inyo baru salasai manamaikan kuliah di jurusan Hukum tahun 2022 di Universitas Swasta Indonesia.

Dunio Usaho

Athari mamulai karia di dunio usaho sajak masih mudo. Awalnyo sabagai Finance and Administration lalu jadi manager di PT Kaluku Maritama Utama tahun 2013-2017 dan sampaik pulo jadi Direktur PT Kaluku Transport Utama sajak tahun 2015-2017. Inyo parnah juo talibek di PPILIDI Muda sabagai Wakil Katua Umum sajak tahun 2018.

Tajun ka Politik

Athari partamo kali mancubo mancaleg ka DPR RI jo PPP mawakili Sumatera Baraik di Pemilu 2014 namun gagal luluih ka Sanayan. Manjalang Pamilu 2019, inyo bae pindah ka PAN nan katiko itu nyo manjabaik sabagai salah saurang Wasekjen di pantai nan balambang matohari tu dan pancalegan ko didukuang panuah samo apaknyo yaitu Epyardi Asra nan kudian hari manjadi Bupati Solok 2021-2014.

Dalam Pamilu 2019 tu nyo masuak Dapil Sumbar 1 lalu barhasil maraih suaro sabanyak 82.982 suaro nan marupokan suaro tabanyak dari partainyo. Di Sanayan, Athari dilatakan jo partainyo di Komisi V (limo) nan mambidangi Infrastruktur, Trasnportasi, Daerah Tatingga jo Transmigrasi, Meteorologi, Klimatologi jo Geofisika. Salamo kampanye Athari mangaku ndak mamakai politiak pitih namun langsuang tajun ka masyarakaiak tujuah bulan sabalun Pamilu 2019 dimulai.

Athari Gauthi acok turun ka lapangan dan babarapo kali turun ka Solok jo apaknyo nan alah manjabaik sabagai Bupati untuak maninjau banyak hal. Athari mampu mambaok pitih miliaran rupiah dari pusek untuak Sumbar malalui Program Mampacapek Paningkekan Tato Guni Aia jo Irigasi (P3TGAI) untuak mambangun daerah tampek nyo tapiliah. Dana maningkek 100% dari sabalunnyo nan bararti itu sakitar 40 miliar pitih masuak dibaok anak mudo tu sabagai lagislator nan tapiliah 2019 silam. Athari juo mambaok dana dari pusek untuak pambangunan jalan Kapujan manuju Rimbo Data di Solok sakitar 36 miliar nan alah mulai dikarajoan di akhir tahun 2023 kapatang. Kini mamasuki akhia tahun jabatannyo, inyo bafokus manjalankan mandek nan nyo dapek dari masyarakai Sumbar sambari manyiapkan diri untuak mancaleg 2024 nan kadatang kamudian.

Kawin

Athari Gauthi Ardi kawin jo bujang nan banamo Arradityo Sugiarto lalu dari hasil pakawinan tu nyo dapek duo urang anak dan dihadiri banyak tokoh.