Moscou
Moscou (en Russe: Москва) est la capitale d'la Russie.
Ch't' articl'ye fut c'menchie en Jèrriais |
La populâtion est dans les dgiêx millions d'gens: ch'est la pus grande ville en Ûrope par populâtion.
Histouaithe
La ville fut fondée en 1147 par l'Prînce Youri Dolgorouki et d'vînt auprès tchiques années l'mitan d'eune prîncipaûté. La prîncipaûté d'Moscou fit un tas d'conmèrce et d'vînt riche. En 1380 l'Prînce Dmitri Donskoi dé Moscou battit les Tatars Mongoliens à la Batâle du Clios ès Bécachinnes et Moscou d'vînt l'preunmié pouvé en Russie. Quand la Russie fut libéthée des Tatars Mongoliens en 1480, Moscou d'vînt la capitale.
La ville enmuthaillie au mitan d'Moscou a nom Krémlîn - ch'est la vielle ville.
Lé Tsar Pièrre lé Grand bâtit eune nouvelle ville tch'avait nom Saint Pétersbourg en 1703 et r'muit sa capitale là en 1703, et Moscou 'tait mênommé la vielle capitale. La ville fut brûlée pouor empêchi l'otchupâtion des troupes Françaises en 1812.
Les Commeunistes èrmuit lus capitale d'èrtou à Moscou en 1918, et en 1924 la ville dévînt la capitale d'l'Unnion Soviétique.
Les Gammes Olŷmpiques prîntent pliaiche à Moscou en 1980.
Auprès la tchête d'l'Unnion Soviétique en 1991, Moscou r'dévînt la capitale d'eune Russie îndépendente.
Tchultuthe
La cathédrale dé Saint Basile est fanmeuse - ses coupoles sont un sŷmbole d'la Russie. Ou s'trouve dans la Rouoge Pièche, eune grande pliaiche du bord du Krémlîn où'est qu'nou vait étout GUM (eune grande boutique) et l'maûsolée à Léninne.
Lé Grand Thiâtre (en Russe: Большой Театр) présente dé l'opétha et du ballet.
Lé Métro, lé c'mîn d'fé souôtèrrain, a des stâtions décorées - les cheinnes d's années 30 sont dans l'style du Réalisme Socialiste.
This article uses material from the Wikipedia Nouormand/Normaund article Moscou, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Le contenu est disponible sous licence CC BY-SA 4.0 sauf mention contraire. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Nouormand/Normaund (DUHOCTRUNGQUOC.VN) is an independent company and has no affiliation with Wiki Foundation.