Chalendes

Cél articllo est ècrit en arpetan supradialèctâl / ORB lârge.

Cél articllo pôrte sus la féta de Chalendes. Por l’articllo spècefico sus la nèssence de Jèsus de Nazarèt, vêde Nativitât. Por los homonimos, vêde Noèl.

Chalendes [tsa.ˈlɛ̃.də] ou ben Noèl [no.ˈe] est la féta crètièna que cèlèbre la Nativitât, cen vôt dére la nèssence de Jèsus de Nazarèt. La féta de Chalendes vint pouent de temps aprés lo solstiço d’hivèrn que lyé est associyêe (vêre ce-avâl). La dècristianisacion fât que la féta de Chalendes est houé copâye de son fondament religiox dedens un mouél de payis cuchientencs, mas s’y mantint coment féta tradicionâla.

Enstituâye lo 25 de dècembro u IV^émo siècllo et pués èpatâye per la cristianisacion progrèssiva de l’Eropa et du bachèt mèditèrranèen, cela féta de la Nativitât prend a châ pou la place de difèrentes fétes liyêes u solstiço d’hivèrn (féta gèrmanica de Jul, féta de Mitra, Saturnâles romènes, etc.). Presentâ lo Crist coment lo « solely de justice » d’un novél temps, sa nèssence ôvre l’an liturg·ico crètien pendent na mèssa de la mié-nuet ritualisâye.

Lo contio èvangèlico de la nèssence de Jèsus sèrvét de bâsa pendent des siècllos a na granta rèchèce artistica (pintura, scultura, musica, litèratura) que renfôrce la difusion populèra de la crêpe u XIII^émo siècllo, mas los fèrments d’ôtres tradicions liyêes u solstiço disparèssont pas complètament. Cen fât que lo vouargno gèrmano-nordico, segno d’una natura viventa mâlgrât l’hivèrn, est honorâ dês lo XVI^émo siècllo et pués gâgne mémo les églléses. Lo darbelin de Chalendes s’emposerat coment simbolo du temps de les fétes de fin d’an paralèlament a la dècristianisacion de l’Eropa u temps modèrno.

La tradicion du pâre Chalendes que sè mondialise u XX^émo siècllo complèterat cel’èvolucion qu’at rapondu na dimension profana a la féta crètièna, més veriêe vers los megnâts, les famelyes et pués des presents.

Notes