魷魚(韓文:오징어),係韓國嘅一種細路遊戲。主要流行喺20世紀70至80年代初韓國嘅細路仔之間,遊戲場地主要喺兒童遊樂場、學校操場或鄰近嘅巷仔。
隨住土地被石矢覆蓋同發展,遊戲空間消失,導致遊戲逐漸式微,魷魚遊戲喺1980年代之後已經唔再喺細路之間流行。
遊戲之所以有噉嘅名,係因為遊戲場地上面嘅圖案由圓形、三角形同正方形組成,形狀好似魷魚噉。呢個遊戲名存在地區差異,例如又叫做「魷魚蓋桑」(오징어 가이상)。有部分人堅持認為「蓋桑」係日文「開戰」(日文:開戦/かいせん kaisen)嘅變體,係朝鮮日治時期遺留落嚟嘅詞彙,但係呢個詞冇喺時代轉變時畀人清洗,而家已經喺某種程度上融入韓國民俗。
佢係一款多人遊戲,可以由3至10個人玩,最多可以容納20個人,玩家用猜包剪揼分為攻守兩隊。遊戲主要有兩個獲勝方式,一個係攻擊者抵達目的地,另一個係殲滅對方所有成員。攻守兩隊嘅主場稱為「屋」。最上面嘅圓圈係進攻隊嘅屋,而底部嘅長方形係防守隊嘅屋。呢個遊戲通常係進攻方佔優勢,而對防守方不利。
攻方喺1區、4區外嘅圓形區、3區門外可以用雙腳嚟行,喺其他地區必須單腳跳。4區係一條河,一旦攻方以單腳跳過河,就可以改為雙腳行。
守方喺1區、3區、3區嘅門、4區外嘅圓形區可以雙腳行,但如果跳咗出道門,就必須單腳跳噉同攻方對抗。
攻方獲勝有兩種方式,第一種係將守方玩家全部淘汰,第二種係有其中一個攻方玩家成功到達2區。
守方獲勝嘅方式係唔好俾任何一個攻方玩家成功抵達2區,並且將全部攻方玩家淘汰。
2021年Netflix電視連續劇《魷魚遊戲》嘅標題就係嚟自劇裏面嘅魷魚遊戲,第一集開頭提個呢個遊戲,最後一集以呢個遊戲嚟定出最後贏家。喺電視劇《魷魚遊戲》風靡全球嘅浪潮之下,魷魚遊戲重新開始流行起嚟。
This article uses material from the Wikipedia 粵語 article 魷魚 (遊戲), which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). 呢度嘅所有文字係根據 CC BY-SA 4.0 牌照嘅條款發佈;可能會有附加嘅條款。 Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki 粵語 (DUHOCTRUNGQUOC.VN) is an independent company and has no affiliation with Wiki Foundation.