Idatcol (Canis lupus) tir tana moukolafa katca ke Canis oxi vey Canidae yasa ke CARNIVORA veem ( CANIFORMIA volveyveem ).
Idatcol Canis lupus | |||||||||||||||
| |||||||||||||||
giltafa pulara | |||||||||||||||
Bliind | Animalia | ||||||||||||||
Dansok | Chordata | ||||||||||||||
Volveydansok | Vertebrata | ||||||||||||||
Pula | Mammalia | ||||||||||||||
Volveypula | Theria | ||||||||||||||
Tolvolveypula | Eutheria | ||||||||||||||
Veem | Carnivora | ||||||||||||||
Yasa | Canidae | ||||||||||||||
oxi | |||||||||||||||
Canis | |||||||||||||||
Linnaeus, 1758 | |||||||||||||||
katca | |||||||||||||||
Canis lupus | |||||||||||||||
Linnaeus, 1758
| |||||||||||||||
|
Gan Linnaeus bak 1758 taneon zo pimtayar.
Idatcol sotir logijaf xantaf cottoradunol blis koe Eurasia is Lentefa Amerika. Dum kot idatcoldunol sotir kalvekackaf gu vultera ise va wivga onkason gitcabaner.
Va popofa pezitca isu gildetca dir solve witca tir loon axafa. Inaf kor tir gundackaf gu tel ke mialukaf vakol : va tigafo alto is gemaf inieem is opaf pezay is blagutaf iteem is vaf ault isu im sodir.
Dene tum ok yasa tandon giblir. Fentugalon xali vas 15 ilkik cugon roruldar. Idatcol va wivga tumon tcabaner ise kali gebera onkar.
Jontika kuda isu vunda va inafa gruuca is forteyfamafa adala is wupesira drigdad voxen arse batcoba meugale tiyir wupesipisa va ayik kiren rali ke idatcol gitir weyustafa.
Idatcol sotir mingas govitol grudilfus va gijaf werdtoradunol dum deaxol ok namulol ok dace kwaf vakol. Idatcol va rupol ko ditsa dace grudilfur voxise dile rotir katcatoraf.
Xanton, idatcol va glupaxo male Europa kale Barata is male Nipona kale Lentefa Amerika is Mexika frofayar. Koe ruga is aalafa gola is rijust kale kima ke letaxo bliyir. Rekeon koe Europa, saneliama koe meftava ke Espana oku Italia oku Skanda oku Balkana oku Karpata abicote wan moblid.
Idatcol do milkatcik kan eviegara sogoler, grubazeson va tira is tigixo is lum ke xali. Lonoeltafa aneyara ruyed da idatcol sotir antaf xantumik ke zaaveem ke kwaf vakol. |
Abdufiyison gu krijafe ie, idatcol ( Canis lupus ) va opranafa datuca ke arktikaxo metulegaweson exuler. Tuke belafa is kaliackafa laniga, va cug lokaliaf sulem tere sye lajuvebidur. Koe Lentefa Amerika, lani xali va 72 km- bad tanoy vielcek remlaniyir ; koe Kanada ari va milkava dem bedakol keno loon 300 km- laiteyer. Bat atelatoraf govitolap remi toloya safta bal lanira kali tcedera ke tcabanera grugetiner. Mantode tir estupus : bad baroy bartiv, san-aluboy idatcol va acku ke tanoy bedakol vas 270 kg- koartokayad ! Idulugalon, va sinka vas 2 ik 4.5 kg- mialukon vieleon giraweyar.
Tod aultove dem wivga, idatcol ke ruga is tela ke taiga aala va arapeniwesa malesturinda dikid ; va sebadadunol is prokla is kabay ( tulon krido is termil ) is moukolam gralomed. Fentugalon, idatcol ke ruga, dem aftalukoptaf im, va bedakol dalon blidad. Va wivga narackad ise va tela loklaafa ok akolafa ok tcunafa dilfud. Koe amerikafa aala, va wocol is cpogoloc dere malestud.
Laiten gan ayik mali jontika decemda, idatcol koe Europa lokon al griawir. Voxe golde beya is prantuca, wan blir ; inafa ota vas vunta koe tamava zo uldiner, don mon lik koe Rossia. Valente bata patecta, idatcol kale kima ke naelaxo tigir isen moe jontika ewala dum Vaygatc is Kolguyev is Vrangel is Lyaxov is Novaya Sibir zo murobayar. Mali lekeugal, ayik va idatcol gu forteyfamaf is nyagaf is udutaf govitol torigir. Wori in malestutuson anton aytar isen inafa linulara tir rotuvapafa. Darekeugalon idatcol dilfus va ayik ape tiyid bresitolakoles is gamdarulik vey vakol is idatcol. Neken, tod dikote wivga, idatcol va bonol ruzader ise va wilxe guiner. Bandume jontikkane zo lagawalkopeyer : kan zelt is ikse is jiva is dace onkara kan kulirna. Tcabanesik jekun gan inaf myot tid blodaf gu inafa griawira.
Sedme Mammal Species of the World (siatos ke 2005), bata katca vas 37 apta ruldar :
Caninae 3.5 celemda |
| |||||||||||||||||||||||||||||||||||||||||||||||||||||||||||||||
This article uses material from the Wikipedia Kotava article Idatcol (Canis lupus), which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Le contenu est disponible sous licence CC BY-SA 4.0 sauf mention contraire. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Kotava (DUHOCTRUNGQUOC.VN) is an independent company and has no affiliation with Wiki Foundation.