ಎಸ್.ಯು.ಪಣಿಯಾಡಿ (ಶ್ರೀನಿವಾಸ ಉಪಾಧ್ಯಾಯ ಪಣಿಯಾಡಿ) ಮೇರ್ ತುಳು ಚಳುವಳಿ ಸುರುಮಲ್ತಿನ ಗಣ್ಯೆರ್.
ಧರ್ಮಶಾಸ್ತ್ರೊದ ಪುದರ್ ಡ್ ವಿಧವೆ, ಬಾಲ್ಯವಿವಾಹದಂಚಿನ ಕಟ್ಟ್ ಲೆನ್ ಅತ್ಯಾಚಾರಪಂಡ್ದ್ ಅವೆನ್ ವಿರೋಧ ಮಲ್ತ್ದ್, ಸಾಮಾಜಿಕ ಕ್ರಾಂತಿದ ಪುದರ್ ಡ್ ಶೀತಲ ಯುದ್ದೊಗ್ ಜನ್ಮ ಕೊರ್ದು ಗಾಂದೀಜಿನ ಮನದಾಸೆನ್ ಕರಾವಳಿ ಪ್ರದೇಸೊಡು ಪಸರಿಸಾವರೆ ಬೆಂದಿನ ಕೆಂಪಂಗಿಯ ಯುವಕ ಪಂಡ್ದೇ ಪ್ರಸಿದ್ದಿ ಪಡೆಯಿನಾರ್ ಎಸ್.ಯು.ಪಣಿಯಾಡಿ.ಮೆರೆನ ನಿಜನಾಮೊ ಶ್ರೀನಿವಾಸ ಉಪಾಧ್ಯಾಯ. ಉಡುಪಿದ ಸೋದೆಮಠೊರ್ದ್ ಚೂರು ದೂರೊಡು ತಿಕ್ಕುನ ಪಣಿಯಡಿ ಬೈಲು ಪನ್ಪಿನ ಬೆನ್ನಿ ಬೆನ್ಪಿನ ಕಂಡೊದ ಸಾಲ್ಲೆಡ್ ಮೆರೆನ ಇಲ್ಲ್ ಉಂಡು.
ಶ್ರೀನಿವಾಸ ಉಪಾಧ್ಯಾಯ ಪಣಿಯಾಡಿ | |
---|---|
ಪುಟ್ಟಿನ | ಶ್ರೀನಿವಾಸ ಉಪಾಧ್ಯಾಯ 4 ಏಪ್ರಿಲ್ 1897 ಉಡುಪಿಜಿಲ್ಲೆ |
ಮರಣ | 13 ಸೆಪ್ಟೆಂಬರ್ 1959 |
Known for | ಸಮಾಜ ಸೇವೆ |
ಸಂಗಾತಿ | ಭಾರತಿ |
ಪಾಲಕರುs |
|
ಪಣಿಯಾಡಿದಾರೆನ ಅಮ್ಮೆರ್ ವಾದಿರಾಜ ಉಪಾಧ್ಯಾಯ. ಅಪ್ಪೆ ಯಮುನಾ. ಎಸ್.ಯು.ಪಣಿಯಾಡಿದಾರ್ (೧೮೯೭ನೇ ಏಪ್ರಿಲ್ ೪ನೇ ತಾರೀಕ್ದಾನಿ ಪುಟ್ಟಿಯೆರ್ - 1959 ತೀರಿಯೆರ್). ಪಣಿಯಾಡ್ದಾರೆನ ಪೂರ ಪುದರ್ ಶ್ರೀನಿವಾಸ ಉಪಾಧ್ಯಾಯ. ಶಿವಳ್ಳಿ ಬ್ರಾಣೆರೆ ಕುಟುಮೊಗು ಸೇರ್ದಿನ ಆರೆನ ಊರು ಪಣಿಯಾಡಿಬೈಲ್. ಒಡಿಪು ರಥಬೀದಿಗ್ ಮುಟ್ಟ ಈ ಬೈಲ್ ಉಂಡು. ಪಣಿಯಾಡಿದಾರ್ ಉಡ್ಪಿಡ್ ಒಂತೆ ವರ್ಸೊ ಕನ್ನಡ,ಸಂಸ್ಕೃತ,ಇಂಗ್ಲಿಷ್ ಕಲ್ತೆರ್. ಸಂಸ್ಕೃತೊಡು ನಣಾದ್ ಎಚ್ಚ ಕಲಿವಿಕೆಗಾತ್ರೊ ಸುರುಗು ಮೈಸೂರುಗು ಬೊಕ್ಕ ಮದ್ರಾಸ್ಗ್ ಪೋಯೆರ್. ಸಂಸ್ಕೃತ ಶಿರೋಮಣಿ ಪರೀಕ್ಷೆಡ್ ಬಂಗಾರ್ದ ಪದಕೊ ಪಡೆಯೆರ್.
