陳安琪

陳安琪阿爸做過中國廣播公司製作人。陳安琪仲有一個細佬，攝影師陳贊雲。陳父同陳母離咗婚，之後再娶一個德國人。1967年，陳母肺癌病逝。1978年，陳父喺德國波恩肝癌病逝。

陳安琪分別喺香港同台灣升讀小學及中學，之後喺美國愛荷華大學留學，獲傳理系榮譽學士及碩士學位。畢業之後喺美國做工三年，再到洛杉磯加州大學進修，攞到電影系碩士學位。佢試過喺美國電影界及電視界做工，做過副導演、場務、攝影及製作人，亦試過教電影課程。1979年拍攝嘅短片《探訪》喺1980年多倫多「超8米厘」電影節（Toronto Super 8 Film Festival）獲最佳紀錄片獎。劉家昌導演電影《揹國旗的人》，佢喺1980年底為呢齣戲嘅美國外景部份做副導演及製片，之後返香港做成龍電影《龍少爺》嘅副導演。佢做過《夜驚魂》等電影嘅副導演以後，向邵氏公司嘅方逸華自薦，開拍《窺情》、《花街時代》。《花街時代》令葉德嫻獲得香港電影金像獎最佳女配角。佢亦有客串演出電影同電視劇。

陳完成《愛情謎語》之後轉戰廣告界，專做電視廣告及企業形象推廣短片，攞到多個國際廣告大獎。

2008年，陳導演紀錄片《愛與狗同行》，獲得台灣金馬獎最佳紀錄片提名。之後佢花咗3年去拍《三生三世聶華苓》，以旅美華人作家聶華苓做中心人物，2012年拍好，入選香港電影評論學會嘅「2012年度推薦電影」，並獲第13屆華語電影傳媒大獎提名最佳電影及最佳導演。

陳安琪最新作品係紀錄片《水底行走的人》，2017年喺溫哥華國際電影節首映。

導演

• 《探訪》（德文：Der Besuch）（1979）
• 《窺情》（1983）
• 《花街時代》（1985）
• 《愛情謎語》（1988）
• 《愛與狗同行》（2008）
• 《三生三世聶華苓》（2012）
• 《水底行走的人》（2017）