Lapangan Kantin

Lapangan ko acok digunoan untuak kagiatan-kagiatan masyarakaik sarupo acara pesta rakyaik, panyuluahan, sosialisasi, dan Lapangan kantin acok juo digunoan untuak joging, ditambah ado juo tampek balanjo sarupo kadai-kadai makanan, dan lain-lain. Lapangan kantin ko sajatinyo banamo Lapangan Wirabraja, cuman labiah tenar jo namo Lapangan Kantin.

Lapangan Kantin ko adolah tampek yang tampak jiko awak masuak Bukittinggi lewaik jalur utamo, persis dimuko kantua wali kota lamo. Kalau pawai 17 agustus, biasonyo rami dek manjadi pusaik kegiatan. Lapangan ko kadang-kadang digunoan juo untuak konser dari band-band terkenal, sarupo NOAH, jo band-band terkenal lainnyo.

Jikok hari rayo Idul Fitri maupun Idul Adha, lapangan kantin ko digunoan juo untuak sumbayang rayo. Hampia satiok tahun sumbayang rayo dipusaikkan di lapangan kantin untuak daerah Bukittinggi.

Kegiatan olahrahga untuak anak sakolah takadang acok juo manggunoan lapangan kantin, baiak itu dalam maambiak nilai dalam mato pelajaran olahraga, maupun lomba-lomba acok diadoan di lapangan kantin. Karano Lapangan kantin ko marupoan pusaik lapangan di Bukittinggi yang bisa dikecekan jangkauannyo mudah untuak sakolah-sakolah yang dakek jo lapangan kantin yang nyio maadoan kegiatan.

Lapangan kantin pernah juo digunoan oleh Wakia Presiden partamo Indonesia, Bung Hatta, untuak maadoan apel gadang. Waktu itu tahun 1947, Balando tangah malancaran Agresi Militer I. Wakia Presiden Partamo Indonesia, Bung Hatta yang tangah barado di kampuang halamannyo Bukittinggi, barusaho mancari celah untuak manembus blokade Balando. Salah cieknyo jo mambali kapa tabang.

Bung Hatta mambantuak Panitia Pusat Pangumpua Ameh yang dipimpin samo Mr. Karim, untuak mangumpuan sumbangan, lalu inyo maadoan apel gadang di Lapangan Kantin, Bukittinggi, untuak mahimbau partisipasi rakyaik.