夏侯霸: 三國人

曹魏時期

夏侯霸係魏將夏侯淵嘅仔，佢亞爸喺定軍山之戰戰死，佢因此好憎蜀漢。。黃初年間（220年至226年），夏侯霸喺曹魏官至偏將軍，封關內侯。230年，曹真行子午谷攻打蜀漢，以夏侯霸為先鋒。夏侯霸喺興勢俾蜀軍圍攻，佢親自上埸，直到援軍嚟到救佢。239年，魏明帝曹叡託孤曹爽同埋司馬懿，曹爽重用夏侯霸，夏侯霸被任命為討蜀護軍、右將軍，進封博昌亭侯。247年，魏國嘅隴西、南安、金城、西平等地嘅羌族阿頭餓何、燒戈、伐同、蛾遮塞等人作反。佢哋嘅作反引嚟咗蜀將姜維嘅北伐，涼州胡人阿頭治無戴亦都支持叛變。夏侯霸嗰時喺為翅屯兵，雍州刺史、前將軍郭淮認為姜維一定會攻打夏侯霸，於是佢先到渢中，跟住南下，去支援夏侯霸先。姜維帶兵攻打為翅嘅夏侯霸部隊，佢見到郭淮軍走嚟支援夏侯霸，於是選擇咗撤退。

投奔蜀漢

司馬懿發動高平陵之變將曹爽殺咗，之後仲迫害曹氏同埋夏侯氏嘅族人。夏侯霸好驚被清算，加上佢原嚟嘅阿頭，侄仔夏侯玄被調離，佢又同新嘅阿頭郭淮唔啱，於是佢諗往走去蜀國避難。夏侯霸係陰平走失，並且食晒啲嘢食，蜀國派人迎接佢。夏侯霸嘅堂妹係張飛嘅老婆，佢哋個女畀後主劉禪聚咗做皇后。因為呢層關係，劉禪對夏侯霸好好。之後夏侯霸喺蜀漢官至車騎將軍，仲曾經參加姜維嘅北伐。《三國志》等史書喺255年嗰時仲有夏侯霸嘅事跡，但之後張翼同廖化喺259年分別擔任左右車騎將軍，可見夏侯霸應該喺259年之前去世。

引用