Libër Jam Evropë!

Ideja e Evropës është artikuluar brenda ligjërimeve për identitetin kombëtar, duke qenë në shumicën e rasteve një simbol i fuqishëm i orvatjeve për konstituimin dhe modernizimin e shoqërive kombëtare. Në debatet politike kombëtare, "Evropa" më shpesh shfaqet si një përmasë e identitetit kombëtar se sa si një projekt për kapërcimin e tij.

Edhe atëherë kur intelektualë nga hapësira të ndryshme kanë shkruar mbi Evropën dhe i janë drejtuar një publiku mbarë-evropian, ata zakonisht kanë shkruar në gjuhët e tyre dhe janë ndikuar prej kontekstit të tyre kombëtar. "Evropa" është thirrur në ndihmë për të zgjidhur probleme të brendshme të shtetit ose problemet dhe debatet e kombit janë projektuar në hapësirën evropiane.

Libri "Jam Evropë!" hulumton në mënyrë kritike përdorimet e idesë së Evropës në tekstet e intelektualëve shqiptarë gjatë viteve 1918–1939 dhe 1989–2006 duke i vendosur ata në një plan krahasues me konceptimet për Evropën dhe projektet e bashkimit të kontinentit që paraqiten nga disa intelektualë evropianë të kohës.

Analiza e shkrimtarit Sulstarova për idenë e Evropës ka ardhur në kohën e duhur, pikërisht atëherë kur Shqipëria dhe kombi shqiptar në Ballkan po synojnë integrimin në Bashkimin Evropian.

Libri rekomandohet sidomos për studiuesit e sociologjisë, shkencave politike, studimeve evropiane dhe historisë së mendimit.

• Gjinia: Shkenca politike
• Autori: Enis Sulstarova
• Shtëpia botuese: Logos A
• Viti i botimit: 2012
• Faqet e librit: 464
• ISBN 978-9989-58-430-5

• Në pasqyrën e Oksidentit: Studime dhe artikuj

• Shtëpia e Librit: Jam Evropë! nga Enis Sulstarova
• Jam Evropë! - Pjerrina e Evropës dhe orientalizmi shqiptar