مسوراتی علماء

مسوراتی علما (انگریزی: Masoretes) چھٹی سے دسویں صدی کے وہ یہودی عالم جو پُرانے عہد نامے کی حفاظت اور اشاعت میں بڑے سرگرم تھے۔ عبرانی زبان میں مسورہ ”روایت“ کو کہا جاتا ہے۔ اُس زمانے سے پہلے عہد نامہ قدیم کے نسخے بڑی احتیاط نقل کیے جاتے تھے۔ لیکن چھٹی صدی سے پہلے یہ متن کس طرح تیار کیا جاتا اور محفوظ رکھا جاتا تھا اِس کا تاریخ میں ذکر موجود نہیں۔ مسوراتی علما نے بڑی محنت سے قواعد و ضوابط مُرتب کیے جن سے نسخوں کی کتابت اور نقل میں غلطی کا امکان بہت کم رہ گیا۔ مثلاً نقل کرنے کے بعد سب الفاظ اور حروف گِن لیے جاتے تھے۔ متن کی دیگر خصوصیات بھی قلم بند کرلی جاتی تھیں۔ اگر متن میں کوئی غلطی محسوس ہوتی تو اُسے جوں کا توں چھوڑ دیا جاتا تھا لیکن حاشیہ میں اس کا ذکر اور درست کی ہوئی عبارت یا الفاظ لکھ دیے جاتے تھے۔ اعراب لگانے کا سہرا بھی مسوراتی علما کے سر ہے۔