Bani Tsaqif
Bani Tsaqif (bahaso Arab: بنو ثقيف) adolah salah satu kabilah Arab nan pantiang, nan marupoan panduduak utama kota Tha'if, ciek kota di Arab Saudi.
Para katurunan kabilah ko acok mamakai namo panggilan (nisbah) Ats-Tsaqafi (الثقفي). Maso kini, salain di Tha'if jo Arab Saudi, kabilah ko lai banyak taseba pulo di nagara-nagara Arab lainnyo, sarupo di Suriah, Libanon, Masia, Tunisia, Aljazair, Maroko, Yordania, Irak, sarato di Provinsi Hatay in Turki jo di Iran.
Bani Tsaqif adolah katurunan dari Qasiyy bin Munabbih bin Bakr bin Hawazin, iyolah salah surang katurunan dari Bani Hawazin. Inyo babini anak dari Amir bin al-Zarib al-Adwani, surang pamimpin Wadi Wajj (namo lamo Tha'if), dan sajak tu mandapek sabuikan "Tsaqif" (aratinyo bijak, mudah paham). Pado maso pra Islam, Bani Tsaqif tabagi jadi duo kalompok, iyolah Bani Malik jo Ahlaf. Katiko tu untuak manjago kasaimbangan politik, mangambangkan ekonomi, jo manjago kaamanan kota Tha'if, Bani Malik manjalin ubuangan arek jo Bani Hawazin, sadang Ahlaf manjalin ubuangan arek jo Bani Quraisy.
Bani Tsaqif dikunjuangi dek Nabi Muhammad pado akia bulan Syawal taun kasapuluah satalah baliau mamuloi dakwahnyo. Nabi Muhammad saaik tu datang ka para pamuko Bani Amr bin Umair, salah satu dari kalompok Ahlaf. Namun upayo patamo tasabuik gagal. Bani Tsaqif pado maso tu mamuja patuang Al-Laata.
Dalam pangapungan kota Tha'if salamo labiah kurang sapuluah ari satalah Parang Hunain, Bani Tsaqif jo Bani Hawazin dapek batahan. Namun, pindahnyo Bani Tsaqif masuak Islam tajadi indak lamo sasudahnyo, iyolah satalah Parang Tabuk. Pamimpin Bani Tsaqif nan patamo nan masuak Islam adolah Urwah bin Mas'ud, namun mati syahid dibunuah dek kaumnyo surang nan manulak diimbau masuak Islam. Dek cameh karano lah mambunuah Urwah, kaum Bani Tsaqif mautuih lai anam urang pamimpin kabilah lainnyo, nan kudian tingga di Madinah salamo babarapo wakatu untuak mampalajari Islam. Satalah tu anam pamimpin Bani Tsaqif baliak ka Tha'if dan manjalehan ka kaumnyo, inggo akianyo kasadonyo urang Bani Tsaqif pun masuak Islam. Ateh parentah Nabi Muhammad, mangko patuang Al-Laata kudian dihancuaan dek utusan kaum Muslimin dari Madinah, iyolah Abu Sufyan bin Harb jo Mughirah bin Syu'bah.
Badasa hadits riwayaik Abu Hurairah jo Ibnu Abbas, dari tujuah dialek bahaso Arab (sab'ah ahruf) di ma Al-Qur'an pado awanyo baturunan, salah satunyo adolah dalam dialek Bani Tsaqif.
Tokoh
- Al-Hajjaj bin Yusuf ats-Tsaqafi
- Al-Harits bin Kaldah ats-Tsaqafi
- Al-Hurr bin Abdurrahman ats-Tsaqafi
- Al-Mughirah bin Syu'bah ats-Tsaqafi
- Isa bin Umar ats-Tsaqafi
Rujuakan
This article uses material from the Wikipedia Minangkabau article Bani Tsaqif, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Konten tasadio di bawah CC BY-SA 4.0 kacuali dinyatoan lain. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Minangkabau (DUHOCTRUNGQUOC.VN) is an independent company and has no affiliation with Wiki Foundation.