Montevideo Alma Gallega: Revista uruguaia
Alma Gallega foi unha publicación editada pola Casa de Galicia de Montevideo (Uruguai) de 1919 a 1967 con carácter mensual -teoricamente- ata 1938 e como números extraordinarios, de periodicidade variable, ata a súa desaparición.
En total, editáronse 24 números ordinarios e 17 extraordinarios. Trátase da revista societaria de maior duración das publicadas polos emigrantes galegos do Uruguai. Editouse principalmente en lingua castelá, aínda que algunhas narracións e textos poéticos utilizaban o lingua galega.
| Alma Gallega | |
|---|---|
  | |
| Fundación | 1 de agosto de 1919 |
| Lingua | lingua castelá e lingua galega |
| Localidade | Montevideo |
| [ editar datos en Wikidata ] | |
Historia da publicación
Alma Gallega viviu tres etapas diferenciadas, caracterizadas en todo caso pola irregularidade na súa publicación.
Na primeira época, desde agosto de 1919 ata 1927, publicáronse 18 números máis 2 extraordinarios.
Na segunda época, entre 1934 e 1938, publicáronse 6 números ordinarios e 4 extraordinarios. Nos anos seguintes xa só estes últimos, e nin sequera tódolos anos.
Nos 27 anos que comprende a terceira época, de 1941 a 1967, só se publicaron 11 números, todos de carácter extraordinario. O derradeiro número apareceu en outubro de 1967.
Ó longo dos anos, o número de páxinas variou desde as 24 ás 44, nos números ordinarios, e desde as 48 ás 112, nos extraordinarios. Os contidos da revista dirixíanse, basicamente, a recolle-las actividades normais da Casa de Galicia, complementándose con textos literarios, culturais e históricos referidos a Galicia. As ilustracións corresponden a esta dobre liña editorial, con numerosas fotografías das instalacións da Casa de Galicia, por unha banda, e outras fotografías de cidades galegas, paisaxes e persoeiros ilustres, por outra. Contén tamén numerosos cadros e debuxos de diferentes artistas galegos, como Fernando Álvarez de Sotomayor, Francisco Asorey, Bonome, Alfonso Daniel Rodríguez Castelao, Manuel Colmeiro Guimarás, Luís Seoane etc.
Entre os colaboradores habituais ou esporádicos da revista pódense citar case tódalas personalidades políticas e literarias galegas e españolas da época (Ramón Cabanillas, Uxío Carré Aldao, Castelao, Eduardo Pondal, Ramón Otero Pedrayo, Rosalía de Castro, Ramón María del Valle-Inclán, Emilia Pardo Bazán etc.).
Edición facsimilar
En 2006, o Centro Ramón Piñeiro publicou a edición completa dos 41 números que se publicaron. Esta edición facsimilar consta dos números extraordinarios correspondentes ós anos 1922, 1927 e 1941, en papel, e dos 38 números restantes en formato electrónico, nun CD que se adxunta ó libro.
A edición facsimilar estivo dirixida por Luís Alonso Girgado e María Vilariño Suárez e realizouse principalmente a partir dos exemplares conservados na Biblioteca Nacional de Montevideo, completados coas coleccións da Fundación Penzol e da Real Academia Galega.
Notas
Véxase tamén
Bibliografía
- "Alma Gallega". Gran Enciclopedia Galega Silverio Cañada (DVD). El Progreso. 2005. ISBN 84-87804-88-8.
- Vilavedra, D., ed. (1997). Diccionario da literatura galega. Publicacións Periódicas II. Galaxia. p. 40. ISBN 84-8288-137-X.
- Zubillaga Barrera, Carlos (1996). A prensa galega de inmigración en Uruguai (PDF). Consello da Cultura Galega. ISBN 84-87172-08-3.
Outros artigos
Ligazóns externas
- 1ª época e 2ª época Repertorio da prensa da emigración galega. Consello da Cultura Galega.
This article uses material from the Wikipedia Galego article Alma Gallega (Montevideo), which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Todo o contido está dispoñible baixo a licenza CC BY-SA 4.0, agás que se indique o contrario. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Galego (DUHOCTRUNGQUOC.VN) is an independent company and has no affiliation with Wiki Foundation.