ಇಂದಿರಾ ಪ್ರಿಯದರ್ಶಿನಿ ಗಾಂಧಿ(19 ನವೆಂಬರ್ 1917–31 ಅಕ್ಟೋಬರ್ 1984) 1977 ಡ್ದ್ ಸತತವಾದ್ ಮೂಜಿ ಸರ್ತಿ ಭಾರತದ ಗಣತಂತ್ರೊದ ಪ್ರಧಾನ ಮಂತ್ರಿಯಾದಿತ್ತೆರ್ ಬೊಕ್ಕ ನಾಲ್ನೇ ಸರ್ತಿ 1980–1984 ಮುಟ್ಟ(ಆರ್ನ ಹತ್ಯೆ ಮುಟ್ಟ), ಒಟ್ಟು ಪದಿನೈನ್ ವರ್ಸೊ ಕಾಲೋ, ಪ್ರಧಾನ ಮಂತ್ರಿಯಾದ್ ಅಧಿಕಾರೊಡಿತ್ತೆರ್.
ಆರ್ ಭಾರತದ ಸುರುತ ಪೊಂಜಾವು ಪ್ರಧಾನ ಮಂತ್ರಿ. ಇನಿ ಮುಟ್ಟ ಆ ಸ್ಥಾನೊನು ಆರೆ ಆ ಪುದರ್ ಒರಿಪಾವೊಂದೆರ್.
ಇಂದಿರಾ ಗಾಂಧಿ ಅಲಹಾಬಾದ್ಡ್ ರಾಜಕೀಯ ಪ್ರಭಾವ ಇತ್ತಿನ ನೆಹರೂ ಕುಟುಮೊಡ್ ಪುಟ್ಟುದೆರ್. ಭಾರತೊಗ್ ಸ್ವತಂತ್ರ ತಿಕ್ಕಿನ ಬೆರಿಕ್ ಸುರೂತ ಪ್ರಧಾನಿಯಾಯಿನ ದಿ|ಜವಾಹರ್ ಲಾಲ್ ನೆಹರೂ ಬೊಕ್ಕ ಕಮಲಾ ನೆಹರೂ ದಂಪತಿಲೆನ ಒರ್ತಿಯೆ ಮಗಲ್. ರಾಜಕೀಯೊಡ್ ಪ್ರಭಾವ ಇತ್ತಿನ ಮೋತಿಲಾಲ್ ನೆಹರೂ ಮೆರೆನ ಅಜ್ಜೆರ್. ಆರ್ ಎಲ್ಲಿಡ್ ಅಲಹಾಬಾದ್ಡ್ ಪುಟ್ಟಿನ ಇಲ್ಲಡೆ ಬಲತೆರ್. ಬೊಕ್ಕ ಒಂತೆ ಸಮಯ ಆರೆನ ಅಪ್ಪೆನೊಟ್ಟಿಗೆ ಸ್ವಿಟ್ಜರ್ಲಾಂಡ್ಡ್ ಕರಿತೆರ್. ೧೯೪೨ ಮಾರ್ಚ್ ೨೬ಕ್ ಫ಼ಿರೋಜ್ ಗಾಂಧಿನ್ ಮದಿಮೆ ಆಯೆರ್. ರಾಜೀವ್ ಗಾಂಧಿ ಬೊಕ್ಕ ಸಂಜಯ್ ಗಾಂಧಿ ಅರೆನ ರಡ್ಡ್ ಆನ್ ಜೋಕುಲು.
ಆರ್ ಸ್ವಿಟ್ಝರ್ಲ್ಯಾಂಡ್, ಜಿನೇವಾ, ಪೂನಾ, ಮುಂಬಯಿ, ಬ್ರಿಸ್ಟಲ್, ವಿಶ್ವಭಾರತಿ, ಶಾಂತಿನಿಕೇತನ ಬೊಕ್ಕ ಆಕ್ಸ್ಫ಼ರ್ಡ್ ಕಾಲೇಜಿಲೆಡ್ ಬರವು ಕಲ್ತೆರ್.
