Михаил Тимофеевич Калашников — быдэс дуннелы тодмо луэм конструктор, инженер, СССР-лы но Россилы пыӵал тӥрлык кылдытэм дано мурт, техника наукаосъя доктор, генерал-лейтенант.
Михаил Тимофеевич Калашников | |
---|---|
Ужан удысэз: | |
Вордӥськем нуналыз: | 10-тӥ шуркынмонэ 1919 |
Вордӥськем интыез: | |
Кун: | |
Кулон нуналыз: | 23-тӥ толсуре 2013 (94 года) |
Кулон интыез: | |
Михаил Тимофеевич Калашников Викискладын |
Кык пол пусъемын Герой Социалистического труда нимын, Сталин но Ленин нимо премиослэн лауреатсы, Россия Федерацилэн Героез, Дунчылкыт Андрей Первозванный нимо орденлэн кавалерез, Россиысь писательёслэн огазеяськонзылэн ёзчиез. 1952-тӥ арысен КПСС-лэн ёзчиез, 1950-тӥ арысен 1954-тӥ арозь СССР-лэн Вылӥ кенешезлэн депутатэз. Михаил Тимофеевич Россиысь огназ кык пол пусъемын Герой Социалистического труда, озьы ик Герой России нимын.
Михаил Калашников вордӥськиз Алтай шаерын Курья гуртысь крестьян семьяын. Дас укмыс нылпиос пӧлысь со дас сизьыметӥез вал, но вань пиналъёс пӧлысь висёнлы-кулонлы ӧз сётске тямысэз гинэ. 1930-тӥ арын Михаиллэн атаез — Тимофей Александрович — кулакъёслэн радазы пыртэмын вал. Сое семьяеныз валче Алтай улосысь Томск палъёсысь Нижняя Моховая гуртэ келязы. Пичи дырысеныз ик Михаил Тимофеевич тунсыкъяськиз техникаен но пӧртэм механизмъёсын. Школаын яратӥз физикаез, геометриез но лиетратураез. Сизьым классэз йылпумъяса, бертӥз Алтай улосысь вордскем гуртаз — Курьяе. Но отын уже интыяськыны ӧз быгаты. Одӥг ар Курьяын дышетскыса, бертӥз Сибирьын улӥсь анай-атаез доры. Отын документъёсысь вордскем нуналзэ тупатыса, дырызлэсь вазь паспорт басьтӥз. Кӧня ке толэзь ортчыса, нош ик берытскиз Курьяе, отын нырысьсэ тодматскиз пыӵал тӥрлыкен — угось сэрттӥз-пертчиз Браунинг пистолетэз. 18 аресказ Курьяысь кошке Казахстанэ, отысь Туркестано-Сибирь чугун сюрес вылысь Матай станциын депоын учётчик луыса ужа. Токарьёсын, слесарьёсын, машинистъёсын эшъяське — озьы эшшо но юнма техникаен тунсыкъяськонэз.
Сӥзьыл 1938-тӥ арын Михаил Калашниковез Горд Армие басьтӥзы, со сюриз Киевский Особый военный округе. Пичи командиръёслы чаклам курсъёсты йылпумъямез бере, сое танке механик-водителе юнматӥзы. Службазэ ортчиз Стрый городысь (Украиналэн шундыпуксён палаз) танк полкын. Отын со возьматӥз иобретатель луэмзэ. Танкъёслэн пушкаоссылы кылдытӥз инерционный счётчик, ТТ пистолетысь ыбылӥськонэз капчи каронъя ёзъёс, танклэсь моторесурссэ чакланъя счётчик но мукет. Таӵе усьтонъёсыз сярысь тодыса, сое ас дораз ӧтиз Киевский Особый военный округлэн армилэн генералэз Георгий Константинович Жуков. Пумиськылэмзы бере М. Калашниковез келяло Киевысь танкъёсъя технической училищее. Бӧрысь сое ысто Ленинградысь Ворошилов нимо заводэ, отын со ужа усьтонъёсыз бордын.
