Ar Saozon zo ur bobl eus Bro-Saoz da gentañ penn, daoust ma’z eus aet lod anezho da vroioù all dre ar bed.
Dont a ra ar ger brezhonek "Saozon" eus anv ur boblad c’herman a veve gwechall e hanternoz Alamagn, ar Saksoned. Ul lodenn eus ar boblad-se a yeas da Enez Vreizh adalek dibenn ar Vvet kantved. Gant ar pobladoù german all aet da Enez Vreizh (Angled, Juted) ez eont da ober ar pezh a vez anvet Angled-ha-Saozon gant an istorourien. Gant an dud-se e veze komzet hensaozneg, ur yezh hag a zo orin ar saozneg a gomzer hiziv. Derc’hel a reer d’ober anv eus Angled-ha-Saozon, koulz e saozneg hag e yezhoù all evel ar galleg, evit ober anv eus an dud a vev e broioù saoznek, anvet e saozneg the Anglo-Saxon world.
Tra ma reer e brezhoneg, hag er yezhoù keltiek all, gant ur ger deveret eus "Sakson" evit envel pobl ha yezh Bro-Saoz, e reer e kalz yezhoù all gant ur ger deveret eus anv ur bobl all, an Angled. Dont a ra ar gerioù English, England, anglais, Angleterre eus ar ger-se.
E kembraeg e reer, er yezh komzet, gant ar gerioù Sais pe Saeson el liester, evit ober anv eus tud a gomz saozneg, ha pa vefent Kembreiz. Daoust ma ne blij ket kement-se d’ar Gembreiz na ouzont ket kembraeg, e kaver skouerioù eus an implij-se a-gozh er yezh, gant anv ar barzh Elidir Sais da skouer, un den a veve er Grennamzer (war-dro 1190 – war-dro 1240) hag a ouie saozneg.
E diavaez ar Rouantelezh Unanet e c’hoarvez alies, e meur a yezh, e vefe graet Saozon (Anglais ha kement zo), dre fazi, eus annezidi Breizh-Veur, pe e vefent Saozon, pe e vefent Skosiz pe c’hoazh Kembreiz.
This article uses material from the Wikipedia Brezhoneg article Saozon, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Danvez a c'haller implijout dindan CC BY-SA 4.0 nemet ha notet e vefe ar c'hontrol. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Brezhoneg (DUHOCTRUNGQUOC.VN) is an independent company and has no affiliation with Wiki Foundation.