Chang'e 1: Sonda lunar de China.

Chang'e 1 recibe o seu nome dunha lenda chinesa na que unha rapaza xove voa ata a Lúa.

Órbitas

Chang'e 1 foi lanzada o 24 de outubro de 2007 ás 10:05 UTC a unha órbita inicial de 205 km de perixeo e 51.000 km de apoxeo. Ás 9:15 UTC do 31 de outubro a nave encendeu o seu motor durante 13 minutos para poñerse nunha traxectoria translunar. Ás 3:15 UTC do 5 de novembro, nas proximidades da Lúa, Chang'e 1 encendeu novamente o seu motor durante 22 minutos para frearse e entrar nunha órbita arredor da Lúa 200 km de periastro, 8600 km de apoastro e un período de 12 horas. Unha segunda manobra de 14 minutos de duración o 6 de novembro ás 3:21 UTC puxo a nave nunha órbita de 213 por 1700 km e un período de 3,5 horas. A órbita final de traballo acadouse o 7 de novembro tras un encendido do motor que durou dez minutos e comezou ás 00:24 UTC, poñendo a nave nunha órbita circular de 200 km de altura e 127 minutos de período. Tras finalizar a súa misión, Chang'e foi dirixida á superficie lunar, onde impactou o 1 de marzo de 2009.

Nave

Chang'e 1 está baseada no bus de satélites de comunicacións DFH-3 e ten unha masa de 2350 kg, da que a metade é propelente e 130 kg son instrumentos científicos. Ten forma de caixa de 2,0 x 1,7 x 2,2 metros, e a alimentación eléctrica proporciónaa un par de paneis solares que xorden dos extremos da caixa.

Chang'e 1 levaba sete instrumentos a bordo:

• Unha cámara estereográfica para lonxitudes de onda visibles.
• Un espectrómetro interferómetro para obter imaxes multiespectrais da superficie lunar.
• Un altímetro láser.
• Un espectrómetro de raios gamma.
• Un espectrómetro de raios X.
• Un radiómetro de microondas para medi-lo espesor do regolito lunar.
• Un detector de partículas de alta enerxía e de vento solar.

Outros artigos

• Chang'e 2
• Chang'e 4
• Chang'e 5-T1