Prishtina Hackerspace: Hapësirë bashkëpunuese për art, shkencë dhe teknologji

E nisur ne vitin 2016, nga organizata FLOSSK , nëpërmjet një fushate të suksesshme në Kickstarter, janë siguruar mjetet për krijimin e hapësires që është e hapur për popullaten e përgjithshme, dhe në veçanti rinisë që ka interesim të eksperimentojë në lëminë e teknologjisë, shkencës dhe artit.E krijuar fillimisht si zgjidhje ndaj mangësive që hasen në sistemin arsimor të Kosovës në fushën e teknologjise, si dhe mungesës së hapësirave krijuese në disciplina të ndryshme.

Një numër i madh i pajisjeve dhe orendive janë dhuruar si donacion nga organizata dhe individe të ndryshëm, gjë që ka mundësuar që një hapësirë e braktisur të përshtatet në një vend ku profesionistë të ndryshëm kanë qasje në vegla dhe teknologji të avancuar për të punuar dhe eksperimentuar. Sipas fushatës, hapësira do të mirëpret të gjithë individët të orientuar nga teknologjia, kultura digjitale duke përfshire: programerët, krijuesit, grupe punuese teknologjike, zanatlinj, artistë digjital etj.

Në hapësiren e Prishtina Hackerspace gjinden resurse te ndryshme në dispozicion sikur: 3D printerë, dhomë e elektronikës, punëtori me vegla industriale për metal dhe dru si dhe një punëtori për prodhimin e birrës artizanale. Hapësira është në dispozicion për këdo që anëtarsohet me pagesë, ku nëpërmjet mjeteve të grumbulluara nga anëtarsia mbulohen shpenzimet e përditshme dhe mirëmbajtja.

Prishtina Hackerspace ka qenë dhe është nikoqire e lloj-lloj aktivitetesh në lëminë e teknologjise informative, ndër to shquhen:

MiniDebConf Prishtina (2017) - punëtori dhe diskutime rreth temave që ndërlidhen me software të hapur dhe Debian.

Tech & Beer - aktivitet joformal social, ku mblidhet komuniteti i teknologjisë informative, zhvilluesit, programerët, ndërmarrësit, akademikët, blogerët të cilët kanë dëshirë të takohen dhe shkëmbejnë përvojat profesionale.

Prishtina Open-source Festival - aktivitet i fokusuar në punëtori, prezantime dhe diskutime lidhur me lëminë e hardware-it dhe software-it me burim të hapur.

Software Freedom Kosova - Festival vjetor që bashkon zhvilluesit, përdoruesit, ndërmarrësit dhe entuzijastët e teknologjisë së hapur nëpërmjet prezantimeve, trajnimeve dhe punëtorive.

Si vendtakim i një komuniteti me prapavi të larmishme, ka plot aktivitete që organizohen nga komuniteti sipas dëshires.