譚夏士

佢係Jeffrey Amherst，首任譚夏士男爵，個甥。1797年佢丞繼爵位，1788年再續位。

大清嘉慶廿一年（1816年），大英儲君佐治，派佢出使大清，為大英欽差，期望加強兩國商貿。西曆二月九號，佢由樸茨矛夫出發，坐皇家船亞嘑士地(HMS Alceste)，由船長麥士威（Captain Maxwell）駕。同行嘅船重有東印度公司船禧域（Hewitt），由船長金寶（Captain Campbell）駕。另外有重有皇家船孻也(HMS Lycra)，由船長賀（Captain Hall）駕。

西曆六月九號，船到巽他海峽，就發信去澳門，話無幾日就起行。信六月廿三號到澳門，由士丹頓（ Sir George Staunton）所收。七月七號，禮拜日朝早。士丹頓同通尼（Toone）、爹鼻士（Davis）、皮亞臣（Pearson）、萬寧（Manning）、摩利臣（Morrison），一齊上船。船係東印度公司嘅，叫地士卡佛里（Discovery），泊喺係澳門無幾遠嘅潭仔（氹仔；Typa），由船長羅士（Captain Ross）駕。另外公司船，叫硯威士地機度（Investigator），行向海度，去接欽差。當時欽差嘅船孻也，就行先一步，通知欽差船，亞嘑士地同禧域，喺西曆七月十號到南丫島對開。

西歷七月十號，兩批人會合，就成使團。

七月十一、二號，船留喺香港水域，亦行補給。自然學家（Naturalist）亞俾路（Abel）上過香港仔，又有人員周遊島上，報告個島荒涼。期間，就收到大清嘅撫院通知，準備好喺天津接使團。接團會有直隸總督那彥成。補給好後，十三號，佢哋開船北上北河。船一路順風，行十二日就好近山東。摩利臣就譯儲君信，寫好名人員名單，禮品清單。廿六號，通尼坐孻也，先行到大沽，交文件。廿八號，其他船都到齊大沽外海。

大清官員要求使者叩頭，先可以見皇帝愛新覺羅顒琰。不過中國通士丹頓認為大英唔同大清朝貢，唔應該行咁嘅禮，雙方一直討價還價應該行乜禮。後尾傾掂數，皇帝肯見佢哋。不過，因為譚夏士覺得攰，要休息。皇帝認佢無誠意唔見佢哋。結果，佢哋都入唔到北京，任務失敗。1817年1月譚夏士嘅使團返抵廣州，兩廣總督蔣攸銛喺1月7號喺海幢寺同咗譚夏士會晤。嗰日嘅廣東總督由撫院同海關監督陪同，喺主神殿大神前一個臨時搭建、用黃色物件裝飾嘅房間度，接待咗譚夏士。呢次外交會晤唔屬於「謝恩」或「接詔」，就冇好高規格嘅典禮舉辦。

亞嘑士地之後經朝鮮岸同琉球諸島南行。去到Caspar海峽觸礁沉船。譚夏士同大難不死者坐艇去到八打威（Batavia；今日耶加達），等接濟。1817年佢坐船返英國，途中經過聖海倫那(St. Helena)。島上佢見過拿破侖。

1823年8月到1828年2月間，佢做過英屬印度嘅總督。佢主政期間大事有，1824年第一次緬甸戰爭，英國吞咗Arakan同Tenasserim兩地。

• A. Thackeray and R. Evans, Amherst (1894). " Rulers of India * series.
• 篇文用過大英百科全書第十一版，因版權年滿內容已經歸公。
• Webster, Anthony (1998). Gentlemen Capitalists: British Imperialism in Southeast Asia. New York: Tauris Academic Studies. ISBN 1860641717.