金文泰: 英國殖民地官員

金文泰一八七五年九月一號出世，生喺印度北方邦嘅坎普爾。佢亞爸孟塔古•金文泰上校（Colonel Montagu Clementi，1839年—1919年），任職當地軍法署長，亞媽伊莎貝拉•科拉爾（Isabel Collard，1850年—1930年）。史密士爵士（Sir Cecil Clementi Smith，1840年—1916年）係佢舅父，而史密士爵士亦係殖民地官員，曾經喺1887年至1893年擔任海峽殖民地總督；另外佢太爺係出名音樂家穆齊奧·金文泰（Muzio Clementi，1752年—1832年），以彈鋼琴技術精湛而出名，亦係第一位真正創作鋼琴奏鳴曲嘅作曲家。雖然喺印度出世，但係金文泰去返英國讀書。金文泰早年喺倫敦嘅聖保祿公學讀書，後來升讀牛津大學莫德林學院。

讀大學嗰陣，金文泰修讀咗古典文學同梵文，表現出眾。一八九五年，佢攞到赫特福德獎學金，第二年首次古典文學考試，攞到一級榮譽，重分別贏到愛爾蘭獎學金同克雷文獎學金。一八九七年，金文泰攞埋博登梵文獎學金，重差啲贏埋蓋斯福德希臘散文獎。一八九八年，佢又喺人文學科入面攞到咗二級榮譽，重同時攞到文學士資格。冇幾耐，一八九九年，金文泰參加校監拉丁文散文比賽，之不過攞唔到第一。一九零一年，金文泰又攞到文學碩士資格。另外，佢又曾經獲授半院士獎學金（demyship），呢個獎學金係莫德林學院獨有，而所有得獎者都係呢個院嘅頂尖學生。

殖民地生涯

金文泰學術極有成就，然而志不在留喺大學做學者。一八九九年攞咗學士學位之後，佢即刻考公務員試，排第四。咁嘅成績，佢有得揀去邊度。金文泰喺英國本土、印度或者各個大英帝國殖民地之中，佢揀咗去香港。以金文泰呢類咁卓越嘅學生，揀去香港做嘢，極之罕見。當時社會普遍睇法，去殖民地部東方司做嘢，比起其他工作，地位低人一等。

一八九九年，香港殖民地政府聘請金文泰做官學生，無耐嚟到香港。抵港後，金文泰即刻獲安排去大清廣東省城學粵語，但第二年大清爆發庚子事變，響一九零零年七月被迫返香港。雖然返咗香港，但金文泰仍然好快學識粵語，同年過到考試呢關，重喺一九零二年擔任中文考官。憑住佢嘅語言天份，響四年後過埋官話試。

一九零一年，金文泰獲任為助理總登記官。一八九九年，英國接管新界。當時輔政司駱克爵士，派去協助登記人口。一九零二年，佢借調到印度政府，執行特別任務。同年佢獲任太平紳士。一九零三年，金文泰又調去廣西一陣，救濟飢荒。年中冇耐又調返香港，去田土廳出任助理田土註冊處處長兼巡理府，登記土地。一九零七年，佢改任助理輔政司兼立法局執行秘書，一九零九年，佢去咗上海出席國際鴉片會議。一九一零年，當時護督梅含理爵士，任命佢做私人秘書。又無耐，一九一一年到一九一二年，升任署理輔政司，並且同時兼任行政立法兩局嘅議員。

香港公職期間，金文泰嘅才華同辦事能力，深得上司賞識。港督卜力爵士形容佢係殖民地部「東方司至有才幹嘅人，身兼思想家同學者，他日必有所成」。另一位港督盧吉爵士亦讚金文泰才華洋溢，富有同情心，而且喺香港大學成立嗰陣，提名佢出任創校校長，但係到最後冇成事。此外，金文泰喺香港嗰陣極力支持成立香港大學。一九一二年大學正式成立，佢親身撰寫拉丁文校歌，捐贈大批重要中國典籍，着力為大學嘅中英文化關係研究籌款。大學校方為咗多謝佢，一九一六年時建議向金文泰頒授榮譽博士學位，但係由於當時金文泰身在他方，一等就去一九二五年，即係金文泰返港出任港督之後，大學先頒贈到榮譽學位畀佢。

