Sanna Marin: Syemmilâš politikkár já Suomâ uáiviminister (2019–2023)

skammâmáánu 16. peeivi 1985, Helsig, Suomâ) lii syemmilâš politikkár, kii tooimâi Suomâ uáiviministerin juovlâmáánu 10. peeivi 2019 – kesimáánu 19. peeivi 2023. Sun lii Suomâ kuálmád nissoonuáiviminister já Suomâ historjá nuorâmus uáiviminister, 34-ihásâžžân. Marin lii meid Suomâ kuhesáigásumos nissoonuáiviminister.

Sanna Marin šoodâi Helsigist, mutâ lii aassâm meid Espoost. Škovlâivijdis sun aasâi Pirkkalast, kost sun meid čaalij pajeuáppen ive 2004. Tááláá ääigi sun áásá Tamperest, Kaleva kaavpuguásist, kost sun lii aassâm ive 2007 rääjist. Ton ive sun algâttij uápuidis Tampere ollâopâttuvâst, kost sun luuvâi haldâttâhtiettuu. Sun valmâštui maisterin ive 2017.

Marin lii toimâm aktiivlávt politiikist ive 2006 rääjist. Suomâ ovdâskoodán suu väljejii vuossâmuu keerdi ive 2015, kuás sun finnij 10 911 jiennâd. Ive 2019 vaaljâin sun finnij 19 088 jiennâd. Ovdâskoddeest sun lii lamaš jesânin stuorrâ váljukoddeest, lahâváljukoddeest já pirâsváljukoddeest. Kesimáánust juovlâmáánun 2019 Marin tooimâi Rinne haldâttâs Suomâ jotolâh- já viestâdemministerin.

Marin lii meid Tampere kaavpugaairâs já tooimâi váldustiivrâ saavâjođetteijen iivij 2013−2017. Sosiaaldemokraatlij värisaavâjođetteijen sun lii lamaš ive 2014 rääjist, kuás suu väljejii nubben värisaavâjođetteijen. Ive 2017 suu väljejii vuosmuš värisaavâjođetteijen.

Suomâ uáiviministerin Marin šoodâi juovlâmáánu 10. peeivi 2019.

Ive 2023 Marin vuoitij Helmut Schmidt -puátteevuotâpalhâšume. Palhâšume keigejui sunjin tuorâstuv vyesimáánu 4. peeivi 2023 Hamburist. Palhâšume tuámmárjuávhu mield Marin lii vuáittám palhâšume, tastko sun lii oovdâstjottee eurooplâš, kiäst láá čielgâ áárvuh já jieijâs pooliitlâš stijlâ.

Marin pajasšoodâi arvetävgiperrust enijnis já eenis kuoimijn. Eejis sun ij lah eidu uáinám elimis ääigi, ko eeči varrij meddâl talle ko Marin lâi vala aaibâs ucce. Marin lii vuosmuš suu perrust kii lii valmâštum ollâopâttuvvâst.

Marin lii näimilittoost Markus Räikkösáin. Sunnui šoodâi nieidâ uđđâivemáánust 2018. Perrust lii fastâ päikki Tamperest. Marin uáiviministerpaje sij assii kuittâg Kesärantast, mii lii toimâm uáiviminister virgeaassâmsaijeen ive 1919 rääjist. Vyesimáánust 2023 Marin almottij, ete suoi iäránává.