ಆರೆನ ಉದ್ಯೋಗ ಜೀವನ ಗುಜರಾತ್ಡ್ ಸುರುವಾಂಡ್. ಬರೋಡಾದ ಲೈಬ್ರರಿಡ್ ಉದ್ಯೋಗೊಗು ಸೇರ್ಯೆರ್. ಅಲ್ಪ ಮೂಜಿ ವರ್ಸೊ ಇತ್ತೆರ್. ಆಸಮಯೊಡು ಗುಜರಾತ್ಡ್ ಸ್ವತಂತ್ರ ಸಂಗ್ರಾಮೊ ದಗದಗ ಉರಿಯೊಂದಿತ್ತ್ಂಡ್. ತನ್ನ ಪುಟ್ಟೂರುಡು ಸ್ವತಂತ್ರ ವಿಜಯಘೋಷಣೆ ಆವೊಡು ಪಂಡ್ದ್ 1923 ಡ್ ಬೇಲೆನ್ ಬುರ್ದು ಉಡುಪಿಗ್ ಪಿರ ಬತ್ತೆರ್. ಅವೆರ್ದ್ ಬೊಕ್ಕ ರಾತ್ರೆ ಪಗೆಲ್ ಕರಾವಳಿಡ್ ಸಾಂಸ್ಕೃತಿಕ ಅಂಚನೆ ಸ್ವತಂತ್ರ ಚಳುವಳಿನ್ ಪುಟ್ಟು ಪಾರ್ದ್ ಪದಿನೇಲ್ ವರ್ಷ ಮುಲ್ಪ ಅವೆಕ್ಕ್ಂದೇ ಬೆಂದೆರ್.
1923 ನೇ ಇಸವಿಡ್ ಶ್ರೀನಿವಾಸೆರ್ ಮದ್ಮೆ ಆಯೆರ್. ಉಡುಪಿದ ಪ್ರಸಿದ್ದ ಮಧ್ವಸಿದ್ದಾಂತ ಗ್ರಂಥಾಲಯೊದ ಸ್ಥಾಪಕೆ ಪಾವಂಜೆ ಗುರುರಾಯೆರ್ನ ಮಗಲ್ ಭಾರತಿ ಶ್ರೀನಿವಾಸೆರೆನ ಬೊಡೆದಿ. ಅವೆರ್ದ ಬೊಕ್ಕ ಉಡುಪಿಡೇ ತನ್ನ ಪಿತ್ರಾರ್ಜಿತ ಆಸ್ತಿಡ್ ಇಲ್ಲ್ ಕಟ್ಟ್ ದ್ ಮೆಗ್ಯ ಪಲಯೆನಕ್ಲ್ ಒಟ್ಟಿಗೆ ಕುಲ್ಲಿಯೆರ್. ಸ್ವತಂತ್ರ ಚಳುವಳಿ, ಲೇಕನೊ, ಸಮಾಜಸೇವೆದೊಟ್ಟುಗ್ ಶ್ರೀನಿವಾಸೆರ್ ಉಡುಪಿನ್ ಬುಲೆಪಾವುನ ಪ್ರಯತ್ನೊನ್ ಮಲ್ತೆರ್. ಅವೆತ್ತ ಫಲ ಪ್ರಕಾರೊ ತುಳುನಾಡು ಪ್ರೆಸ್, ಖಾದಿ ಭಂಡಾರಿ, ಸಪ್ಲೈ ಏಜೆನ್ಸಿ ಇಂಚಿನ ವ್ಯಾಪಾರೊಲು ಉಡುಪಿಡ್ ಪುಟ್ಟುಂಡ್.
