Sevgi Va Momaqaldiroq

Taika Waititi tomonidan suratga olingan. Film gʻoyasi Marvel Comics nashriyotidan tushirilgan Thor personajiga asoslangan. Marvel Studios tomonidan ishlab chiqarilgan hamda Walt Disney Studios Motion Pictures tomonidan premyera qilingan. Bu film Thor (2011), Thor: Zulmat dunyosi (2013) va Thor: Ragnarok (2017) filmlarining davomi boʻlib, Marvel kinematografiya koinoti (MKK) ning 29-toʻliq metrajli filmi sanaladi. Filmda bosh rollarni Chris Hemsworth, Christian Bale, Tessa Thompson, Jaimie Alexander, Waititi, Russell Crowe va Natalie Portman lar ijro etgan. Film voqealariga koʻra, Thor ichki xotirjamlikka erishish maqsadida safarga otlanadi, biroq uning dam olishini „Maʼbudlar qotili“ nomi bilan tanilgan Gorr buzadi. Chaqmoq maʼbudi yangi xavfga qarshi kurashishda Yangi Asgard Qiroli Valkyre, sodiq doʻsti Korg va sobiq sevgilisi Jane Fosterni yordamga chaqiradi. Foster Thor va Myolnir bolgʻa oʻrtasidagi oʻzaro kelishuv sabab „Mjolnir“ bolgʻasiga munosib koʻrilib, buyuk Thorning kuchiga ega boʻladi.

Thor: Sevgi va momaqaldiroq
Thor: Love and Thunder
Film posteri
Rejissyor(lar)	Taika Waititi
Prodyuser(lar)	Kevin Feige
Ssenariynavis(lar)	Taika Waititi Jennifer Kaytin Robinson
Qaysi asarga asoslangan	Thor –Stan Lee, Larry Lieber, Jack Kirby
Rollarda	Chris Hemsworth Christian Bale Tessa Thompson Jaimie Alexander Taika Waititi Russell Crowe Natalie Portman
Bastakor(lar)	Michael Giacchino Nami Melumad
Kinematografiya	Barry Idoine
Muharrir(lar)	Matthew Schmidt Peter S. Elliot Tim Roche Jennifer Vecchiarello
Studiya(lar)	Marvel Studios
Distribyutor	Walt Disney Studios Motion Pictures
Chiqarilgan sanasi	8-iyul, 2022-yil(2022-07-08) (AQSh)
Davomiyligi	119 daqiqa
Mamlakat	AQSh
Til	inglizcha
Byudjeti	$250 million
Daromadi	$760,8 million

Thor: Sevgi va momaqaldiroq premyerasi AQShda 2022-yil 8-iyulda boʻldi. Film umumjahon boʻylab $760.8 million jamgʻardi va 2022-yilning 6^chi eng kassabop filmiga aylandi.

Gorr va uning qizi — Love choʻlda suv va yegulik yoʻqligi tufayli ochlikdan qiynalishadi. Ular xudosi boʻlmish Rapuga qancha iltijo qilishmasin, Love halok boʻladi. Necrosword deb atalmish xudolarni oʻldiruvchi qurol Gorrni chaqiradi. Gorr ovoz ortidan ergashib, Rapuning soʻlim podsholigiga boradi. Gorr mushkul vaziyatda ekanligini aytib, Rapudan koʻmak soʻraganda, uning befarqligini koʻrib, unga endi uni xudo sifatida koʻrmasligini aytadi. Bundan jahli chiqqan Rapu Gorrni bugʻar ekan, Necrosword Gorrga oʻzidan foydalanishni taklif qiladi. Gorr esa uning taklifini qabul etib, Rapuni oʻldiradi va barcha xudolarni oʻldirishga qasamyod qiladi. Necroswordga ega chiqqanidan soʻng, Gorr soyalarni boshqarish va maxluqlar yaratish qobiliyatiga sohib boʻladi, biroq yaqinlashayotgan ajal bilan lanʼatlanib, qilich taʼsiriga tushib qoladi.

