ნილ არმსტრონგი

5 მარაშინათუთა, 1930, უაპაკონეტი, ოჰაიოშ შტატი — ღ. 25 მარაშინათუთა, 2012) — ამერიკალი კოსმონავტი მოფურინჯე, ოურდუმე-ოზუღე ფლოტიშ ოფიცერი. სპეციალობათ ავიაციაშ ინჟინერი. ნილ არმსტრონგის უღჷ აერონავტიკაშ ბაკალავრიშ დო აეროკოსმოსური რკვიებეფიშ მაგისტრიშ ხარისხი. 1972-1979 წანეფს რდჷ აეროკოსმოსური რკვიებეფიშ პროფესორი ცინცინატიშ უნივერსიტეტის.

ორდოშიანი წანეფი

1947-1952 წანეფს ინალენდჷ ოზუღე ავიაცას. მუკორთჷ 78 ოლჷმორი ფურინუა კორეაშ ლჷმას. 1962 წანას ეჭოფჷ ასტრონავტიშ სტატუსი. 1966 წანაშ მელახის რდჷ ხვამარდი „ჯემინი 8-შ“ მადუდე.

თუთაშა ფურინუა

 

1962 წანას არმსთრონგიქ გჷშაგორილქ იჸუ NASA-შით. 1969 წანას ხემანჯღვერენდჷ მისიას „აპოლო 11“ ედვინ ალდრინწკჷმა (თუთას გიოხუნაფალი კაპსულა „არწიშ“ პილოტი) დო მაიკლ კოლინწკჷმა (მადუდე ხვამარდ „აპოლო 11“-იშ პილოტი) ართო. „აპოლო 11“-იქ ქო დიტუ კენედიშ კოსმოსური ცენტრი (ფლორიდა) 16 კვირკვეს 1969 წანას დო 4 დღაშა, 20 კვირკვეს ქო დოდოხოდჷ თუთაშ ჟიდოხის, თ. გ. „რჩქალი ზუღას“. ედომუშამი მოსოფელი ირფელს თეს ტელევიზორს უჯინედჷ. თუთას გიოხუნაფალი კაფსულაშე „არწი“ ნილ არმსტრონგი გიშმურს ღოზიშა:„ ჰიუსტონ, რჩქალი ზუღაშ ბაზა. არწიქ ქო დოდოხოდჷ...“

21 კვირკვეს 1969 წ ოჭუმარეს არმსთრონგი გიმმურს ხვამარდიშე 2 სათი დო 56 წუნს დო 15 მერქას UTC დო მაართა გითმედგჷნს კუჩხის თუთას. თე ბორჯის იძახჷ ისტორიულ ზიტყვას:

„That's one small step for man, one giant leap for mankind.“

„თე ჭიჭე ბიჯგი ადამიერშო, რე დიდი ნახსხაპა კოჩიშობაშო.“

15 წუნიშ უკული თის გითმიაჸუნუ ედვინ ალდრინი, ნამუწკჷმათ ერხინუნს ააშ-შ სახენწჷფო შილას. უკული გაგჷნძორეს თუთაშ მუკი-მუკი რთინა მასუმა ასტრონავტ მაიკლ კოლინწკჷმა ართო. თე 3 ასტრონავტიშ შქას არმსთრონგიქ გჷშაგორილქ იჸუ მაართა კოჩო, ნამუსჷთ თუთა ოკო გულებუდჷკო, რახან თინა რჩქვანელობური მენოღალე რდჷ დო ვა რდჷ ოურდუმე პიჯი მუჭოთ მუში ჟირხოლო ალმარენჯინ. არმსთრონგიქ თუთას მუკორთჷ 2 სათი დო 31 მერქა, გილჷ 250 მ. დიხაუჩაშა დირთეს 24 კვირკვეს, მალეჯუმეს მუსხირენი ქუაშ ნოტეხი დაგურაფალო.