ಕೆ ಪಿ ರಾವ್

ಭಾರತೀಯ ಭಾಸೆಲೆನ ಲಿಪಿಕುಲು ಕಂಪ್ಯೂಟರ್‌ಡ್ ತೋಜಿದ್ ಬರ್ಪಿಲೆಕ ಮಲ್ಪುನ ತಂತ್ರಜ್ಞಾನೊದ ಇಸಯಡ್ ಮಾಮಲ್ಲ ಬೇಲೆ ಬೆಂದಿನಾರ್. ಪರ್ಸನಲ್ ಕಂಪ್ಯೂಟರ್‌ಲೆಡ್ ಗಲಸರಗಾದ್, ಸುರುತ ಡಾಸ್ ಆಧಾರಿತವಾಯಿನ ಕನ್ನಡ ಪದಸಂಸ್ಕರಣ ತಂತ್ರಾಂಶ ಸೇಡಿಯಾಪುನ್ ೧೯೮೮ನೇ ಇಸವಿದಾತ್ ಪಿರಾಕ್‌ಡೇ ತಯಾರ್ ಮಲ್ತ್‌ದ್, ಗಳಸುನಕ್ಲೆಗ್ ಉಚಿತವಾದ್ ಕೊರಿಯೆರ್.

ಕಿನ್ನಿಕಂಬಳ ಪದ್ಮನಾಭ ರಾವ್
ಪುಟ್ಟಿನ	ಪದ್ಮನಾಭ (1940-02-29) 29 February 1940 (age 84) ಕಿನ್ನಿಕಂಬಳ, ಮಂಗಳೂರು
ರಾಷ್ಟ್ರೀಯತೆ	ಭಾರತೀಯೆ
ಶಿಕ್ಷಣ	ಕಿನ್ನಿಕಂಬಳೊಡು ಪ್ರಾಥಮಿಕ, ಮಂಗಳೂರುಡು ಪ್ರೌಢಶಾಲೆ ಬುಕ್ಕ ಕಾಲೇಜು. ಕುಡ್ಲದ ಅಲೋಶಿಯಸ್ ಕಾಲೇಜ್‍ಡ್ದ್ ಬಿಎಸ್ಸಿ (೧೯೫೯)
Alma mater	ಮೈಸೂರು ವಿಶ್ವವಿದ್ಯಾಲಯ
ವೃತ್ತಿ(s)	ಮಣಿಪಾಲ ಇನ್ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ, ಮಣಿಪಾಲ ಇನ್ಸ್ಟಿಟ್ಯೂಟ್ ಆಫ್ ಕಮ್ಯುನಿಕೇಶನ್
Known for	ಭಾರತೀಯ ಬಾಸೆಲೆನ್ ಕಂಪ್ಯೂಟರ್‌ಡ್ ಸೇರಾಯಿನಿ
ಸಂಗಾತಿ	ನಿರ್ಮಲಾ
Honours	ನಾಡೋಜ ಪ್ರಶಸ್ತಿ ೨೦೧೩- ಕನ್ನಡ ವಿವಿ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ೨೦೧೩ ನುಡಿಸಿರಿ ಪ್ರಶಸ್ತಿ ೨೦೦೯

ಕರ್ನಾಟಕ ಸರ್ಕಾರದ ಕನ್ನಡ ಗಣಕ ಪರಿಷತ್, ಈ ಸೇಡಿಯಾಪು ತಂತ್ರಾಂಸೊಡು ಕೆಲವೊಂಜಿ ಬದಲಾವಣೆ ಮಲ್ತ್‌ದ್, ನುಡಿ ಪನ್ಪಿನ ಪುದರ್‌ಡ್ ಬುಡ್ಕಡೆ ಮಲ್ತ್ಂಡ್. ಅತ್ತಂದೆ ಕನ್ನಡದ ಶಿಷ್ಟ ಕೀಲಿಮಣೆ ವಿನ್ಯಾಸ (ಸ್ಟ್ಯಾಂಡರ್ಡ್ ಕೀಬೋರ್ಡ್ ಲೇಔಟ್) ಪಂಡ್‍ದ್ ಘೋಷಿಸಾಂಡ್. ಪನ್ನಗ, ನುಡಿ ಕೀಲಿಮಣೆತ್ತ ಮೂಲ ವಿನ್ಯಾಸ ಮಲ್ತಿನಾರ್ ಕೆ ಪಿ ರಾವ್ ಇಂದ್ ಪನೊಲಿ.

