十六浦米高積遜珍品廊

身兼實德環球副主席嘅澳門十六浦度假村行政副總裁馬浩文響2009年11月喺朱利安拍賣行買咗米高積臣響1983年唱片公司Motown嘅25週年電視特輯演出嗰陣戴嘅萊茵水晶石手套同米高積臣親筆簽名《Bad》嘅美國唱片業協會白金唱片獎等等嘅合共10件遺物；當時，呢尐拍賣品連同響其他拍賣會上面買到嘅米高積臣遺物，計劃擺響澳門十六浦度假村嘅一個珍品廊，向外展出。

十六浦米高積遜珍品廊響2010年2月頭由澳門社會文化司司長張裕、澳門旅遊局局長安棟樑、澳門十六浦度假村主席蘇樹輝等等主持開幕儀式，成為亞洲區第一個、全球第二個以米高·積遜為主題嘅永久展覽場所；喺開幕當日，有一隻模仿萊茵水晶石手套嘅手套送咗畀參觀人土。

十六浦米高積遜珍品廊喺同一個月18號搞咗個拍賣試戴白色萊茵水晶石手套嘅機會嘅慈善活動，由伯明翰環球控股主席楊家誠以10萬港元投得。十六浦米高積遜珍品廊又響同一年嘅9月至到10月聯同新世界百貨，響北京、上海等等嘅五個城市主辦《巨星珍品中國巡迴展》，又借出白色萊茵水晶石手套做展覽。

十六浦米高積遜珍品廊嘅面積超過4,000平方米，場館可以響一個鐘容納大約200人；珍品廊主要分為四個部分，分別係時光隧道、主要展覽區、Billie Jean佈景同埋十六浦禮品廊。