Rumah Gadang atau Rumah Godang adolah namo untuak rumah adaik Minangkabau nan banyak dijumpoi di propinsi Sumatera Barat, Indonesia.
Rumah iko bafungsi sabagai tampek tingga basamo jo tampek diadoannyo acara-acara adaik di Minangkabau. Namo lain untuak rumah ko iolah Rumah Bagonjong, dek adonyo atok malangkuang tajam nan disabuik gonjong. Ado pulo nan manyabuiknyo sabagai Rumah Baanjuang, dek adonyo anjuang di sisi kida atau suok pado Rumah Gadang tipe Lareh Koto Piliang.
Ado aturan adaik dalam pandirian sabuah Rumah Gadang sainggo indak sadoalah wilayah Minangkabau buliah mandirian rumah adaik iko. Rumah Gadang anyo buliah didirian di wilayah darek nan alah bastatus sabagai nagari sajo, baitu pulo di rantau. Salain di Sumatra Barat, rumah gadang dapek pulo dijumpoi di Nagari Sambilan, Malaysia nan biaso disabuik Rumah Tradisional Nagari Sambilan.
Rumah Gadang bafungsi sabagai tampek tingga basamo, nan mampunyoi aturan-aturan jo tata krama. Jumlah biliak tagantuang jo jumlah padusi nan tingga di dalamnyo. Satiok padusi dalam kaum nan alah balaki mandapekan ciek biliak. Samantaro itu padusi nan alah gaek jo anak-anak mandapekan biliak di dakek dapua. Sadangkan gadih remaja mandapekan biliak basamo di ujuang Rumah Gadang.
Sadoalah bagian dalam Rumah Gadang marupoan ruangan lapeh kacuali tampek lalok. Bagian dalam tabagi dari lanjar jo ruang nan ditandoi dek tiang-tiang. Tiang nan babanjar dari muko ka lakang manandoi lanjar, sadangkan tiang nan babanjar dari kiri ka kanan manandoi ruang. Biasonyo ado duo atau tigo lanjar di Rumah Gadang, tagantuang jo gadang rumah. Manuruik adaik, jumlah ruangnyo paliang indak ado limo, idealnyo sambilan.
Rumah Gadang biasonyo dibangun di ateh tanah milik kaluarga induak dalam kaum sacaro turun tamurun , nan hanyo diwarihan dari padusi ka padusi dalam kaum . Dilaman mukonyo, biasonya ado duo buah Rangkiang, nan digunoan untuak manyimpan padi. Ruang nan ado pado ujuang kanan jo ujuang kiri Rumah Gadang disabuik anjuang, nan bafungsi sabagai tampek anak daro jo marapulai sarato tampek barubek pangulu. Indak jauah dari tampek Rumah Gadang didirian, biasonyo dibangun ciek buah surau kaum, nan bafungsi sabagai tampek ibadah, tampek pandidikan jo tampek tingga laki-laki dalam kaum nan alah gadang jo nan alun manikah.
Arsitektur pado Rumah Gadang mampunyoi ciri khas nan babeda jo rumah adaik lain nan ado di Indonesia, tautamo bantuak puncak atoknyo nan runciang manyarupoi tanduak kabau. Dahulunyo atok Rumah Gadang dibuek dari bahan ijuak nan dapek tahan hinggo puluahan taun . Rumah Gadang babantuak ampek persegi panjang nan tadiri dari bagian muko jo bagian lakang. Bagian muko Rumah Gadang biasonya panuah jo ukiran nan umumnyo bamotif aka, bungo, daun jo bidang geometri . Sadangkan bagian lakangnyo nan di lua dilapihi jo bambu.
Bangunan Rumah Gadang iko dibuek gadang ka ateh, namun indak mudah rabah dek guncangan . Salain itu, satiok elemen dari Rumah Gadang mampunyoi makna surang nan dilatari dek tambo nan ado dalam adaik jo budayo masyarakaik Minangkabau. Pado umumnyo Rumah Gadang mampunyoi ciek janjang nan talatak pado bagian muko. Samantaro itu, dapuanyo dibuek tapisah pado bagian lakang rumah nan baimpikan jo dindiang.
