2023年臺灣#MeToo運動係2023年5月開始,喺台灣揭發出一連串性騷擾事件嘅浪潮,源起自民主進步黨接連爆出黨內性騷擾,唔同事件橫跨2018去到2023年,而且受害人投訴嘅時候,未有得到應有嘅處理,總統蔡英文同黨主席賴清德更加要出面道歉,同埋民進黨內部嘅性別平等機制。後來風波唔再局限喺民進黨內部,並且開始向其他政黨,例如國民黨、民眾黨、時代力量、台灣基進蔓延,到後期更加伸延到去校園、娛樂圈入面,好多藝人都受到波及,形成咗一場#MeToo嘅公民運動。
2023年5月31日,有民進黨前黨工喺Facebook度指控,話自己喺2022年9月工作期間受到承攬黨部工作之廠商名導「輝哥」薛朝輝性騷擾,而當時擔任民進黨婦女部主任嘅民進黨副秘書長許嘉恬冇提供適當嘅幫助,令佢感到二次受傷。該黨工指出,許嘉恬要佢詳細講述受性騷擾嘅細節,要佢回憶過去嘅情況,但得到許嘉恬冷冷嘅回應,甚至質疑佢點解當時唔跳離?點解唔叫人幫忙?,仲建議佢「去華山大草坪手牽手一齊練習大聲喊叫」。而且,佢原本可以由民進黨黨部支付嘅身心就診費用,受害人一條資訊都冇收到。令佢好失望,最終選擇離開民進黨。
去到6月2號,又一位民進黨嘅女性前黨工,以「讓我為自己勇敢一次」為題,喺Facebook度公開自己嘅遭遇,話除咗遭到部門同仁陳右豪性騷擾,仲遭到上司同事嘅職場霸凌。佢唔止係直接指名加害者,仲直指當時嘅青年部主任同前勞動部政務次長機要蔡沐霖,話蔡反過嚟檢討佢。之後蔡就喺工作群度經常對佢冷嘲熱諷,甚至用污言穢語侮辱佢,佢當時甚至因為呢啲事患上憂鬱症,要食身心科藥物先可以繼續生活。因為受到好多次嘅言語同行為霸凌,最終令佢決定辭職返屋企靜養。然而喺交接工作嘅時候,受害者竟然喺黨中央10樓暈咗過去。佢話自己暈咗過嘅事情令民進黨高層有所察覺,但之後就冇再有任何追進嘅動靜。
曾任青年發展部主任嘅民進黨台北市議員何孟樺6月2號開記者會爆出仲有第三個案件,喺2018年佢做青年部主任嘅時候發生嘅,佢嘅同事遭受當時嘅組織部政務副主任林男固寫情書同半夜打電話騷擾。當時佢想報告處理,但發現黨最後調查要呈報俾中常會,令當事人可能面對媒體曝光嘅情況,令同事唔想處理。喺向當事人徵詢意願之後,佢表示唔想喺傳媒上曝光,所以冇啟動調查機制。不過,何亦呼籲黨應該全面檢討而家嘅通報機制。
6月2號,又有一名受害女仔出黎揭發,佢喺2019年去咗民進黨青年部做工,結果遭遇到職場性騷擾,之後證實係患上創傷後遺症。
6月2號,又傳出第五宗性騷案,有人指控蔡沐霖無視女性黨工嘅意願,強行「十指緊扣」,不過蔡沐霖透過律師發表聲明否認,強調會透過司法手段捍衛自己的清白。
This article uses material from the Wikipedia 粵語 article 2023年臺灣MeToo運動, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). 呢度嘅所有文字係根據 CC BY-SA 4.0 牌照嘅條款發佈;可能會有附加嘅條款。 Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki 粵語 (DUHOCTRUNGQUOC.VN) is an independent company and has no affiliation with Wiki Foundation.