Gorr bir nechta xudolarni oʻldirganidan soʻng, Thor Sifdan musibatda ekanligi haqidagi chaqiruv signalini oladi. Soʻngra, Thor Galaktika qoʻriqchilari bilan ajralib, yaralangan Sifni topadi. Sif esa uni Gorr haqida ogonlantirib, uning keyingi New Asgard ekanligini aytadi. Boshqa tomondan, Yer sayyorasida Thorning sobiq mahbubasi Dr. Jane Fosterga IV bosqichli saraton kasalligi tashxisi qoʻyiladi. Tibbiy muolajalar samarasiz boʻlgandan keyin u Thorning singan bolgʻasi — Mjolnir uning xastaligiga davo boʻlishi mumkin degan umidda New Asgardga tashrif buyuradi. Thor yillar avval Fosterni muhofazalash uchun oʻzi bilmagan holda qoʻygan jodusi tufayli Mjolnir boʻlaklari qayta birlashib, Fosterga Thor kuchini ato etadi. Thor Gorr hujumi endi boshlangan mahalda New Asgardga yetib keladi. Thor Mjolnirga sohiblik qilgan Fosterni koʻrib hayratga tushadi va Gorr bilan jang uchun u, Valkyrie va Korg bilan birlashadi. Jamoa Gorrni magʻlub etadi, biroq Gorr qochishga muvaffaq boʻladi. U faqatgina yolgʻiz qochmay, asgardlik bolalarning aksariyatini oʻzi bilan olib ketib, Soyalar dunyosiga qamal qiladi.

Guruh koʻmak olish ilinjida olamdagi xudolar uyi — Qudratli shaharga joʻnab ketadi. Xudolar yetakchisi — Zeus Gorrdan qoʻrqib, guruhga ularga yordam bermasligini aytadi. Uning fikricha, ular shaharda qolishsa, xavfsizlikda boʻlishadi va Gorr ularni topa olmaydi. Zeus ular orqali Gorr shahar joylashuvini topib olishidan hayiqib, guruhni kishanband etishni buyuradi. Natijada, guruh va Zeus jangchilari oʻrtasida jang vujudga kelib, Zeus oʻzining „momaqaldiroq gumburlashi“ nomli quroli bilan Korg tanasi boʻlaklarga boʻlib yuboradi, ammo uning yuzi tirik qoladi. Bundan gʻazabga tushgan Thor esa Zeusga oʻzining qurolini suqadi. Soʻngra, Valkyrie „momaqaldiroq gumburlashi“ni qoʻlga kiritadi va guruh shahardan qochib ketadi. Guruh Soyalar dunyosiga kelishadi, biroq bolalarni topa olishmaydi. Foster tushunib yetadiki, bolalarni oʻgʻirlash Thorning oyboltasini qoʻlga kiritish uchun qilingan Gorrning tuzogʻi boʻlib, Gorr oybolta orqali Bifrostni ochishi va Abadiylik dunyosiga (barcha xudolarni oʻldirish uchun) kira olishga erishishi mumkin. Gorr guruhdan ustun kelib, Valkyrieni ogʻir jarohatlaydi. Soʻngra, guruh chekinadi va Yerga qaytadi. Biroq, Gorr maqsadiga erishadi, yaʼni Thorning oyboltasini qoʻlga kiritadi.

Foster har safar Mjolnirdan foydalanganda, Mjolnir uning quvvatini soʻrib olishi va bu uni oʻlim sari yetaklashi maʼlum boʻladi. Thor Fosterni sogʻayish uchun zarur dorilarni qabul qilishga va Gorr bilan yolgʻiz oʻzi (Foster ishtirokisiz) jang qilishiga koʻndiradi. Thor oʻgʻirlab ketilgan bolalarni Abadiylik mehrobida topadi va Zeusning „momaqaldiroq gumburlashi“ quroli yordamida ularga oʻzining kuchini beradi. Thor bilan Gorr jang qilishayotganda, bolalar Gorr yaratgan maxluqlar bilan jang qilishadi. Bu orada Foster Gorr Thorni oʻldirmoqchi ekanligini his qiladi va Thorni qutqarish uchun Mjolnir bilan jangga qoʻshiladi. Ikkovlon Necroswordni yoʻq qilishib, Gorrni uning taʼsiridan halos etishadi. Ammo, Gorr Abadiylik dunyosiga kirishga erishadi (Thor va Foster ham kirishadi). Gorr oʻz tilagini aytishga hozir ekan, Thor unga xudolarni oʻldirish oʻrniga qizini tiriltirishini oʻtinadi. Soʻng, Thor Gorrni qaror qilish uchun qoldirib, jon berish arafasida boʻlgan Fosterning yoniga boradi. Gorr esa Abadiylikdan qizi Loveni tiriltirishni soʻraydi. Qizi tiriladi va Gorr lanʼat ortidan oʻlayotganda, Thordan Loveni asrashini soʻraydi.