 

一九一三年，金文泰派咗去英屬圭亞那出任輔政司，任內三次署任總督。一九二二年，金文泰又改調錫蘭，出任輔政司，任內署任總督一次。一九二五年，孫文聯俄容共，所轄廣州政府，喺香港同廣州發動省港大罷工，其時港督司徒拔爵士態度強硬，對工人唔肯讓步，結果畀英國政府撤換。英國方面睇中金文泰通曉唐人文化，兼同中國一向友善，於是倫敦政府委任佢做第十七任香港總督，緩和省港局勢。金文泰喺一九二五年十一月一號抵港，正式上任港督，而佢亦係史上第二位本地官學生出身嘅港督，相當於今日政務主任。另外金文泰揀喺皇后碼頭登岸，自此以後，港督履新，以此成慣例。

當時署理港督施勳爵士，得知金文泰出任港督，好唔滿意，好驚訝。施勳爵士出任香港輔政司十五年，就算金文泰好有才華，按理都應該輪到自己擔任。故此，金文泰上任後，施勳爵士亦冇留喺政府。

香港總督

緩解工潮

一九二五年十一月一號金文泰上任嗰陣，省港大罷工高潮已過。孫文喺廣州成立中華民國國民政府，一般叫佢做廣州政府。政府聯俄容共，同中華民國北洋政府打對臺。而大罷工就係廣州政府策劃。孫文一九二五年三月逝世以後，由容共嘅汪兆銘主理。佢首先派輔政司去廣州傾點樣解決罷工。冇耐，佢邀請國民黨要員宋子文訪港。連串訪問中，雖然金文泰同港府從無讓步，但係就對國民政府態度開放，令到兩者關係逐步修補。金文泰一直認為，「要維繫香港安寧，就有必要同國民政府保持良好關係」，因為咁佢一上任就諗辦法修補關係。得到羅旭龢同周壽臣爵士呢啲本地華人社會領袖支持之下，金文泰努力令政府取得輿論認同。其中，政府向羅旭龢發放津貼，喺香港發行報紙反共，等香港政府同國民黨嘅右翼企喺同一陣線。

一九二六年三月廣州政變，蔣介石掌權，國民黨由佢控制，解除罷工武裝，大罷工亦日見舒緩。因爲蔣氏唔再信任共產黨人士，大罷工就失政府支持。另一方面，佢又籌謀一統中國，計劃北伐，尋求外國支持，省港關係亦有轉機。是年十月十號，國民政府正式解除對香港嘅封鎖，並且解散罷工委員會，結束咗持續咗好耐嘅省港大罷工。一九二八年三月，金文泰又代表英國政府，到廣州訪問，期間正式承認咗國民政府政權，令到兩地外交關係修復返晒。

大罷工結束以後，金文泰大幅改善勞工同工廠法例，而且限制聘用童工。此外，佢重新規劃市區嘅貧民區，改善貧民嘅生活。省港大罷工一度令到香港經濟大受打擊，不過無耐恢復返轉口貿易，香港一九二七年出口船隻嘅總噸位數，直逼一九二四年罷工之前，重不斷上升。政府收入，亦屢創新高，年年收益維持喺二千萬港元以上。

妹仔問題

總督司徒拔爵士留低妹仔問題，等金文泰解決。妹仔問題，曾一度平息。但喺金文泰任內，英國人再關注妹仔問題。當時英國保守黨執政，而英國工黨在野。下議院入便，工黨議員愛倫威爾金森（Ellen Wilkinson），要求殖民地大臣里奧•艾默里，重新審視香港政府嘅妹仔政策。因此，金文泰亦要向英國建議，點解決呢個問題。

