Qatar

Batehnyo di selatan adolah Arab Saudi dan sisonyo dibatehi Taluak Persia.

Sasudah dominasi Inggirih jo Kasultanan Utsmaniyah di Qatar, akhianyo Qatar manjadi nagari nan mardeka pado 3 September 1971. Dahulu, Inggirih manguasai Qatar sabagai tampek transito kapa dagang sabalun manuju India. Qatar kudian mamparoleh status sabagai dependen dari Inggrih, kudian status protektorat Inggris nan dihantikan pado taun 1916.

Sasudah Parang Dunia Kaduo, Qatar barusaho mamparoleh kamardekaannyo, tarutamo sasudah India mancapai kamardekaannyo pado taun 1950-an. Qatar makin manjadi sasudah Inggirih mambarikan kamardekaan kapado Kuwait pado taun 1961. Pamarintah Inggirih manyatokan akan manghantikan panguasoan politik tatapi tatok manaruihkan panguasoan ekonomi di Qatar. Hal iko indak dibiakan dek Qatar malalui mamantuak Federasi Arab Taluak basamo jo Bahrain.

Awalnyo, ekonomi Qatar difokuskan pado parikanan jo mutiara namun industri mutiara jatuah sasudah munculnyo mutiara nan dibudidayakan dari Japang pado taun 1920-an dan 1930-an. Transformasi ekonomi tajadi pado taun 1940-an, iyolah katiko panamuan simpanan minyak bumi. Kini, pamasuakan utamo Qatar adolah dari ekspor minyak jo gas bumi. Simpanan minyak nagari iko dipakirokan sabanyak 15 miliar barel (2,4 km³).

Untuak baberapo taun ka muko, Qatar dipakirokan akan taruih fokus ka minyak jo gas bumi, namun alah mulai mangambangkan sektor swasta. Pado 2004, Qatar Science & Technology Park dibuka untuak manarik dan malayani babagai usaho babasis teknologi, baik dari dalam maupun lua Qatar.

Punyo PDB per kapita nomor 2 tatinggi di dunia dan pakiroan taun 2008 sakitar $111.000 nan manjadikannyo sabagai nagari nan punyo taraf hiduik panduduaknyo dapek disomakan bahkan lebiah maju dibandiangkan nagari-nagari Eropa Baraik dan babagai layanan sosial dan fasilitas modern.

Qatar dibagi manjadi 10 munisipalitas (baladiyah):

• Ad-Dawhah
• Al-Ghuwariyah
• Al-Jumaliyah
• Al-Khawr
• Al-Wakrah
• Ar-Rayyan
• Jariyan al-Batnah
• Madinat ash-Shamal
• Umm Salal
• Mesaieed

Dataran Qatar hanyo sagadang 160 km dan labiah ketek dari nagari bagian Connecticut di Amerika Serikat. Dataran Qatar tadiri dari gurun pasia. Tampek tatinggi di Qatar adolah di Jabal Dukhan. Area iko manganduang jumlah gas alam nan sangek gadang.

Kabanyakan panduduak Qatar baagamo Islam. Salain etnik Arab, Qatar juo tadiri dari banyak ekspatriat nan bakarajo di Qatar dalam industri minyak. Kabanyakan ekspatriat barasal dari Asia Selatan, iyolah wilayah India, Pakistan, dan Maladewa. Kabanyakan Muslim di Qatar mangikuti aliran Islam Sunnah, sadangkan nan mangikuti Syi'ah hanyo 3 %. Sadangkan panganuik Kristen kabanyakan barasal dari ekspatriat asal Eropa nan bakarajo di Qatar.

Maskipun barado di kawasan Arab, hukum di Qatar candaruang labiah bebas dan liberal. Di bawah kapamimpinan Emir Qatar, Hamad bin Khalifa Al-Thani, Qatar mangalami modernisasi dan liberalisasi. Misalnyo, alkohol dipabuliahkan dalam jumlah tabateh.

Pado babarapo taun ini, pamarintah Qatar malatakan pahatian nan gadang ka pandidikan. Pamarintah Qatar alah mambangun sikolah dari tingkek taman kanak-kanak sampai universitas. Babarapo universitas Amerika Sarikek alah mambukak cabangnyo di Qatar malalui dukuangan Qatar Foundation, di antaranyo adolah Carnegie Mellon University, Georgetown University School of Foreign Service, Texas A&M University, Virginia Commonwealth University, jo Cornell University's Weill Medical College. Emir Qatar, Sheikh Hamad bin Khalifa Al-Thani alah mambantuak Dewan Pandidikan Qatar pado taun 2002.

Qatar mamiliki sistem komunikasi nan modern di Doha. Sistem iko mamakai panggunoan 2 Intelsat dan 1 Arabsat. Parusahaan telekomunikasi rasmi di Qatar adolah Qtel jo Vodafone. Qtel juo manjadi ISP di Qatar nan dinamoi Internet Qatar. Satasiun televisi Al Jazeera barasal dari Qatar dan didukuang dek Emir Qatar.

• Daftar nagari-nagari di dunia