(೧೯೬೬-೧೯೭೧) ೧೯೪೭ನೇ ಇಸವಿ ಆಗಸ್ಟ್ ೧೫ನನೇ ತಾರೀಕ್ಗ್ ನಮ್ಮ ದೇಶೊಗ್ ಇಂಗ್ಲಿಷ್ ದಕ್ಲೆನ ಕೈರ್ದ್ ಬುಡುಗಡೆ ತಿಕ್ಕ್ಂಡ್. ಜವಹರ್ ಲಾಲ್ ನೆಹರೂ ದೇಶೊದ ಸುರೂತ ಪ್ರಧಾನ ಮಂತ್ರಿಯಾದ್ ಅದಿಕಾರೊ ದೆತೊನ್ಯೆರ್. ೧೯೬೪ನೇ ಇಸವಿಡ್ ನೆಹರೂ ತೀರ್ಪೋಯೆರ್. ಅಪಗ ಲಾಲ್ ಬಹದೂರ್ ಶಾಸ್ತ್ರಿಲು ಪ್ರಧಾನ ಮಂತ್ರಿ ಆಯೆರ್. ಆರ್ ೧೯೬೬ನೇ ಇಸವಿಡ್ ಜನವರಿ ೧೧ತಾರೀಕ್ಗ್ ಲಾಲ್ ಬಹದೂರ್ ಶಾಸ್ತ್ರಿಲು ತೀರ್ಯೆರ್. ಜನವರಿ ೨೪ನೇ ತಾರೀಕ್ಗ್ ಇಂದಿರಾಗಾಂಧಿ ಪ್ರಧಾನ ಮಂತ್ರಿಯಾದ್ ಅದಿಕಾರೊ ದೆತೊನ್ಯೆರ್. ಮೇರ್ ಪ್ರಧಾನ ಮಂತ್ರಿಯಾಯಿನ ಕಾಲೊಡೇ ಕಾಂಗ್ರೆಸ್ ಪಕ್ಷೊಡು ಉಲಬೇದೊಲು ಸುರುವಾಂಡ್. ಕಾಂಗ್ರೆಸ್ ಪಕ್ಷೊದ ಉಲಯಿ ರಡ್ಡ್ ಗುಂಪುಲಾಂಡ್. ಒಂಜಿ ಇಂದಿರಾಗಾಂದಿಯೆರ್ನ ಮುತಾಲಿಕೆದ ಸಮಾಜವಾದಿಲೆನ ಗುಂಪು. ಬೊಕ್ಕೊಂಜಿ ಮೊರಾರ್ಜಿದೇಸಾಯಿಯೆರೆನ ಮುತಾಲಿಕೆದ ಸಂಪ್ರದಾಯವಾದಿಲೆನ ಗುಂಪು.೧೯೬೭ನೇ ಇಸವಿದ ವೋಟ್ದ ತೀರ್ಪುಡ್ ಈ ಉಲಬೇದದ ಮಲ್ಲ ಪರ್ನಾಮ ಮಲ್ತ್ಂಡ್. ಲೋಕಸಬೆತ ೫೪೫ ಸ್ಥಾನೊಲೆಡ್ ೨೯೭ ಸ್ಥಾನೊಲೆನ್ ಕಾಂಗ್ರೆಸ್ ಗೆಂದ್ಂಡ್. ೬೦ ಸ್ತಾನೊಲು ಕಾಂಗ್ರೆಸ್ ದ ಕೈ ಬುಡ್ಂಡ್. ಮೊರಾರ್ಜಿ ದೇಸಾಯಿ ಉಪಪ್ರಧಾನಿ ಬೊಕ್ಕ ಪನವುದ ಖಾತೆಗ್ ಮಂತ್ರಿಯಾಯೆರ್. ಈ ಸಮಯೊಡ್ ದೇಸಾಯಿಯೆರ್ನೊಟ್ಟುಗ್ ಅಭಿಪ್ರಾಯೊ ಬೇದ ಇತ್ತಿನೆಡ್ದಾತ್ರ ೧೯೬೯ಡನೇ ಇಸವಿಡ್ ಭಾರತೀಯ ರಾಷ್ಟ್ರೀಯ ಕಾಂಗ್ರೆಸ್ ರಡ್ಡ್ ಭಾಗ ಆಂಡ್. ಗಾಂಧಿಯೆರ್ ಸಮಾಜವಾದಿ ಬೊಕ್ಕ ಕಮ್ಯುನಿಸ್ಟ್ ಪಕ್ಷೊಲೆನ ಬೆರಿಸಾಯೊಡ್ ದುಂಬದ ರಡ್ಡ್ ವರ್ಸೊಡ್ ಆಡಳಿತ ಮಲ್ತೆರ್. ೧೯೬೯ನೇ ಇಸವಿಡ್ ದೇಶದ ಖಾಸಗಿ ಬ್ಯಾಂಕ್ಲೆನ್ ರಾಷ್ಟ್ರೀಕರಣ ಮಲ್ತೆರ್.
ಪಾಕಿಸ್ಥಾನದ ಸೈನ್ಯಪಡೆತಕ್ಲು ಮುಡಾಯಿ ಮೈಟ್ ಉಪ್ಪುನ ಅಲ್ತ ಪ್ರಜೆಕ್ಲೆಗ್ ಉಪದ್ರ ಕೊರೊಂದಿತ್ತೆರ್. ಅಲ್ತ ಜನೊಕುಲು ನಮ್ಮ ದೇಶೊಗ್ ಪಾರ್ ಬತ್ತೆರ್. ಅಕ್ಲೆಗ್ ಆಸರೆ ಕೊರ್ಪಿನವು ನಮ್ಮ ದೇಶೊಗ್ ಮಲ್ಲ ಪುದೆಯಾಂಡ್.
This article uses material from the Wikipedia ತುಳು article ಇಂದಿರಾ ಗಾಂಧಿ, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). ಪ್ರತ್ಯೇಕವಾದ್ ಉಲ್ಲೇಕ ಮಲ್ಪಂದೆ ಇತ್ತ್ಂಡ, ವಿಸಯ "CC BY-SA 4.0" ದ ಅಡಿಟ್ ಲಬ್ಯ ಉಂಡು. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ತುಳು (DUHOCTRUNGQUOC.VN) is an independent company and has no affiliation with Wiki Foundation.