Popai

Custu artìculu est iscritu cun sa grafia Limba Sarda Comuna. Abbàida sas àteras bariedades gràficas:

Popai (Popeye) est unu personàgiu immaginàriu istadunidensu creadu dae Elzie Crisler Segar, chi aparit in fumetos periòdicos e in cartones animados tzinematogràficos e televisivos. Su personàgiu at fatu s'esordidu suo su 17 de ghennàrgiu 1929 me is fumetos Thimble Theatre, chi a pustis ant cambiadu nòmine in Popeye.

Est unu de is prus personàgios famados de fumetu de semper. Est essidu chitzo populare meda, difatis in su 1933 dd'ant dedicadu una sèrie de film animados tzinematogràficos curtzos realizados dae is Fleischer Studios, intitulada Popeye the Sailor, essida luegus pobulare meda, a su puntu chi sa fama sua est oe in die prus ligada a cussa.

In su cursu de is annos su personàgiu est apartu fintzas in libros a fumetu, cartones animados televisivos, in video-giogos, publitzidades e merchandising; in su 1980 su regista Robert Altman nd'at fatu unu film; in su 2002 TV Guide at classificadu su personàgiu a su de 20 logos in sa lista sua de is 50 personàgios majores de totu is tempus, mentras LiveAbout dd'at classificadu in su de 8 logos. In su 1995 est istada una de is binti sèries a fumentu inclùdidas me in sa sèrie de francubullos de ammentu istadunidensa Comic Strip Classics.

Popai est unu marineri, liuscu de un'ogru, cun una pipa semper in buca; tenet unu corpus musculosu cun bratzos grussos e ancas curtzas cun su tatyuàgiu de un'àncora. Amoradu cun Olivia Oyl, su personàgiu, rude e agrestosu, est un'eroe chi sucurret fèminas in perìgulu e bivet aventuras istraordinàrias in giru pro su mundu. Ammànniat sa fortza sua, giai ispantosa, papende ispinàtzios.

Sende chi Popai est unu personàgiu forte meda e chi si creiat chi s'ispinàtziu esseret un'alimentu ricu meda de ferru, s'assòtziu de s'ispinàtziu cun sa fortza de su personàgiu est istètida impreada pro sa publitzidade . Po s'agiudu chi su personàgiu at donadu a s'economia issoro, is massajos de una localidade de su Texas, Crystal City, dd'ant istantargiadu un'istàtua pro ddi torrare gràtzias.

S'assòtziu Tramudadas de Pabillonis at aparitzadu unos cantos cartones cun boghes in lìngua sarda, publichende·ddos in s'incumentzu in su Web. In su 2021 Telesardegna at trasmìtidu is òperas in su programma Popai su marineri, presentadu dae Antoni Ignàtziu Garau, a incuru de NOR Edizioni.