屎甲蟲

屎甲蟲
Scarabaeus viettei
物種分類
界 動物界 Animalia 門 節足動物門 Arthropoda 綱 昆蟲綱 Insecta 目 鞘翅目 Coleoptera 科 金甲蟲 Scarabaeidae

雖然話屎甲蟲最出名係會食屎，但佢哋（視乎物種）有陣時亦會食死屍。

喺外形上，屎甲蟲通常圓碌碌噉形，翼鞘短，令佢哋嘅腹部暴露咗出嚟，體長由 5 至 30 mm（0.2 至 1.2 in）不等；色水上，佢哋通常暗淡，尤其係以黑色好常見，不過有唔少屎甲蟲塊「外甲」會有金屬噉嘅光澤。

 

同第啲甲蟲一樣，屎甲蟲係行完全變態嘅，一世蟲分蛋、幼蟲、蛹同成蟲四個階段，

屎甲蟲喺生態系統當中擔當咗重要嘅角色，例如係有生態學家指出，屎甲蟲食屎會令生態系統裏面嘅屎量少咗，間接壓抑咗啲會喺屎入面生蛋嘅害蟲（例如係多種嘅烏蠅）嘅數量，對人嚟講好有益。

聖甲蟲

 

聖甲蟲（scarab）係古埃及成日用嘅一種符號，喺某啲人造物件上面描繪咗屎甲蟲嘅形象。

聖甲蟲呢種符號源自古埃及人嘅信仰：古埃及人相信，太陽神拉（古埃及文：rꜥ；成個古埃及信仰入面最重要嘅天神之一）每日都會負責推住太陽，令到太陽日出嗰陣就轆上天，到咗日落就轆返落山；佢哋又觀察到屎甲蟲會將啲屎搓做球體再轆返個竇度，覺得呢種行為有啲似太陽神拉；於是好多古埃及人就因而相信屎甲蟲有神力，所以會攞呢啲甲蟲嘅形象嚟造護身符等嘅物品，甚至雕埋聖甲蟲嘅形象落（例如）神殿嘅牆度。

• 兜蟲同鍬甲蟲，屎甲蟲嘅近親。
• 生物地球化學循環

• Nichols, E., Spector, S., Louzada, J., Larsen, T., Amezquita, S., Favila, M. E., & Network, T. S. R. (2008). Ecological functions and ecosystem services provided by Scarabaeinae dung beetles. Biological conservation, 141(6), 1461-1474.