ತುಳುಬಾಸೆಗಾತ್ರೊ ಆರೆನ ಸೇವೆ ಮಾಮಲ್ಲ.ತುಳುನಾಡ ಪ್ರೆಸ್, ತುಳು ಸಾಹಿತ್ಯಮಾಲೆ, ತುಳು ಕಾದಂಬರಿ, ತುಳು ವ್ಯಾಕರಣ ಬರೆದ್ ಮಾಮಲ್ಲ ಕೆಲಸೊ ಮಲ್ತೆರ್. ಸ್ವದೇಶಿ ಚಳುವಳಿತ್ತ ಪುದರ್ಡ್ ಆರ್ ಸುರು ಮಲ್ತಿ ಬ್ಯಾಂಕ್- ತುಳುನಾಡ್ ಬ್ಯಾಂಕ್, ತುಳು ಚಳುವಳಿ ಉಂದೆಗಾತ್ರೊ ಆರ್ ಏತೋ ತ್ಯಾಗ ಮಲ್ತೆರ್.
ತನ್ನ ಜೀವನೊದ ಕಡೆತ್ತ ಘಟ್ಟೊಡ್ ಶ್ರೀನಿವಾಸೆರ್ ಮಸ್ತ್ ಕಷ್ಟ ಬೈದೆರ್. ಕಟ್ಟಿನ ಕನೊ ನಿಜ ಆವಂದೆ ಪೋಂಡು. ದಕ್ಷಿಣ ಕನ್ನಡ ಜಿಲ್ಲೆ ತುಳುನಾಡ್ ಪಂಡ್ದ್ ಆವೊಡು, ಅವ್ಲು ತುಳು ಬಾಸೆ ಕಲ್ಪಾವುನ ಸಾಲೆ ಉಪ್ಪೊಡು, ತುಳುಟ್ಟೇ ಪುಸ್ತಕೊಲು ಪ್ರಕಟ ಆವೊಡು, ತುಳು ಆಡಳಿತ ಬಾಸೆ ಆವೊಡು ಇಂಚ ಮಾತ ಸಾರ ಕನೊನು ತೂದಿತ್ತೆರ್ ಶ್ರೀನಿವಾಸೆರ್. ಅವ್ ಒವ್ಲಾ ಈಡೇರಂದೆ 13 ಸೆಪ್ಟೆಂಬರ್ 1959 ಗ್ ಹೃದಯಾಘಾತವಾದ್ ಮೇರ್ ತೀರಿಯೆರ್.
ಉಡುಪಿದ ತುಳುಕೂಟ ಪ್ರತಿವರ್ಷ ತುಳು ಕಾದಂಬರಿ ಸ್ಪರ್ದೆನ್ ದೀದ್ ಸುರೂತ ಸ್ಥಾನ ಪಡೆಯಿನಕ್ಲೆಗ್ ಪಣಿಯಾಡಿ ಮಾನಾದಿಗೆನ್ ಕೊರ್ಪಿನ ಮೂಲಕ ಎಸ್.ಯು.ಪಣಿಯಾಡಿ ಮೆರೆನ ಪುದರ್ ಶಾಶ್ವತವಾದ್ ಒರಿಪುಲೆಕ ಮಲ್ದ್ಂಡ್.
This article uses material from the Wikipedia ತುಳು article ಎಸ್.ಯು.ಪಣಿಯಾಡಿ, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). ಪ್ರತ್ಯೇಕವಾದ್ ಉಲ್ಲೇಕ ಮಲ್ಪಂದೆ ಇತ್ತ್ಂಡ, ವಿಸಯ "CC BY-SA 4.0" ದ ಅಡಿಟ್ ಲಬ್ಯ ಉಂಡು. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ತುಳು (DUHOCTRUNGQUOC.VN) is an independent company and has no affiliation with Wiki Foundation.