Coron -Ès Des Addjectifs Femrins Pluriyals Metous Padvant

Ele pout eto s' apliker a sacwants nén definixhants prezintoes (totès, sacwantès, kékès, ôtès, puzieurès)

addjectifs

Ci prononçaedje la si scrît -ès e rfondou walon ey e sistinme Feller.

Fråzes

Nos avans yeu les grossès aiwes.
La des belès comeres !
Respectez les viyès djins
Les grandès rowes di strin ratindnut d' berôler (A. Gauditiaubois, tchanté pa William Dunker)
C' est nén po les minmès råjhons k' mi.

Eredjistrumints

• grossès aiwes
  • Avou coron -ès: (e sistinme Feller: grossès-êwes /ɡʀɔ.sɛ.ˈzɛːw/)   ^{aschoûtez lu} u   ^{aschoûtez lu}
  • Sins coron -ès: (e sistinme Feller: grosses-êwes /gʀɔz.'zɛːw/)   ^{aschoûtez lu}
• gurzales
  • noerès gurzales:   ^{aschoûtez lu} (neûrès gurzales) u   ^{aschoûtez lu} (nwârès gruzales) u   ^{aschoûtez lu} (nwêrès gurzèles)
  • vetès gurzales:   ^{aschoûtez lu} (vètès gruzales)
  • blankès gurzales:   ^{aschoûtez lu} (blankès gruzales)
  • grossès gurzales:   ^{aschoûtez lu} (grossès gruzales)

nén definixhants prezintoes

Pa totès stroetès voyes (tite d' on roman da Auguste Laloux)
Dj' a co sacwantès kesses
Dj' a veyou kékès måcules dins vosse tecse.
Vos fåreut trover des ôtès råjhons.
Gn a puzieurès sôres di troufe.

Li coron -ès ni prind nén l' accint tonike, ki dmeure sol sillabe di dvant.

C' est cåzu l' seu cas e walon la k' l' accint tonike si mete sol divant-dierinne sillabe.

divins les mots avou èn emacralé djinre

Po l' aplicåcion di cisse rîle la, les raprindisses divèt bén prinde asteme ås nos ki sont femrins e walon (ey adon, prinde li coron -ès) et omrins e francès:

(Aler bagnî e Mouze !) A des pareyès ådjes ! (L. Hendschel, So l' anuti).

Asteme eto ås nos ki sont omrins e walon et femrins e francès (ey adon, ki n' prindèt nén li coron -ès)

L' ome ås rodjes dints (nén *rodjès) ; il a les gros dints tot gåtés (nén «grossès»)
Des beas pieles (nén «belès»)

ezès payis walons ki n' eployént nén cisse rîle la e 20inme sieke

Li Basse Årdene, a Nonne di Sint-Houbert

Li contrêye tot a Nonne do walon do Coûtchant

I vénreut del cawete latene femrinne pluriyale -as.

Elle si rtrouve pacô e gåmès ey e picård (a Bijhe).

Rishonnance avou l' francès

Ça rshonne a on halcrosse E prononcî e francès (/ə/) :

La verte campagne où je suis né / douce campagne de mes jeunes années…

E sacwants accints do walon, gn a on candjmint di prononçaedje del cossoune metowe divant li coron -ès.

E walon do Levant, et kékes ponts åtoû d' Flipveye, on a on rvuzlaedje d' ene divuzlêye cossoune

ene basse messe // gn aveut troes bassès (/s/) messes å Noyé (e sacwants plaeces : bazès /z/).

On pout aveur li contråve, dj' ô bén on dvuzlaedje d' ene vuzlêye cossoune :

ene longue voye // ås longuès (/g/) royes / des longuès voyes (e sacwants plaeces : lonkès /k/)
ene roede dischinte // des roedès montêyes (/d/) (e sacwants plaeces : reûtès /t/)

Mins gn a des côps ki ça n' candje nole pårt :

del vete salåde / des vetès salådes (måy : des *vèdès salådes).

 

divins li scrîta

Ele si rascontere, dispu bele ådje, dedja e li scrîta, sovint notêye « et » metou dirî l' addjectif.

des rouges ET aumailles (des rodjès åmayes)
donner petites ET choses (diner pititès sacwès) (fén do 13inme sieke)
…la feme ait tapé plusieurs ET pirs aprè la feme de Linar (…k' li feme åye tapé puzieurès pires après l' feme da Linå) (1538)
les bonne ET gens (les bounès djins) (1551)

dins li scrijhaedje walon del Wisconsene

Egzimpe dins on scrijhaedje walon del Wisconsene

Li societee de lonnk eh pipp dy tehrr (Li societé des longuès pupes di tere) (Al Vandertie, Algona)

• (fr) Dins l' grosse croejhete da Lorin Hendschel
  • Rîle
  • Candjmint del cossoune metowe padvant -ès
  • Po les prezintoesnén definixhants
• Dins li ptite croejhete (e walon)
  • Rîle
• Egzimpes d' addjectifs femrins pluriyals metous padvant (sol Wiccionaire)
• (fr) Notule et mape ALW 2/11