Satiok elemen Rumah Gadang mampunyoi maknanyo surang, nan marujuak pado mamangan adaik Minangkabau. Elemen atau unsua nan tamasuak di antaronyo:
Babarapo simbolisme pado bagian rumah, misanyo, gonjong barubuangan jo manjangkau tuhan sarato dindiang tapi, nan sacaro tradisi tabuek dari anyaman bambu, malabangkan kakuatan jo kagunoan kaum nan tabantuak katiko saurang Minangkabau manjadi bagian dari kaum nan labiah gadang pado inyo tagak surang sajo.
Rangkiang idealnyo ado di muko rumah gadang, nan mampunyoi namo jo fungsi nan babeda-beda. Rangkiang sitinjau lauik, barisi bareh untuak kaluarga, khususnyo untuak acara adaik. Rangkiang sitangka lapa barisi bareh untuak disumbangkan ka urang nan indak mampu atau tajadi kalaparan di kampuang. Rangkiang sibayau-bayau barisi bareh untuak kabutuahan sahari-hari kaluarga.
Sacaro umum, ado duo ragam rumah gadang manuruik lareh nan dianuik suku atau nagari dima rumah gadang didirian, yaitu Koto Piliang jo Bodi Caniago.
Rumah gadang lareh Koto Piliang mamiliki anjuang di sisi kiri jo/atau kanan rumah gadang, sainggo disabuik Rumah Baanjuang. Anjuang marupokan bagian rumah gadang nan lantainyo labiah tinggi pado bagian lain rumah. Hal iko dikaranokan kapamimpinan dalam Lareh Koto Piliang nan otokrasi (batingkek-tingkek). Rumah gadang tipe ko banyak dibangun di Luhak Tanah Data.
Babeda jo lareh Koto Piliang, rumah gadang lareh Bodi Caniago indak mampunyoi anjuang. Sainggo lantai pado rumah gadang ragam ko nampak samo tinggi. Hal iko dikaranokan kapamimpinan dalam Lareh Bodi Caniago nan demokrasi. Rumah gadang ragam ko banyak basobok di Luhak Agam jo Luhak Limopuluah Koto. Walaupun baitu, pambagian ruang di dalamnyo sacaro umum samo antaro kaduo lareh ko.
Salain manuruik anjuang nan ado pado rumah gadang, ado banyak ragam lain dari rumah gadang. Pabedaan di antaro ragam-ragam rumah gadang dapek tacaliak dari bantuak, dindiang, jumlah ruang, tonggak, surambi, bahkan gonjong.
Rumah gadang di darek mampunyoi pabedaan jo rumah gadang nan ado di kawasan rantau, baiak nan di pasisia timur maupun pasisia barat. Pabedaan nan mancolok iyolah bantuak atoknyo nan bagonjong, sainggo rumah gadang nan ado di darek biaso disabuik jo rumah bagonjong. Pandirian rumah gadang bagonjong di darek ado aturan adatnyo surang. Rumah bagonjong anyo buliah dibangun di daerah nan alah bastatus nagari.
Rumah gadang ragam ko bantuaknyo cando gajah nan maharam, yaitu gadang, leba, jo tampak kokoh. Rumah gadang ko tadiri ateh banyak ruang. Rumah ko marupokan rumah suku, bukan rumah saparuik. Gajah maharam labiah bafungsi sabagai rumah adaik daripado rumah unian. Gajah maharam difungsikan sabagai tampek alek, baiak alek panikahan ataupun alek kamatian. Ragam rumah gadang ko banyak di Luak Tanah Data. Pintu masuak rumah gadang biasonyo talatak di tangah, baiak di muko atau di lakang rumah.
Rumah gadang ragam ko disabuik juo sabagai rumah gadang bapamokok. Rumah gadang jinih ko banyak di Luak Agam. Rumah gadang ko mampunyoi sayok pado sisi kida jo suok atok. Pintu masuak pado rumah gadang ko talatak di balakang.
