Tadɩyɛ

Tɔsʋʋ tʋmɩyɛ ɖɩnɛ, ɖɩkɛna pɩyʋ yabʋ nɛ pɛdʋ. Pɛdʋ kɛna tʋmɩyɛ nɖɩ, kɛzaɣ kpaɖɩ ɖoyoo paa ɛsɩmtaa yɔ. Paa tadɩyɛ tʋ weyi, ɛlɩmaɣza keekee kɛlɛ size ɛyaba nɛ ɛpɛdɩ-ɩ lɛ, ehu kɛzɛyaɣ nɛ pʋɖɔ siŋŋ.

Tadɩyɛ wɛna ɖɩ-paɣtʋ. Tadɩyɛ paɣtʋ liɖe yaa ɖɩlɩyɛ lɩna paɣtʋ takayaɣ ŋga payaɣ kɛ size Code de commerce nɛ fransɩ kʋnʋŋ taa yɔ. Tadɩyɛ paɣtʋ ndʋ tɩkɛna ɛjaɖɛ yaa kedeŋa toovonim n̄ɩnʋʋ yaa tɔm hʋʋ tʋmɩyɛ takayaɣ sɔsaɣ ŋga kɔcɔŋna tadɩyɛ nɛ tɔsʋʋ huu nʋmɔʋ taa yɔ.

Yabʋ nɛ ɖɛzʋʋ yaa ɖaɣnʋʋ pɛdʋʋ kɛzaɣ n̄ɩnʋʋ kɛna tadɩyɛ tʋ maɣzɩm. Ɛlɛ, ɖɩɖɔkɛ ɖɔɖɔ size, tʋma ndɩ ndɩ nayɛ wɛɛ nɛ a-taa lɛ kɛzaɣ ɛzɩ-ɩ payaʋ size tɔsʋʋ yɔ, fɛyɛ kaɣlaɣ ɛzɩ wondu pɛdɩʋ yɔ. Pɩkɛna tʋma wena a-kɛzaɣ tɛkɛna wondu yaa liidiye n̄ɩnʋʋ yɔ.

Tʋma wena acɔŋna tɔsʋʋ yaa liidiye ɛsɩnda yɔ, a-taa nayɛ kɔyɔ : ɖɩkpaɣ ɛzɩ lɔŋ sɩɣsʋ sukuli taa yaa lɔŋ wɩlʋʋ paa le yɔ, nɛ polisi tʋmɩyɛ labʋ, nɛ ɛzakuliye lʋbʋ nʋmɔʋ taa ɖɔɖɔ mbɩ yɔ.

Pɩtaɩɩna piɖeke, ɛlɛ ɖɔkɔtɔ yaa fɛɖʋ tʋmɩyɛ labʋ, nɛ toovonim tɔm hʋʋ tʋmɩyɛ, nɛ kuduyuŋ maya sɔsaɣ tʋmɩyɛ labʋ, nɛ Ɛsɔ kɩlaŋ labɩyaa n̄ɛwɛ ɖɔɖɔ.

Pɩtasɩna ɖɔɖɔ, tɔm ɖɩhʋyɛ tɩnaa tʋma, nɛ tʋma ndɩ ndɩ yɔ cɔnɩyaa, nɛ paɣtʋ lɩzɩyaa tʋma ɖɔɖɔ mbɩ yɔ, atɛkɛna tadɩyɛ tɔsʋʋ n̄ɩnʋʋ n̄ɩna.

Ŋgbɛ naɖɩyɛ wɛɛ nɛ payaɣ-ɖɩ size Kedeŋa Kpeekpe Tadɩyɛ Ŋgbɛyɛ (Organisation mondiale du commerce). Nɖɩ cɔŋnana tadɩyɛ paɣtʋ kpeekpe yɔ.