同佢前任一樣，金文泰認為妹仔係中國傳統，妹仔往往會淪為妓女嘅講法，難以苟同。因為咁，金文泰向英國提議，將妹仔改稱「養女」就算。但係建議送出冇耐，工黨一九二九年大選勝出，上台掌政，而新任殖民地大臣帕斯菲爾德勳爵（Lord Passfield）重係費邊社成員，結果金文泰嘅建議，不爲大臣所納。大臣促請金文泰，盡早廢除妹仔制度。喺呢種情況下，金文泰唯有立例，規範妹仔嘅工作性質。另外，又唔情願咁叫全港四千名妹仔登記。不過，雖然咁，廢除妹仔都係冇乜進展，金文泰呢任內都未成事。

社會發展

金文泰積極發展公共建設。醫療衛生方面，就好似之前咁講，佢除咗落力重建貧民區，改善衛生情況之外，重起咗九龍醫院。另外又計劃瑪麗醫院，設喺薄扶林，以大醫院去應付需求日增嘅醫療服務。此外，金文泰又喺一九二九年成立醫務衛生署，着手消除區入面嘅風土傳染病，連舊日橫行香港嘅鼠疫，都喺佢任內絕跡，而瘧疾呢類常見熱帶傳染病，亦得以控制。

至於食水方面，雖然金文泰任內着手擴建城門水塘，但係香港喺一九二九年大旱。當年四月開始，金文泰實施七級制水，日日只供水兩個鐘。天旱嘅情況，一直到九月先好返少少。嗰陣，港府成立食水供應委員會，諗辦法節制用水，重由內地調食水嚟解決水荒。但係嗰陣時仍然咁缺食水，結果搞到成廿萬名居民，走返中國避旱。事後，金文泰建議用海底水管輸水。一九三零年，全港首條海底水管落成，食水供應緊張，等以解決。

交通方面，金文泰好重視航空交通，認爲有得發展。一九二八年，政府接辦九龍嘅機場，原地係何啟爵士同區德持有嘅啟德濱，因而名爲啟德機場。同時，駐紮喺啟德機場嘅皇家空軍，年年亦得到定額津貼，只要到空軍所屬嘅飛行會，就有得拎。另外，海港局長，亦兼任民航處長，航空交通，亦有政府管理。

金文泰任內最為人津津樂道嘅事，就係中意唐文唐字，亦愛唐人文化，因而極力推動香港唐文教育。一九二七年，香港大學設中文系，重用大清遺老賴際熙同區大典等嘅翰林教授經典。但係，由於嗰陣時新文化運動乃係中國大陸嘅主流思想，結果港大設立中文系，畀魯迅一類反對傳統文化嘅學者抨擊。此外，一九二六年三月一號，金文泰成立唐文爲主嘅官立學校，卽係官立漢文中學，搵咗漢文視學官兼任校長。一九二八年，金文泰頒布《中小學漢文課程標準》，規定香港嘅漢文學校，同國民政府採用相同，都係六三三學制，等漢文學校學生，都夾到中國學校嘅課程。

新界事務

金文泰早年長期喺新界做嘢，所以同新界居民嘅關係，好過好多總督。喺佢上任一個月之後，金文泰就即刻訪問新界，當地居民熱烈歡迎。一九二六年，金文泰廢除新界地區唔合理嘅補地價政策，喺同年九月一號，新界鄉紳罕有咁為港督祝壽。佢哋除咗喺大埔舉行盛大壽宴外，鄉議局又特登呈上《金文泰制軍五一賀壽序文》，以作紀念。

另一方面，金文泰任內亦致力將新界改成永久割讓畀英國。一九二六年一月，即係省港大罷工期間，佢向殖民地部話要保住新界。其後一九二七年，金文泰趁國民政府北伐嗰陣，希望將新界轉爲永租地，但係嗰陣時嘅英國駐華大使藍浦生爵士，擔心咁做會激起中國反殖民主義情緒，因而拒絕。到咗一九三零年，英國交還威海衛租借地，金文泰亦即刻向倫敦建議，英方應借機會延長新界，但係建議始終不爲所納。新界租約始終冇法任內延長，金文泰好失望。

