სპერმატოზოიდი — ქომოლი ოსქესე თოლი, ნამუსჷთ 1677 წანას, მიკრობიოლოგი ანტონ ვან ლევენჰუკიქ მიოგორჷ.
სპერმატოზოიდი გითმიჭყაფჷ ქომოლი ოსქესე ჯარკვალს — ჸვაჯიშ კაკალს. უმოს შხირას გოფაჩილი რე სპერმატოზოიდიშ ძაფიშობური ფორმეფი, ნამუეფიშ ოყარე აპარატი რე კუდელი. კიბოიაშნერეფიშ, რგვალ ღვენწკეფიშ, გირდღუეფიშ დო კანკალე შხვა ჩხოლარიშ სპერმატოზოიდეფი უკუდელე რე. ირი გვარობაშო დჷმახასიათაფალი რე სპერმატოზოიდიშ გოთანჯილი ფორმა. სპერმატოზოიდიშ სიგჷრძა შხვადოშხვა რე დო ვა დოჸუნს ჩხოლარიშ გოვითარაფაშ დონეს დო რსხულიშ ზჷმას. ჩხოლარეფიშ უმენტაშალაშ სპერმატოზოიდეფი აკმოდირთჷ 2 თარი ნორთიშე — დუდშე დო კუდელშე. დუდიშ თარი ელემენტი რე გვირზილი დო თიშ აპიკალურო მადვალი აკროსომა. კუდელიშ თარი სტრუქტურული ელემენტი რე ლირეშული ძაფი (აქსონემა), ნამუთ იჭყაფჷ შქა ნორთის ინოხუნელი ბაზალურ რსხულშე დო ედომუშამ კუდელს გოჸუნს. ლირეშული ძაფიშ ულტრასტრუქტურა ფაჭვეფიშ აკოგაფაშ მოგვენი რე. თინა აკმოდირთჷ ცენტრალური 2 მიკრომილაკიშე, ნამუშ მუკი-მუკი იდვალუაფჷ 9 ჟირფა მიკრომილაკი. შქა ნორთის, ლირეშული ძაფიშ მუკი-მუკი, ეშახე სპირალურო დონწყილი მიტოქონდრიეფი, ნამუშ გეშა სპერმატოზოიდიშ მეტაბოლური დო ენერგეტიკული აქტივალა თე განობაწკჷმა რე მერსხილი.
ჩანარეფიშ სპერმატოზოიდი გჷთმიჭყაფჷ ანთერიდიუმს. თასამი ჩანარეფიშ უმენტაშალაშ სპერმატოზოიდეფი უზღვანდე რე დო თეშ გეშა აქტიურო ვაყარენა. წვანე დო ჭუბურა წყარჩანარეფიშ, კანკალე უდაბალაში სოკოეფიშ, ფუთქურეფიშ, სელაგინელეფიშ დო შხვ. სპერმატოზოიდეფს 2 დო უმოსი ზღვანდი უღუ. სპერმატოზოიდის ვა უღუ ცელულოზამი დაცხი, უმენტაშო ძალამ ჭიფე (ცოცორე) რე, დიდი გვირზილი დო მორჩილი მუდანალათ ციტოპლაზმა უღუ.
This article uses material from the Wikipedia მარგალური (Margaluri) article სპერმატოზოიდი, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). დინორე მიწორინაფილი რე გეჸვენჯი ლიცენზიათ (დო შხვა ვა რე მეწურაფილი-და): CC BY-SA 4.0. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki მარგალური (Margaluri) (DUHOCTRUNGQUOC.VN) is an independent company and has no affiliation with Wiki Foundation.