Rumah Gadang Rajo Babandiang marupokan ragam rumah gadang balareh Bodi Caniago nan ado banyak di Luak Limo Puluah (Kabupaten Lima Puluh Kota dan Kota Payakumbuh). Dinamoi rajo babandiang dek ado ruang tambahan di bagian tapi nan badampiangan (babandiangan), tapi indak simetris sarato bapaserek ka balakang. Pamasangan saderet tiang tambahan nan disabuik "tiang babisiak" mambuek ruang tadi bapaserek ka balakang inggo dinamokan pulo sabagai rumah gadang bapaserek.
Namo lain dari rumah gadang rajo babandiang adolah rumah gadang bagonjong limo. Hal iko dek biasonyo ado limo gonjong di atoknyo. Sabananyo gonjong nan kalimo marupokan gonjong tambahan untuak ruang tambahan hasil tiang babisiak tadi. Pado umumnyo pintu masuak talatak di sampiang, antaro ruang bagonjong kaampek jo nan kalimo.
Rumah Gadang Batingkok atau Batingkek marupokan ragam lain dari rumah gadang nan dibuek batingkek (duo atau tigo). Rumah gadang jinih ko marupokan pangambangan dari rumah gadang gajah maharam, surambi papek, atau rajo babandiang. Ruang tambahan pado lantai kaduo atau katigo disabuik sabagi ruang paranginan. Di antaro jinih rumah gadang ko nan tanamo, yaitu Istano Basa Pagaruyuang (Batusangkar), Rumah Gadang Sicamin (Biaro, Agam), jo Rumah Gadang Sutan Nan Kedoh (Koto Nan Ampek, Payakumbuh).
Rumah Gadang Surambi Aceh marupokan ragam rumah gadang nan paliang banyak taseba di Kabupaten Solok jo Solok Selatan. Sasuai namonyo, ciri khas rumah gadang ko nampak dari adonyo surambi pado bagian muko rumah, sakaligus manjadi pintu masuak rumah. Hal iko tapangaruah jo arsitektur Aceh samaso wilayah kakuasoan Kasutanan Aceh alah mambantang inggo pasisia barat Sumatera Barat. Pado maso tu, tujuan adonyo surambi adolah subagai tampek manarimo tamu, khususnyo tamu nan urang kolonial.
Manuruik jumlah gonjong nan ado pado surambinyo, Rumah Gadang Surambi Aceh tabagi duo jinih yaitu:
Rumah Gadang Surambi Aceh kini masih banyak basobok di kawasan pagunuangan di Sumatera Barat, khususnyo di Solok jo Solok Selatan. Salain itu, di Kawasan Saribu Rumah Gadang, Nagari Sungai Pagu, Solok Selatan, ragam ko masih banyak dipakai. Pado bangunan modern, rumah gadang ko lah diadopsi pado Hotel Bumiminang, hal itu nampak pado bagian pintu utamonyo nan saakan-akan mambantuak Surambi Bagonjong Duo.
Rumah gadang di rantau, pasisia barat ataupun timur, dibangun babeda jo rumah gadang di darek dek ado adaik maatuanyo. Ciri bangunannyo babantuak rumah pangguang gadang jo janjang talatak di tangah tumah sarato atok nan indak bagonjong. Atok nan bangun kadang dibuek agak malangkuang sarupo Rumah Lontiok, atau bahkan indak malangkuang samo sakali sarupo Rumah Tungkuih Nasi. Dek karano indak ado gonjongnyo ko lah, masyarakaik acok salah manganggapnyo bukan rumah gadang.
Rumah di daerah rantau biasonyo tapangaruah arsitektur lua sarupo Aceh, Malayu, Nieh, bahkan Ulando. Walaupun baitu, pambangunan bangunan rumah gadang ko masih tatap bakaitan jo aturan adaik Minangkabau nan matrilineal.