Korgning tanasi tiklanadi va u yangi oila quradi. New Asgardda Fosterning vafoti eʼtirof etiladi, Valkyrie va Sif esa bolalarni shugʻullantirish bilan mashgʻul boʻladi. Thor Loveni asrab olib, u bilan birgalikda yangi sarguzashtlarni boshlaydi (Thor oyboltaga, Love esa Mjolnirga egalik qilgan holda).

Oʻrta kreditlar sahnasida, sogʻaygan Zeus oʻgʻli — Herculesni Thorni jonini olish uchun yuboradi. Post kreditlar sahnasida esa, Foster Valhalla darvozasiga yetib kelib, uni u yerda Heimdall qarshi oladi.

 

 

 

Hemsworth, Thompson va Portman San Diego Comic-Conda (2019)

• Chris Hemsworth Thor rolida:
  Qasoskor va Asgardning sobiq qiroli, Skandinaviya mifologiyasidagi ayni nomli xudoga tayangan. Film rejissori Taika Waititining aytishicha, filmda Thor kimligini aniqlashga urinadi va oʻziga „men kimman, nima uchun qahramonman va nega qahramon boʻlishim kerak“ kabi savollarni beradi. Hemsworthning egizak oʻgʻillari — Sasha va Tristan filmda Thorning bolaligini jonlantirishadi.
• Christian Bale Xudolar qotili Gorr rolida:
  Necrosword bilan qurollangan qotil. Tanasi chandiqqa toʻla boʻlib, u barcha xudolarni oʻldirishni maqsad qilgan. Waititi Gorrni „juda qoʻrqinchli“ va juda chuqur xarakterga ega, deb tasvirladi. Waititi filmda Gorrning yuz koʻrinishini oʻzgartirishga qaror qildi, chunki ushbu personajning komiksdagi asl koʻrinishi Harry Potter filmlar seriyasidagi Lord Voldemort qahramoniga oʻxshardi.
• Tessa Thompson Valkyrie rolida:
  New Asgard qirolichasi, mifologik mavjudot — Brynhildrga asoslangan. Thompson va film produseri Kevin Feigening aytishlaricha, Valkyriening biseksualligini film davomida koʻrish mumkin. Waititining aytishicha, Valkyrie New Asgard infratuzilmasi va iqtisodiyotini idora etish, boshqa mamlakatlar delegatlarini qarshilash kabi jang maydonidan uzoq boʻlgan burokratik aspektlarga koʻnikishi kerak edi.
• Jaimie Alexander Sif rolida: Asgardlik jangchi va Thorning bolalikdan yaqin doʻsti, Skandinaviya mifologiyasidagi ayni nomli xudoga tayangan.
• Taika Waititi Korg rolida: Kronan irqiga mansub gladiator.
• Russell Crowe Zeus rolida: Olimpiachilar xudosi, yunon mifologiyasidagi ayni nomli xudoga tayangan. Crowe jonlantirayotgan qahramoni yunoncha aksentda gapirishini istagan, ammo Waititi „juda ahmoqona“ tuyuladi, deb oʻylab, Croweni ham yunoncha, ham britancha aksentda gapirtirgan. Yakunda, Waititi Crowe toʻgʻri aytganini aytib, filmda yunoncha aksentda gapirganini ishlatgan.
• Natalie Portman Jane Foster / Qudratli Thor rolida:
  Astrofizik va Thorning sobiq mahbubasi. Unga saraton tashxisi qoʻyilib, filmda Foster Thorning sobiq bolgʻasi — Mjolnirga egalik qilib, „Qudratli Thor“ga aylanadi. Avvalgi film — Thor: Ragnarok (2017) da paydo boʻlmagan Portman Waititi bilan uchrashuvdan soʻng, filmga qaytishga rozi boʻladi. Waititi shuni ham qoʻshimcha qildiki, Fosterning Thornikiga oʻxshash kiyimda paydo boʻlishi uni (Thorni) „hayratda“ qoldiradi.

Oʻzbekcha dublyaj

Film oʻzbek tiliga „Shavid Sound“ dublyaj studiyasi tomonidan oʻgirilgan^{[manba kerak]}.

• Behzod Muhammmadkarimov — Thor
• Dildora Rustamova — Valkyrie
• Elbek Mirzohidov — Xudolar qotili Gorr
• Muhammadjon Xoʻjayev — Sif
• Abdulhay Otaxoʻjayev — Korg

Bundan tashqari, tarjimon — Zilola Rahimova, dublyaj rejissori — Shavkat ABdujamilov, ovoz rejissori — Quvondiq Abdullayev, muharrir — Shahlo Sadiqova.

Filmga Michael Giacchino va Nami Melumad bastakorlik qilishgan.