白牙市鎮: 湖南東安嘅鎮

白牙市鎮（粵拼：baak6 ngaa4 si5）係中國湖南永州東安中部嘅鎮，係東安嘅縣城，亦係全縣政治、經濟、文化中心。鎮府駐大衆路。白牙市面積182.19平方公里，人口3.32萬戶、共8.6萬人。

白牙市位於東安中部，東面係川岩、井頭圩，西南係紫溪市，西面係水嶺，西北係邵陽嘅新寧。白牙市嘅地形以溪谷平原、崗地爲主，地勢東南低、西北高，最高點秋風嶺，海拔806米。紫水河自西向東流過鎮區，接納龍溪河、官田小溪、松江後喺大江口注入湘江。境內有湘桂鐵路穿過，設有東安站，公路上有207國道經過。

白牙市嘅名源自呢個民間傳說，話秦漢時有一對寶白鴨飛到來龍溪河，之後佢哋入到去龍溪同大陽江（即紫水河）滙流嘅水岩度。當時啲人就用「白鴨」爲當地起名。元明時期，商業發展，當地形成咗個墟，於是叫做白鴨市（baak6 aap3 si5），後來啲人減筆，用同音字「牙」代替「鴨」（當地講西南官話，入聲派入陽平），地名變成咗白牙市。又有講法話因爲鎮墟喺白牙河度，所以噉叫。

1949年之後，呢度歸東安縣嘅第一區，1955年5月改叫白牙市區，1956年6月改爲白牙市鎮，1958年改爲白牙市鎮人民公社，1959年，因爲佢係縣城，叫做城關（sing4 gwaan1），改叫城關人民公社，1960年改爲城關鎮，1965年又恢復爲白牙市鎮人民公社。後來中國改革，改爲白牙市鎮。1985年4月，茶源鄉、都塘鄉全部併入白牙市，當年5月昇爲區級鎮。1995年撤區併鄉建鎮時，井頭圩同大江口劃入部分村畀白牙市。

2015年11月11號，大江口鄉併入白牙市，擴大後嘅白牙市仲繼續係東安縣城。

2016年設多一個社區：高新；呢年裁撤嘅行政村有31條：小力、陡坡、新屋、大塘、麥牙、倉頭、杳脚、蝦塘、十字路、了井塘、爐頭江、水口、井門口、煙竹、白牙甸、牌樓、小心田、大丘、周塘、小埠頭、文星、水井、楊家、鹿鳴、官田、小車、案塘、長壽、京口、彈夾、仁山。

白牙市轄8個社區、39條村。

• 社區：龍溪、前進、紫水、梨山口、山子嶺、茶亭、蒼子嶺、高新
• 村：柳溪、茶源、桐子山、蓮塘、湖塘、林角、都塘、鐵爐、秦塘、宥江橋、神仙橋、大江口、李家舖、六仕町、銀山、社塘、石溪河、蔡家、荷池、石門砥、紅星、幸福、雞井塘、龍溪源、山水、白牙市、小新田、大龍巖、文竹山、獨秀峰、工業新村、東城、永富、祥合、大江源、石登、宜新、大塘旺、銅鼓嶺