ಕೆ ಪಿ ರಾಯೆರ್ ಪುಟ್ಟಿನಿ ೨೯ನೇ ಫೆಬ್ರವರಿ ೧೯೪೦ನೇ ಇಸವಿ, ಕುಡ್ಲದ ಕೈತಲ್‍ದ ಎಲ್ಯ ಹಳ್ಳಿ ಕಿನ್ನಿಕಂಬಳೊಡು. ಆ ಹಳ್ಳಿಡ್ ಹಿಂದೂ, ಮುಸ್ಲಿಂ, ಕ್ರೈಸ್ತ- ಇಂಚ ಬೇತೆ ಬೇತೆ ಧರ್ಮೊದ ಬೇತೆ ಬೇತೆ ಬಾಸೆಲೆನ್ ಪಾತೆರುನ ಜನಕುಲು ಇತ್ತೆರ್. ಅಂಚಾದ್ ಆರೆಗ್ ಬಾಸೆಲೆನ್ ಪಾತೆರುನ ಕ್ರಮ, ಉಚ್ಛಾರದ ಬಗ್ಗೆ ಆಸಕ್ತಿ ಬತ್ಂಡ್. ಇಲ್ಲಡ್‌ದ್ ಶಾಲೆ ಬುಕ್ಕ ಕಾಲೇಜಿಗ್ ೨೦ ಕಿಮೀದಾತ್ ದೂರ ಪೋವೊಡಿತ್ತ್ಂಡ್. ಶಾಲೆ-ಕಾಲೇಜಿಡ್ ಟೀಚರ್‌ನಕುಲು ರಾಯೆರೆನ ಕಲ್ಪಾಟಗ್ ದಿಂಜ ಪ್ರೋತ್ಸಾಹ ಕೊರೊಂದಿತ್ತೆರ್. ಆರ್ ಕುಡ್ಲದ ಸೈಂಟ್ ಅಲೋಶಿಯಸ್ ಕಾಲೇಜ್ ಬುಕ್ಕ ಮೈಸೂರು ವಿಶ್ವವಿದ್ಯಾನಿಲೊಡ್ದು ವಿಜ್ಞಾನ ಪದವಿ ಪಡೆಯೆರ್.

ಮುಂಬೈಡ್

ಪದವಿ ಪಡೆಯಿ ಬೊಕ್ಕ ಬೊಂಬಾಯಿಗ್ ಪೋಯಿನ ಕೆ ಪಿ ರಾವ್, ಭಾರತ ಸರ್ಕಾರದ ಪರಮಾಣು ಶಕ್ತಿ ಇಲಾಖೆದ ಅಡಿಟ್ ಬರ್ಪುನ, ಟ್ರೈನಿಂಗ್ ಸ್ಕೂಲ್ ಆಫ್ ಅಟೊಮಿಕ್ ಎನರ್ಜಿ ವಿಭಾಗೊಡು ಮೂಜಿನೆ ಬ್ಯಾಚ್‌‌ಡ್ ತರಬೇತಿಗಾದ್ ೧೯೫೫ನೇ ಇಸವಿಡ್ ಸೇರಿಯೆರ್. ಈ ಪೊರ್ತುಡು, ಟಾಟಾ ಮೂಲಭೂತ ಸಂಶೋಧನಾ ಸಂಸ್ಥೆ(TIFR)ದ (ಈ ಸಂಸ್ಥೆಲಾ ಭಾರತ ಸರ್ಕಾರದ ಪರಮಾಣು ಶಕ್ತಿ ಇಲಾಖೆದ ಅಡಿಟೇ ಬರ್ಪುಂಡು) ಲೈಬ್ರರಿಡ್ ಇತ್ತಿನ ರಸಾಯನಶಾಸ್ತ್ರದ ಬೂಕುಲೆನ್ ಗಲಸೊಂದು, ಪೊಸ ವಿದಾನೊದ ಕಲ್ಪಾಟನ್ ಅಭ್ಯಾಸ ಮಲ್ತೆರ್. ತರಬೇತಿ ಪಡೆಪಿನ ಪೊರ್ತುಡು ಎಸ್ಎಸ್ ಧರ್ಮಟ್ಟಿ, ಎಕೆ ಗಂಗೂಲಿ(ಪುಗರ್ತೆದ ನ್ಯಾಯಾಧೀಶೆರ್), ರಾಜಾರಾಮಣ್ಣ ಬೊಕ್ಕ ಪಿ ಆರ್ ದಸ್ತಿದಾರ್(ಪುಗರ್ತೆದ ವಿಜ್ಞಾನಿಲು) ಮೊಕಲ್ನ ಸಂಪರ್ಕ ಕೆ ಪಿ ರಾಯೆರೆಗ್ ತಿಕ್ಕ್ಂಡ್.