Быдӟым ож кутскем бере М. Калашниковлы вылӥ сержант ним ёсто но танке командире пукто. 1941-тӥ арын Брянск улосын сӧсырмыны шеде. Госпитальын кылльыкуз, йыраз малпан кылдэ автомат кылдытыны. Со бӧрсьы кутске чертежъёс лэсьтыны. Уже кутэ оже ветлэм эшъёсызлэсь верамъёссэс, дэмланъёссэс. Госпитальысь М. Калашниковез куать толэзьлы отпуске келязы, со берытскиз Матай станцие. Отысь депоысь специалистъёс юрттэмъя кылдытэ пистолет-пулемётэзлэсь нырысетӥ модельзэ.
Матай станциысь М. Калашниковез командировкае келязы Алма-Атае, отчы война аръёсы выжтэмын вал Москваысь авиацияя институт. Та дышетсконнилэн мастерскояз М. Калашников пистолет-пулемётсэ эшшо но ӟечомытэ. Бӧрысь солэн кылдытэм пыӵал тӥрлыкъёсыныз тодматскиз Самаркандэ вуэм А. А. Благонравов — ӵапак со кивалтӥз Ф. Дзержинский нимо Военно-инженерной академиен, пыӵал тӥрлык ласянь дано тодосчи. А. Благонравов М. Калашниковлэсь автоматсэ курлаз ке но, вылӥ дунъяз солэсь утчаськонзэ, техника борды кыстӥськонзэ но разработкаезлэсь аспӧртэмлыко луэмзэ. Вылӥ сержантлы Калашниковлы ӵектэмын дышетсконзэ азьланьтыны.
Бӧрысьгес Калашниковлэн пистолет-пулемётэз РККА-лэн Артиллерияя валтӥсь ёзэзлы возьматэмын вал. Отысь специалистъёс та ож тӥрлыклэсь шекъёссэ но, ӟеч палъёссэ но пусйизы. Но ГАУ-ын ужасьёс та пистолет-пулемётэз технологияя мугъёсъя ожын кутыны ӧз лэзе.
Михаил Тимофеевич автоматсэ ӟечомытон бордын уен-нуналэн ужа. 1947-тӥ арын солэн АК-47 пистолет-автоматэз пыр-поч эскерон пыр ортче, мукет пыӵал тӥрлыкен ӵошатыса, трослы кужмогес луэмзэ возьматэ. 1949-тӥ арын СССР-ысь Вооружённой кужымъёсъя министерство пуктэмъя АК-47 автоматэз уже кутыны лэземын. 1949-тӥ арын М. Т. Калашниковез пуктӥзы Ижкарысь «Ижмаш» заводлэн конструктор бюроеныз кивалтыны.
Вань улонзэ М. Калашников сӥзиз ыбылӥськон тӥрлыкез ӟечомытонлы-кужмоятонлы, туала куронъёсъя тупатонлы. 1950-тӥ арысен 1970-тӥ арозь Калашников кивалтэм улсын кылдытэмын 20-лэсь пӧртэм атвоматъёс: АКМ, АКМС, АКС74, АКС74У, РПК, РПКС, РПК74, РПКС74, ПК, ПКС, ПКМ, ПКСМ, ПКТ, ПКМТ, ПКБ, ПКМБ.
Ижкарын ӝутэмын М. Калашниковлы сӥзем музей. Пыӵал тӥрлык дасянын ужасьёс пӧлын арлы быдэ ортче М. Калашников пимо премиез сётон. Алтай улосын — конструкторлэн вордскем палъёсаз — пуктэмын Михаил Тимофеевичлы сӥзем синпелет.
М. Калашниковен кылдытэм автматъёсты быдэс дуннеын уже куто. Африкаысь Мозамбик страна, кунлык басьтэмзэ возьматон понна, кункышет вылаз пусйиз Калашниковлэсь автоматсэ.
1970-тӥ арын, АК вылэ пыкъяськыса, кылдытэмын пӧйшуран карабинъёс. 1992-тӥ арын поттын кутскемын «Сайга» карабин, бӧрысь «Сайга 5,6» но «Сайга 5,6С», «Сайга-410» но «Сайга-20» пыӵалъёс.
This article uses material from the Wikipedia Удмурт кыл article Калашников, Михаил Тимофеевич, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Пушкесэз CC BY-SA 4.0 лицензияя кутымон луэ (мукетыз возьматэмын ӧвӧл ке). Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Удмурт кыл (DUHOCTRUNGQUOC.VN) is an independent company and has no affiliation with Wiki Foundation.