Rumah Gadang Kajang Padati marupokan ragam rumah gadang nan ado di kawasan rantau pasisia barat, khususnyo di Kota Padang, Sumatera Barat. Dinamokan kajang padati dek karano bantuaknyo sarupo jo panutuik padati (kajang padati). Rumah gadang ragam ko sangaik babeda jo nan ado di darek. Pabedaan nan paliang jaleh tampak pado atoknyo nan bukan bagonjong, tapi agak malangkuang saketek di atehnyo. Hal ko dek karano Padang marupokan kawasan rantau. Bantuak rumah gadang ko dipangaruahi dek arsitektur kolonial nan panah manguasoi Padang dahulu, sarupo Aceh. Pangaruah Aceh di antaronyo buliah nampak pado bantuak janjang sarato ukiran-ukiran nan ado.
Rumah gadang ko biasonyo tabuek dari kayu laban, banio, kalek, jo rasak. Dalam pambangunannyo, rumah ko dibangun jo orientasi maadok ka batang aia. Kini rumah gadang Kajang Padati lah mulai jarang dibangun. Namun, masih banyak di sakitar Kuranji jo Pauah. Subagai upayo palastariannyo, Rumah Gadang Kajang Padati pun lah mulai diadaptasi dalam bangunan-bangunan miliak pamarintah Kota Padang, salah satunyo pado Balaikota Padang.
Rumah Gadang Tungkuih Nasi marupokan salah satu ragam rumah gadang nan biaso tasuo di kawasan rantau pasisia barat Sumatera, sarupo di Pariaman, Padang, jo Pasisia Selatan. Sarupo jo Rumah Gadang Kajang Padati, Rumah Gadang Tungkuih Nasi indak mamakai gonjong pado atoknyo. Sasuai namonyo, bantuak atoknyo saakan-akan manyarupoi tungkuih atau pambungkuih nasi. Salah satu bangunan nan tanamo yaitu Rumah Gadang Mande Rubiah di Lunang Silaut, Pesisir Selatan.
Rumah Gadang dalam dialek Kuantan Singingi disabuik Rumah Godang. Kuantan Singingi, Riau, nan tamasuak wilayah rantau Minangkabau mampunyai bantuak rumah godangnyo surang. Rumah Godang Kuantan Singingi ko mampunyoi bantuak nan ampiang sarupo jo Rumah Lontiok nan ado di Kampar, Riau, di mano babantuak rumah pangguang nan baratok malangkuang lantiak (lontiok). Namun, bantuak atok nan batingkek mambueknyo babeda jo ragam rumah gadang lainnyo. Salah satu Rumah Godang Kuantan Singingi nan tanamo iyolah Rumah Godang Datuak Bisai di Kecamatan Kuantan Tangah, Kabupaten Kuantan Singingi, Riau.
Rumah Lontiok marupokan evolusi dari rumah gadang di Kabupaten Kampar, Riau. Ciri khasnyo nampak dari bantuak atoknyo nan malangkuang lantiak, dek itu rumah ko dinamoan Rumah Lontiok (lantiak). Bantuak atoknyo babeda jo rumah gadang di wilayah darek nan mamakai gonjong nan malangkuang tajam.
Rumah Tradisional Nagari Sambilan marupokan bantuak evolusi dari rumah gadang di Nagari Sambilan, Malaysia. Rumah ko dibangun dek urang Minangkabau nan marantau ka Nagari Sambilan lalu barasimilasi jo Urang Asali Semenanjung Malaysia. Dek karano itu, rumah ko ado tapangaruah unsua arsitektur satampek. Salah satu kakhasan dari rumah ko iolah pado atoknyo nan malangkuang lantiak jo panjang sainggo rumah ko disabuik juo jo Rumah Bumbung Panjang Negeri Sembilan (Rumah Baratok Panjang Nagari Sambilan).
Rumah ko masih banyak ditamukan di Nagari Sambilan, Malaysia. Di antaro Rumah Nagari Sambilan nan tanamo yaitu, Istano Ampang Tinggi jo Istano Sori Monanti di Seremban, Nagari Sambilan.
Manuruik tradisinyo, tiang utamo Rumah Gadang nan disabuik tonggak tuo ko bajumlah ampek buah/batang nan diambiak dari hutan sacaro bagotong royong dek anak nagari, tarutamo kaum kirabaik, sarato malibaikan puluahan urang. Batang kayu nan ditabang biasonyo adolah pohon jua nan alah tuo jo luruih sarato badiameter antaro 40 cm inggo 60 cm. Pohon jua tanamo dek kareh jo kuek. Sasudah dibaok ka dalam nagari, pohon tu indak langsuang dipakai, namun dirandam daulu di tabek miliak kaum salamo batahun-tahun.
