寵物小精靈

開頭嗰陣，寵物小精靈係喺 Game Boy 度出嘅 RPG 遊戲（紅、綠）。遊戲嘅玩法係玩嗰個人扮演一個想做精靈訓練員大師嘅細路，喺隻遊戲入面嘅（架空）世界一路旅行一路捉路上撞到嘅唔同品種嘅精靈，跟手透過打交提升手持精靈嘅等級去同更加勁嘅對手打，最後稱霸成個地區。因為隻 Game 當時出乎意料咁好賣，話咁快寵物小精靈重出埋咭 Game、動畫、漫畫、戲、同好多種玩具，做埋風靡全世界嘅大熱系列。到咗今時今日，寵物小精靈嘅總值只係低過（都係任天堂出嘅）超級馬利奧系列少少，係歷史上第二好賣嘅遊戲系列。個系列喺 2016 年為咗慶祝廿週年，特登喺 Super Bowl 50 嗰度打廣告，出咗破格嘅 Pokémon GO 手機遊戲，同埋重新設計過隻遊戲嘅玩法。

目前出咗嘅 RPG 型寵物小精靈遊戲包括：紅、藍、黃、綠（第一代，出喺 Game Boy）、金、銀、水晶（第二代，Game Boy Color）、紅寶石、藍寶石、綠寶石、火紅、葉綠（第三代，Game Boy Advance）、鑽石、珍珠、白銀、心金、魂銀（第四代，NDS）、黑、白、黑２、白２（第五代，都係NDS）、X、Y、終結之紅寶石、始源之藍寶石（第六代，3DS）、太陽、月亮、究極之日、究極之月（第七代，都係 3DS）、Let's Go 比卡超、Let's Go 伊貝（第七代，Switch）、劍、盾、晶燦鑽石、明亮珍珠、傳說 阿爾宙斯（第八代，Switch）、朱同紫（第九代，Switch）。每隻遊戲個名都係象徵咗做佢封面嗰隻寵物小精靈（俗稱「封面神獸」）。除咗 RPG，呢個系列重出咗其他類型嘅遊戲，例如係喺手機度出，屬於擴張現實型嘅「Pokémon GO」。

初頭個系列入面有 151 個品種嘅寵物小精靈，佢哋每一種都有神奇力量：曉噴火、放電、飛天、鑽地、扭曲時空、控制亡魂呀咁。而且每出一代新遊戲都會出新嘅品種。直至而家（第九代），已經有成 1,008 個品種嘅寵物小精靈。

據講寵物小精靈嘅創作諗頭係嚟自昆蟲採集。田尻智細個嗰陣鍾意捉昆蟲，後來佢諗出嚟嘅呢個系列同昆蟲採集有幾個相似嘅地方：

1. 玩嗰個人嘅目標包括採集嗮全部嘅目標生物（分別指昆蟲同寵物小精靈）；
2. 飼養同照顧自己捉咗嗰啲生物；
3. 訓練自己手持嘅生物去同其他玩家嘅生物打交（捉昆蟲嘅人好多時會攞自己嘅公甲蟲嚟同同好嘅公甲蟲摔角）。

收集、育成、同戰鬥基本上就係寵物小精靈遊戲嘅全部。呢三個主題喺遊戲以外嘅寵物小精靈產品都睇得到。例如寵物小精靈動漫就成日都強調做主角嗰個訓練員用愛心嚟養育自己嘅精靈，用友情嘅力量令佢哋變得更加強大。

精靈球同捉精靈

 

喺寵物小精靈系列嘅架空世界入面，人類用佢哋嘅先進科技發明咗一種叫「精靈球」嘅架生。精靈球一般都係得手掌咁大（雖然喺唔同嘅動漫系列入面，精靈球嘅大細唔多一致），但係就連身長五米以上嘅精靈都裝得落。一般精靈訓練員想捉一隻野生精靈嗰陣都會將個精靈球掟向隻精靈度，個波會將隻精靈吸入去。如果嗰隻精靈掙脫唔到個波，咁佢就會變成屬於嗰個訓練員嘅。訓練員通常都會將佢哋嘅手持精靈放喺自己嘅精靈球入面隨身帶住，要打交或者用隻精靈做啲咩嘢嗰陣（好似係個訓練員想隻精靈孭佢游水過河）就會掟個精靈球嚟放隻精靈出嚟。但係精靈就算畀人捉住咗都唔一定會聽主人話，喺遊戲同動漫入面間唔中就見到有精靈因為某啲原因（好似係唔老黎佢個主人）而唔聽主人嘅命令。