政治革新

政治改革上，金文泰革新兩局。一九二六年，佢委任立法局非官守議員周壽臣爵士，兼任行政局非官守議員，以補遮打爵士逝世後懸空嘅席位。周壽臣爵士，係香港史上，首位華人行政局議員，但係實際上，建議周壽臣爵士入行政局，英延極力反對。嗰時嘅外務大臣奧斯汀•張伯倫爵士同殖民地大臣里奧•艾默里都認為，如果周壽臣爵士入局，有可能會洩漏機密，但係金文泰就反駁，歐籍議員都可能泄密，而行政局甚少講到機密。最尾，英廷批准建議，但係喺周壽臣爵士入局嗰陣，英廷又同時規定，行政局議員以後都唔可以掂到機密文件。

立法局方面，金文泰任內亦逐步增加唔同代表。一九二七年，金文泰委任布力架做立法局非官守議員，葡籍人士第首次喺立法局有代表議席。一九二九年，金文泰委任華人曹善允為立法局非官守議員，令九龍有首個代表。綜合嚟講，一九二九年嗰陣，立法局嘅官守議員人數加咗兩名，而非官守議員，由六名加到八名，當中三名係華人，分別係周壽臣、羅旭龢同曹善允。雖然人數有所增加，但係總督仍然有定奪之權。

一九二九年，嗰時嘅海峽殖民地總督克里福爵士突然因病提早退休，金文泰就臨時喺同年十一月廿號，獲任接替克里福爵士。金文泰跟住喺一九三零年二月一號，唔情願咁離開香港，結束佢短暫，但係評價唔錯嘅任期。

海峽殖民地總督

 

做三洲府總督嗰陣，金文泰做咗唔少有遠見嘅改革。有鑑於馬來亞政府權力過份集中，加上海峽殖民地總督又身兼馬來亞高級專員，咁令到金文泰工作非常繁重。因為咁，金文泰盡可能咁下放唔少屬於中央嘅權力畀地方，以助地方施政靈活。另一方面，金文泰又積極咁畀本土人士擔任殖民地政府嘅行政工作，同時又好推廣馬來西亞文化同馬來語，重將呢樣嘢編入當地嘅教育課程入面。但係，金文泰嘅革新就得唔到當地嘅本土人同華人嘅支持，結果促使佢要對改革做出妥協。由於阻力太大，上述嘅改革始終冇法喺任內順利完成。

至於公共建設方面，金文泰任內曾經提出要喺星架坡起一座「世界最大、最好、同最重要嘅機場」，取代唔夠使嘅實里達機場。金文泰嘅建議，促使興建加冷機場，最終喺一九三七年啟用，即係金文泰卸任之後。呢座機場，譽為「大英帝國最好嘅機場」，喺一九五五年巴耶利峇機場落成之前，一直係區入面最重要嘅機場。此外，金文泰又喺一九三三年主持咗新加坡嘅 克里福碼頭（Clifford Pier）開幕儀式，但係由於新碼頭棄用舊名「莊士敦碼頭」，結果開幕禮遭到部份商人杯葛。

晚年

星架坡公職期間，金文泰患咗糖尿病，結果促使佢喺一九三四年十月十八號英國休假嗰陣，宣佈提早退休。退休後嘅金文泰定居英國，主力寫作同學術研究。另外一九四零年到一九四一年間，佢出任綢布商人同業公會主席（Master of Mercers' Company）。晚年嘅金文泰住喺白金漢郡海威科姆（High Wycombe）附近嘅霍爾默閣（Holmer Court）。一九四七年四月五號，佢心臟衰竭死喺嗰度，終年七十一歲，遺體火化之後，安葬喺白金漢郡嘅潘街教堂（Penn Street Church）。

一九四七年九月九號估值，有遺產三千九百八十三英鎊十九仙令兩便士。

 