Sasudah cukuik wakatu, batang kayu tu diangkek atau dibangkik untuak dipakai sabagai tonggak tuo. Prosesi mangangkek/mambangkik kayu tu disabuik juo subagai mambangkik batang tarandam, kudian proses pambangunan Rumah Gadang balanjuik ka prosesi barikuiknyo, managakan tonggak tuo atau tiang utamo sabanyak ampek buah, nan dipandang sabagai managakan basa.
Batang pohon nan alah dirandam salamo batahun-tahun tu kudian manjadi kareh bana jo indak dapek dimakan anai-anai, sainggo dapek batahan sabagai tonggak tuo salamo ratusan tahun. Parandaman batang pohon nan ka dijadian tonggak tuo salamo batahun-tahun tu marupokan salah satu kunci nan mambuek Rumah Gadang tradisional mampu batahan malintasi zaman.
Pado bagian dindiang Rumah Gadang dibuek dari papan, sadangkan bagian lakangnyo dibuek dari bambu. Papan dindiang dipasang vertikal, samantaro itu sadoalah papan nan manjadi dindiang jo manjadi bingkai diagiah ukiran, sahinggo saluruah dindiang manjadi panuah dek ukiran.
Pado dasanyo ukiran pado Rumah Gadang marupoan ragam hieh pangisi bidang dalam bantuak garih malingka atau persegi. Sacaro umum, motifnyo adolah tumbuahan marambek, aka nan badaun, babungo jo babuah. Pola aka biasonyo babantuak lingkaran, aka baririk, bahimpikan, bajalinan jo sambuang manyambuang. Salain itu, cabang atau rantiang akanyo bakaluak ka lua, ka dalam, ka ateh jo ka bawah.
Kaunikan bantuak atok Rumah Gadang nan malangkuang tajam, alah manginspirasi babarapo arsitek di balahan nagari lain, sarupo Ton van de Ven di Balando nan mangadopsi desain Rumah Gadang pado bangunan The House of the Five Senses. Bangunan nan dioperasikan sajak taun 1996 itu digunokan sabagai pintu masuak utamo dari Taman Hiburan Efteling. Bangunan satinggi 52 meter jo laweh atok 4500 meter persegi itu marupokan bangunan bakonstruksi kayu jo atok jirami nan tagadang di dunia manuruik Guinness Book of Records.
Desain Rumah Gadang nan banyak ado di Negeri Sembilan diadopsi pulo pado bangunan paviliun Malaysia di World Shanghai Expo 2010 nan taselenggara di Shanghai, RRT pado taun 2010.
Gonjong (bagian atok nan malangkuang tajam) Rumah Gadang manjadi simbol atau ikon bagi urang Minangkabau, basamo jo ikon lainnyo sarupo rono hitam-sirah-kuniang ameh, randang, dan lainnyo. Hampia sadoalah kantua pamarintahan di Sumatera Barat mamakai desain Rumah Gadang jo atok gonjongnyo, walaupun dibagun sacaro permanen jo simin sarato batu. Ikon gonjong dipakai pulo di bagian muko rumah makan Padang nan ado di babagai wilayah di lua Sumatera Barat. Logo-logo limbago atau pakumpulan urang Minangkabau pun banyak nan mamakai ikon gonjong jo sagalo variasinyo.
Rumah Gadang saisuak nan baatok ijuak
Wiki Commons mampunyoi media nan bahubuangan jo Rumah Gadang |
Rumah Gadang kini
Bangunan nan mangadopsi desain Rumah Gadang
This article uses material from the Wikipedia Minangkabau article Rumah Gadang, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Konten tasadio di bawah CC BY-SA 4.0 kacuali dinyatoan lain. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Minangkabau (DUHOCTRUNGQUOC.VN) is an independent company and has no affiliation with Wiki Foundation.