經濟內循環,又叫「國內國際雙循環」,係中共中央政治局常委會喺2020年5月14號提出嘅一個經濟政策,主要係以中國內循環加國際外循環所打造嘅「雙循環」做經濟主體,之後又畀中共中央總書記習近平修正做「以國內大循環為主體」。官方講法係話擴大內需,注重中國國內市場,提升自身創新能力,唔依賴中國以外市場,同時保持對外開放。
早喺奧巴馬時代,因應美國嘅產業空心化,就已經提出「再工業化」等政策。2017年起,當勞侵宣布加強補貼製造回流,佢發動嘅中美貿易戰更加令到美國企業購買中國產品嗰陣受到限制,「中國製造」亦從美國進口比例入面下滑,呢個時候美國商人主要因為勞動成本嘅上升,先將部分勞工密集型嘅產業,轉移到越南、菲律賓等中國鄰近嘅發展中國家而唔係整體回歸。不過武漢肺炎疫情爆發以嚟,全球經濟下滑導致需求疲軟,疫情嘅封鎖同物資短缺,商人以自主政策戰略做考慮,引發真正嘅製造業回歸潮,加上美國對華為等中國企業嘅貿易禁令一步步升級,中國當局冇辦法下將目光瞄準中國國內。
2020年5月14號,中共中央政治局常委會提出,要構建「國內國際雙循環相互促進嘅新發展格局」。2020年5月23號,中共中央總書記習近平喺參加第十三屆全國政協三次會議經濟界委員聯組會議嗰陣話要「逐步形成以國內大循環做主體、國內國際雙循環相互促進嘅新發展格局」。而喺當年召開嘅十九屆五中全會再次提出要「暢通國內大循環,促進國內國際雙循環」。同年11月4號,習近平喺第三屆中國國際進口博覽會開幕典禮上,以影像方式發表嘅主旨演講中聲稱,以國內大循環做主體、國內國際雙循環相互促進嘅新發展格局「唔係封閉嘅國內循環,而係更加開放嘅國內國際雙循環,唔單止係中國自身發展需要,而且將更好造福各國人民」。
中共中央財辦副主任韓文秀解讀話,「提出構建以國內大循環做主體、國內國際雙循環相促進嘅新發展格局,係我哋黨對經濟發展客觀規律嘅正確把握同實踐運用。呢個主動作唔係被動應對,係長期戰略,唔係權宜之計。」
但有西方評論認為,習近平時代採取「戰狼外交」路線,加上喺武漢肺炎疫情期間被指隱瞞疫情,又打壓新疆同香港人權,台海、南海同釣魚台爭議升級,導致其它國家對中國產生反感情緒,外資企業亦因為中國反覆嘅對外政策同民族主義,喺對華投資上有所調整,「雙循環」將難以促進,最終只能向「國內大循環」發展。
This article uses material from the Wikipedia 粵語 article 經濟內循環, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). 呢度嘅所有文字係根據 CC BY-SA 4.0 牌照嘅條款發佈;可能會有附加嘅條款。 Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki 粵語 (DUHOCTRUNGQUOC.VN) is an independent company and has no affiliation with Wiki Foundation.