金文泰係皇家亞洲學會會員，鍾愛唐人文化，除咗熟習廣東話同官話之外，又通曉唐文詩詞，而且曾經翻譯《粵謳》（Cantonese Love Songs）等書。此外，金文泰好叻書法，家陣香港青山禪院入面，有個「香海名山」牌坊，就係金文泰兩次訪問青山禪院之後題嘅。另外，金文泰又鍾愛歷史，寫過《華人在英屬圭亞那》同埋《英屬圭亞那憲制歷史》等書，呢啲書到而家都好學術價值。金文泰係少有嘅學者總督，佢嘅學術詣藝備受景仰，當中，知名詩人泰戈爾喺訪問香港嗰陣，甚至讚金文泰係「我喺東方遇過最有修養嘅歐洲人」。

除咗文藝，金文泰夫婦鍾意四圍遊。佢哋去過晒中國咁多個省，又深入過印度等地，重寫咗多本旅遊書。皇家地理學會表彰佢貢獻，一九一二年頒贈卡思伯特皮克獎（Cuthbert Peek Award），以作紀念。至於香港，金文泰夫婦亦遊歷各處郊野，而家新界唔少山徑，最先都係由佢哋開辟返嚟。

金文泰嘅老婆叫佩內洛普•露絲•科博德•艾爾斯，MBE（Penelope Rose Cobbold Eyres，1889年—1970年），係海軍上將C•J•艾爾斯（Admiral C. J. Eyres）個女。金文泰夫人最初因為亞爸派駐香港，而住喺香港，期間識咗金文泰。一九一二年四月十六號，兩人喺香港結婚。

金文泰夫婦關係非常好，金文泰夫人亦一直全力支持金文泰嘅工作。金文泰夫婦有一個仔兩個女，個仔克雷斯韋爾•金文泰（Cresswell Clementi，1918年—1981年）曾經喺皇家空軍做空軍少將。至於克雷斯韋爾個仔、金文泰個孫大衛•金文泰爵士（Sir David Clementi，1949年2月25號—）就係英國保誠保險嘅主席。

• 金文泰爵士著作：
  • Cantonese Love Songs
  • Notes on a journey recently undertaken through the interior of China，一九零二年
  • Pervigilium Veneris，一九一一年
  • Summary of Geographical Observations taken during a journey from Kashgar to Kowloon (1907-8)，Hongkong：Noronha，一九一一年
  • Bibliographical and Other Studies on the Pervigilium Veneris，Oxford: B. H. Blackwell or London: Humphrey Milford，一九一三年
  • The Chinese in British Guiana，Georgetown：Argosy，一九一五年
  • Elements in Analysis of Thought，B. Blackwell，一九三三年
  • A Constitutional History of British Guiana，London：Macmillan，一九三七年

• 金夫人著作：
  • Through British Guiana To The Summit Of Roraima，T. Fischer Unwin，一九二零年

殊榮

• M.A. （一九零一年）
• J.P. （一九零二年）
• C.M.G. （一九一六年）
• K.C.M.G. （一九二六年）
• K.St.J. （一九二六年）
• G.C.M.G. （一九三一年）
• F.R.G.S.
• M.R.A.S.

榮譽學位

• 香港大學名譽法學博士（1926年）
• 牛津大學莫德林學院榮譽院士（1938年）

以佢命名嘅事物

 

香港

• 金文泰中學：位於香港島北角，原本係金文泰喺一九二六年創立嘅官立漢文中學。學校喺一九五一年改名金文泰，金夫人得知此事後，一九五八年一月四號，由英國寄贈「金文泰爵士紀念杯」一座，以作紀念。
• 金督馳馬徑：位於香港島東區郊區，聽講係金文泰喺香港嗰陣，成日喺呢度騎馬。
• 金夫人馳馬徑：位於香港仔水塘，用金文泰夫人命名。

新加坡

• 金文泰：位於新加坡嘅一個市鎮。
• 金文泰地鐵站

馬來西亞

• 七條路（Cecil Street）：位於馬來西亞檳城首府佐治市嘅一條街。

攷