Fins - Federatzione Isport Natzionale Sardu: Federatzione isportiva de sas iscuadras natzionales sardas

Custu artìculu est iscritu cun sa grafia Limba Sarda Comuna. Abbàida sas àteras bariedades gràficas:

Sa Federatzione Isport Natzionale Sardu, mègius nota cun sa sigla FINS, est s'òrganu de organizatzione e controllu de sas iscuàdras natzionales de sa Sardigna, e si ocupat de de fùbalu a 11, fùbalu a 5, tiru isportivu e pesada de potèntzia (powerlifting).

Sa faina sua incumentzat in su 2012. Gràtzias a sas initziativas culturales de su partidu polìticu indipendentista ProgReS, benit creada sa Federatzione Isport Natzionale Sardu (FINS), cun s'obietivu de sa creatzione de issèberos natzionales sardos, non limitadas a su fùbalu ebbia. Sas primas esperièntzias difatis sunt relativas a sa creatzione de sa Natzionale de fùbalu a 5, chi siat in su 2012 siat in su 2013 intrat in campu in antis in Fordongianus e a pustis in Nùgoro pro duas amistosas cun s'issèberu omòlogu de sa Catalugna.

In su matessi tempus, in su 2013, pro neghe de de s'arribu malasortadu in Sardigna de su Tziclone Cleopatra, chi at causadu 19 vìtimas, sa sotziedade sarda aiat torradu a propònnere sa costitutzione de un'issèberu de fùbalu, fintzas petzi pro un'amistosa de benefitzèntzia in gradu de collire dinare pro sas vìtimas e pro sa ricostrutzione de sos tzentros abitados corfidos dae sa perturbazione. Pro s'organizatzione si fiat ofertu su giornalista de Assèmini Vittorio Sanna, radiocronista de sas partidas de su   Cagliari pro s'emittente privada Radiolina e si fiat postu in cuntatu cun sos medas giogadores professionistas sardos de s'època. A s'incumintzu s'organizatzione cheriat fàghere un'amistosa contra su matessi   Cagliari , ma su chi tando fiat presidente, Massimo Cellino, no aiat dadu su cunsensu. A pustis s'aiat intentadu, duncas, de organizare un'àtera amistosa contra sa Còrsica e fiat istada fissada fintzas sa data a maju de s'annu imbeniente, ma a sa fine no si nd'aiat fatu prus nudda.

Petzi 5 annos a pustis sos progetos de Sanna e s'organizatzione de sa FINS ant tentu sutzessu e su 13 de santugaine de su 2018 sa federatzione at annuntziadu s'afiliatzione a sa CONIFA (Confederation of Independent Football Associations).

Dae martzu 2019 est intradu in sa FINS s'assòtziu Hunter Field Target Sardigna, chi s'ocupat de tiru isportivu e at organizadu, su 31 de cussu mese, su primu Campionadu Sardu de cuss'isport isseberende de lu fàghere in Boroneddu. A pustis, in su mese de làmpadas de su matessi annu, at pigadu parte a sos mundiales in Polònia.

Dae cabudanni 2019, imbetzes, est intrada in sa FINS sa SARDFPA (Sardinia Drug-Free Powerlifting Association), federatzione indipendente sarda pro sas pesadas de potèntzia, affiliada a sa WDFPF (World Drug-Free Powerlifting Federation). Custu assòtziu aiat organizadu, in su mese de trìulas antepostu, sos primos Campionados Natzionales Sardos de panca e istacos dae terra in Aristanis, cun sa presèntzia de su presidente de sa WDFPF Wim Backelant. Semper in cabudanni sa SARDFPA at isseberadu de pigare parte a sos Campionados Euopeos, in Inghilterra, in su matessi mese, e a cussos Mundiales in Germània de santugaine 2019. E, in su mese de santandria 2019, at isseberadu de organizare sos primos Campionados Natzionales Sardos de squat e istacos in Nùgoro.

In su mese de làmpadas de su 2021 sunt nàschidas sas Natzionales Sardas de Basket masculina e feminina, e sa FINS est intrada in sa IBU (International Basketball Union). Semper in su matessi mese sa FINS at publicadu in su situ suo sos nùmenes de sa responsàbile de su progetu (Basketball Manager), Laura Fois, e de su responsàbile de sa comunicatzione, Roberto Rubiu.

• Natzionale Sarda de Bòcia

• Federatzione Isport Natzionale Sardu (FINS) - Situ ufitziale, in fins-sardigna.net.
• CONIFA, in conifa.org.