ಅಟೊಮಿಕ್ ಎನರ್ಜಿಡ್ ತರಬೇತಿ ಮುಗಿಬೊಕ್ಕ, ಬಾಬಾ ಪರಮಾಣು ಸಂಸೋಧನಾ ಕೇಂದ್ರದ ಇಲೆಕ್ಟ್ರಾನಿಕ್ ವಿಭಾಗೊಡು ಬೇಲೆಗ್ ಸೇರಿಯೆರ್. ಅವುಲುಲಾ ಇಂಬೇರೆಗ್ ಹೋಮಿ ಜೆ ಬಾಬಾ(ಪರಮಾಣು ವಿಜ್ಞಾನಿ) ಬುಕ್ಕ ಡಿಡಿ ಕೋಸಾಂಬಿ(ವಿದ್ವಾಂಸೆರ್) ಮೊಕಲೆನ ಒಟ್ಟು ಬೇಲೆ ಮಲ್ಪುನ ಅವಕಾಶ ತಿಕ್ಕ್ಂಡ್.

ಹೈದರಾಬಾದ್‌ಡ್

ಹೈದರಾಬಾದ್‌ಡ್ ಎಲೆಕ್ಟ್ರಾನಿಕ್ಸ್ ಕಾರ್ಪೋರೇಶನ್ ಆಫ್ ಇಂಡಿಯಾ ಸಂಸ್ಥೆನ್ ಸ್ಥಾಪಿಸಾವರಗಾದ್ ಒಂಜಿ ಗುಂಪುದೊಟ್ಟುಗು ಕೆ ಪಿ ರಾಯೆರ್ ಹೈದರಾಬಾದ್‌ಗ್ ಪೋಯೆರ್. ಅಲ್ಪ ಆರೆಗ್ ಉಂದು ತನ್ಕ್ ಆಪಿನ ಬೇಲೆ ಅತ್ತ್ ಎನ್ನಿಂಡ್. ಅಲ್ಪಡ್ದ್ ಧಾರವಾಡೊಗು ಬತ್ತಿನ ಆರ್ ವಿದ್ಯುತ್ ಉಪಕರಣೊದ ನಿಯಂತ್ರಕ ಸಾಮಾನ್ ಸಿಲಿಕಾನ್ ಕಂಟ್ರೋಲ್ಡ್ ರೆಕ್ಟಿಫೈಯರ್‌ದ ಮಿತ್ ಬೇಲೆ ಸುರು ಮಲ್ತೆರ್ ಆಂಡ, ಅವು ನಪಾಸ್ ಆಂಡ್. ಧಾರವಾಡೊಡು ರಾಯೆರೆಗ್ ವಿದ್ವಾಂಸೆರಾಯಿನ ಶಂಕರ ಮೊಕಾಶಿ ಪುಣೇಕರ್ರೆನ ಭೇಟಿ ಆಂಡ್. ಸಿಂಧೂ ನಾಗರೀಕತೆತ್ತ ಸಂಸೋಧನೆ ಮಲ್ಪುನ ಪೊರ್ತುಡು ಸಿಕ್ಕಿನ ಕೆಲವು ಮುದ್ರೆದ ಬಗ್ಗೆ ಶಂಕರೆರ್ ಕೆ ಪಿ ರಾಯೆರೆನ ಒಟ್ಟು ಸೇರ್ದ್ ಇಂಗ್ಲಿಷ್ ಬಾಸೆಡ್ Mohenjodaro seals, read and identified ಪನ್ಪಿನ ಒಂಜಿ ಬೂಕುನು ಬರೆಯೆರ್.