育成同進化

當戰鬥經驗累積到咁上下或者係達到某啲條件，寵物小精靈重會學識新嘅技能，甚至「進化」做更加好打嘅品種 － 雖然呢個系列裏面嗰啲所謂嘅「進化」講實就似昆蟲嘅「變態」多啲 － 係隻精靈嘅身體突然間好快咁變做新嘅形態。但係可能因為 Game Freak 覺得「變態」又可以解做「咸濕佬」，唔好聽，所以唔咁嗌。

冒險同戰鬥

照遊戲同動漫嚟睇嘅話，寵物小精靈嘅世界分做好多個唔同嘅「地區」。好多細路喺十零歲嗰陣就會有人送隻精靈畀佢哋，等佢哋有能力喺自己嘅地區度旅行同做訓練員。遊戲同動漫嘅主角多數都係咁。個區入面有好多野生精靈畀佢哋捉，重有好多其他訓練員會同佢哋比拼。多數地區都有叫做「道館首領」（日文：ジムリーダー；發音：Jimuriidaa）同「四天王」（日文平假名：してんのう；發音：Shitennou）嘅訓練員。道館首領似乎係主要負責教打交嘅技巧同提高區入面嘅訓練員嘅水平，而四天王基本上就係區入面嘅訓練員嘅精英。佢哋都明顯好打過一般嘅訓練員好多。遊戲同動漫嘅主角都會挑戰呢啲強手嚟提升自己嘅水平（同埋過關）。通常砌低咗四天王就可以挑戰喺嗰個區入面無人能敵嘅最強訓練員 － 總冠軍（日文：リーグ優勝者；發音：Riigu yuushousha）。打嬴咗就順理成章變做新嘅總冠軍。

精靈圖鑑

遊戲同動漫嘅主角多數都會喺佢哋旅程開始嗰陣撞到研究寵物小精靈嘅博士。呢啲博士會送一樣叫做「精靈圖鑑」（日文：ポケモンずかん；發音：Pokemon zukan）嘅架生畀主角。呢件架生會自動咁紀錄個主角撞過同捉過嘅精靈，重會話畀主角知呢啲品種嘅習性同出沒地點之類嘅資料，係對訓練員嚟講好重要嘅工具。

寵物小精靈系列可以清楚咁分做唔同嘅「世代」。每出一個新世代都會有新品種嘅精靈推出同埋一柞新機能。

第一代

初代寵物小精靈，總共有 151 個品種嘅精靈。遊戲嘅玩法 － 能力值、招式、捕捉 － 基本有咗個樣。但係因為重係早期，遊戲嘅設計唔係好成熟，有好多地方有錯：例如鬼魂系嘅攻擊原本係應該剋制超能力系嘅精靈，但寫程式嗰陣整錯咗，搞到鬼魂系嘅攻擊反而變咗對超能力系嘅精靈冇效。隻遊戲亦有唔平衡嘅問題，好多精靈同招式太勁，例如超夢夢（#150）喺嗰時可以話係無敵咁滯。

後嚟寵物小精靈遊戲人氣好高，跟手重出埋動畫（都好有人氣）。而第一代出嘅遊戲「寵物小精靈黃」主角嘅主力精靈係比卡超，响應咗動畫主角小智同佢嘅拍檔比卡超。

第二代

出多咗 100 個品種嘅寵物小精靈，令總數變做 251 個。多咗惡系同鋼系兩個新屬性、新招式，同埋精靈配種等等。

第三代

出多咗 135 個新品種，令總數升到去 386 個品種。加咗新招式，特性，同埋寵物小精靈華麗大賽。

第四代

出多咗 107 個新品種，總數升到去 493 個。佢亦係寵物小精靈主線遊戲史上第一次有 3D 效果嘅。

第五代

出多咗 156 個新品種，總數升到去 649 個。寵物小精靈主線遊戲史上第一次個主角冒險嘅地區唔係用日本做板嘅。前四代嘅冒險地區嘅設計都係用日本嘅某個地方做板：第一代嘅「關都」地區藍本係日本嘅關東，第二代嘅「城都」地區係日本嘅關西，第三代嘅「豐緣」係九州，而第四代嘅「神奧」係北海道。反而喺第五代主角嘅冒險地區係「合眾」（日文：イッシュ地方；日語發音：Isshu chihou）地區 － 佢嘅設計係用美國紐約市做板嘅。

第六代

又出多咗 72 個新品種，令到品種總數升到去 721 個。主要嘅新亮點係「超進化」（日文：メガ進化；日語發音：Mega shinka） － 精靈同佢哋嘅訓練員透過同彼此嘅連繫令隻精靈喺戰門途中暫時變做超強嘅形態。冒險地區「卡洛斯」（日文：カロス地方；日語發音：Karosu chihou）嘅設計藍本係法國。