ಟಾಟಾ ಪ್ರೆಸ್‌ಡ್

ಕೆ ಪಿ ರಾಯೆರ್ ಮುಂಬಯಿಡ್ ಇತ್ತಿನ ಟಾಟಾ ಪ್ರೆಸ್‌ಡ್ ಇಲೆಕ್ಟ್ರಾನಿಕ್ ವಿಭಾಗೊಡು ಸರ್ವೀಸ್ ಇಂಜಿನಿಯರ್ ಆದ್ ಬೇಲೆಗ್ ಸೇರಿಯೆರ್. ಅಲ್ಪ ಇತ್ತಿನ ಇಂಗ್ಲಿಷ್ ಬಾಸೆದ ಮುದ್ರಣ ಮಲ್ಪರ ಗಲಸೊಂದಿತ್ತಿನ ಪೋಟೊ ಟೈಪ್‌ಸೆಟ್ಟಿಂಗ್ ಮಿಶನ್‌ನ್, ಭಾರತೀಯ ಬಾಸೆಲೆಡ್ ಮುದ್ರಣ ಮಲ್ಪರ ಆಪಿಲೆಕ ಬದಲಾವಣೆ ಮಲ್ತೆರ್. ವಿದ್ಯುನ್ಮಾನ ರೂಪೊಡು ಸಿಂಧೂ ಲಿಪಿಟ್ ಸುರುತ ಸರ್ತಿ ಬರೆತಿನ ಬೂಕುನು ಟಾಟಾ ಪ್ರೆಸ್‌ದಕುಲು ಪ್ರಕಟಿಸಾಯೆರ್.

ಟಾಟಾ ಪ್ರೆಸ್‌ದಕುಲು, ಕಂಪ್ಯೂಟರ್ ಅಕ್ಷರ ವಿನ್ಯಾಸ ಆಧರಿಸಾದ್ ಅಚ್ಚಿ ಪಾಡುನ ಒಂಜಿ ಟೈಪ್ ಸೆಟ್ಟಿಂಗ್ ಮಿಶನ್‌ನ್ ಅಮೇರಿಕಾ ದೇಸೊದ ಚಿಕಾಗೊದ ಕಂಪೆನಿ ಆಲ್ಫಾ ಟೈಪ್ ಕಂಪೆನಿದಕುಲೆಡ ದೆತೊಂದೆರ್. ಈ ಮಿಶನ್‌ದ ನಿರ್ವಹಣೆ, ಸರ್ವೀಸ್ ಮಾತ ಕಲ್ಪರ ಪ್ರೆಸ್‌ದಕುಲು ಕೆಪಿ ರಾಯೆರೆನ್ ಚಿಕಾಗೋಗು ಕಡಪುಡ್ದು ಕೊರಿಯೆರ್. ಅಲ್ಪ ಮಿಶನ್‌ದ ನಿರ್ವಹಣೆ ಕಲ್ತೊಂದಿತ್ತಿಲೆಕನೆ, ಭಾರತೀಯ ಬಾಸೆಲೆನ್ ಕಂಪ್ಯೂಟರ್ ಅಕ್ಷರ ವಿನ್ಯಾಸ ಆಧರಿಸಾದ್ ಅಚ್ಚಿ ಪಾಡುನ ಬಗ್ಗೆ ಸಂಸೋದನೆಲೆನ್ ಮಲ್ತೆರ್. ಅಂಚನೆ ಇಡೆ ಮುಟ್ಟ ಸರಿಕಟ್ಟಾದ್ ತೆರ್ಯಂದೆ ಇಪ್ಪುನ ಸಿಂಧೂ ಲಿಪಿಕ್ಕ್, ಐತ್ತ ಅಚ್ಚಿ, ವಿಚಿತ್ರವಾಯಿನ ಚಿಹ್ನೆಲೆಗ್ ಸರಿ ಹೊಂದಿಲೆಕ ಲಿಪಿ ವಿನ್ಯಾಸ ಮಲ್ಪುನ ಮಾಮಲ್ಲ ಜವಾಬ್ದಾರಿ ಕೆಪಿ ರಾಯೆರೆಗ್ ಕೊರಿಯೆರ್.