第七代

出多咗 81 個新品種，總數去到 802 個。新嘅冒險地方係「阿羅拉」（日文：アローラ地方；發音：Arola chihou），設計藍本係夏威夷。呢一代最多人留意嘅係佢為咗慶祝二十週年，改咗主線遊戲個格局：由（畀人話咗好耐）重複性嘅「開始旅程，挑戰八個道館首領，跟手挑戰四天王同總冠軍」變做「完成各島嘅考驗同收集 Z 石」。好多擁躉都覺得呢一代遊戲嘅故仔比以前嘅更加有深度。

第八代

小精靈總數去到 898 種。舞台係伽勒爾地區，島嶼以英國嘅英格蘭同威爾斯做原型。今次廢除咗前作嘅Z招式同之前嘅MEGA進化，但就加入咗極巨化。

 

寵物小精靈系列一路都係用遊戲做重心。但係佢人氣咁高，就自然會出其他嘅產品。呢啲產品包括咗動畫（好多，冇辦法喺度列嗮出尼）、戲（由 1998 年嘅「超夢夢反擊戰」起每年都會出一套）、音樂 CD 、咭 Game、同埋好多套漫畫（當中「寵物小精靈特別篇」好受歡迎，全世界都有得賣），令到個系列喺好多個媒體度出現。

呢個系列喺香港同澳門本來叫做寵物小精靈，喺臺灣叫做神奇寶貝（粵拼：San⁴ kei⁴ bou² bui³），喺中國大陸叫口袋怪獸（粵拼：Hau² doi⁶ gwaai³ sau³），但係喺 2016 年株式會社將大中華地區嘅譯名統一做「精靈寶可夢」，令到大眾好大爭議，唔少人批評佢「以普代粵」，係語言入侵，唔尊重廣東話。

宗教批評

有一啲嘅基督徒批評寵物小精靈系列，話佢宣揚巫術（好多精靈有超能力，甚至話係由鬼魂變出嚟）、暴力（因為寵物小精靈成日都打交）、同進化，全部都係違背咗聖經嘅原則。但係都有基督徒反駁，好似係意大利嘅天主教電視台 Sat2000 就話寵物小精靈系列充滿咗想像力同對道德冇乜唔好嘅影響。

動物權益

動物權益組織 PETA 批評「捉野生精靈同叫佢哋去打交」呢個基本格局就好似鬥雞同馬戲團呢啲迫動物做危險嘢嘅活動，所以係變相鼓吹虐待動物。

種族主義

其中一個寵物小精靈品種－紅唇娃（#124）－第一代嗰陣喺設計上面有黑色皮膚，加上佢個樣（特登畫到）好衰，搞到有啲人話佢呢個設計係針對黑人嘅種族主義。後嚟為咗平息成件事，Game Freak 由「寵物小精靈水晶」開始將紅唇娃嘅皮膚改做深紫色。

Pokémon GO

 

喺 2016 年出嘅 Pokémon GO 手機遊戲嘅玩法係玩嗰個人喺現實世界入面揾同捉寵物小精靈。（虛擬嘅）精靈會喺現實世界嘅位置度走嚟走去。玩嘅人有得通過自己部手機睇到佢哋同向佢哋掟精靈球，就好似真係捉緊精靈咁。但係有啲玩家為咗捉精靈行咗入去啲唔應該入去嘅地方，又或者係掛住玩出咗意外（尤其係揸緊車嗰陣）。亦都有一次喺一間納粹德國猶太人大屠殺嘅博物館度出現咗一隻毒氣丸（#109，出名放毒氣嘅精靈），令到博物館嘅人好唔爽（納粹主義者喺集中營度就係用毒氣嚟處死猶太人嘅）。

寵物小精靈一般都畀人覺得佢係畀細路仔（尤其係男仔）玩嘅嘢，但係終結之紅寶石同始源之藍寶石呢兩隻 2014 年出嘅遊戲，幫襯嘅人就好多都係廿零三廿歲嘅麻甩佬。目前，呢個系列嘅擁躉有好多都係喺九十年代出世，由細玩寵物小精靈玩到大嘅人。

呢個系列人氣高到有班發燒友為佢整咗一個好似維基咁嘅百科全書網站，叫 Bulbapedia（直譯：奇異種子百科全書）同埋神奇寶貝百科，收錄咗有關呢個系列嘅詳盡資料。

另外，有好多大人擁躉都發覺寵物小精靈戰鬥嘅策略性其實好豐富，所以有啲網站專門分析寵物小精靈戰鬥嘅策略，當中 Smogon University 最出名。網上重有一個叫 Pokemon Showdown 嘅戰鬥模擬器，畀玩家模擬寵物小精靈戰鬥同網友打。

• 寵物小精靈一覽
• Pokémon GO
• 昆蟲搜集