ᱠᱨᱤᱠᱮᱴ ᱠᱷᱮᱞᱚᱸᱰ ᱟᱨᱵᱟᱝ ᱮᱱᱮᱡ ᱥᱟᱶ ᱫᱚ ᱢᱟᱹᱱᱢᱤᱭᱟᱜ ᱟᱹᱰᱤ ᱜᱟᱺᱦᱤᱨ ᱥᱟᱹᱜᱟᱹᱭ ᱢᱮᱱᱟᱜᱼᱟ ᱾ ᱠᱷᱮᱞᱚᱸᱰ ᱥᱟᱶ ᱫᱚ ᱢᱟᱹᱱᱢᱤᱭᱟᱜ ᱥᱟᱹᱜᱟᱹᱭ ᱟᱹᱰᱤ ᱡᱩᱜᱽ ᱢᱟᱬᱟᱝ ᱠᱷᱚᱱ ᱜᱮ ᱢᱮᱱᱟᱜ ᱟᱹᱜᱩ ᱟᱠᱟᱜᱼᱟ ᱾ ᱚᱱᱟᱛᱮ ᱟᱹᱰᱤ ᱞᱮᱠᱟᱱ ᱦᱚᱲ ᱞᱮᱠᱟᱱ-ᱞᱮᱠᱟᱱ ᱠᱷᱮᱞᱚᱸᱰ ᱨᱮ ᱫᱟᱣ ᱠᱚ ᱦᱟᱛᱟᱣᱟ ᱾ ᱢᱮᱞᱟᱱ ᱥᱮᱨᱢᱟ ᱞᱟᱛᱟᱨ ᱢᱮᱞᱟᱱ ᱜᱚᱰᱟᱨᱮ ᱦᱚᱠᱤ, ᱪᱤᱸᱰᱩ (ᱯᱷᱩᱴᱵᱚᱞ), ᱵᱷᱚᱞᱤᱵᱚᱞ, ᱠᱨᱤᱠᱮᱴ, ᱟᱨ ᱵᱮᱰᱢᱤᱱᱴᱚᱱ ᱮᱢᱟᱱ ᱠᱚ ᱮᱱᱮᱡᱼᱟ ᱾ ᱱᱚᱶᱟ ᱠᱷᱮᱞᱚᱸᱰ ᱛᱟᱞᱟ ᱠᱷᱚᱱ ᱠᱨᱤᱠᱮᱴ ᱮᱱᱮᱡ ᱜᱮ ᱡᱚᱛᱚ ᱠᱷᱚᱱ ᱵᱟᱹᱲᱛᱤ ᱧᱩᱛᱩᱢ ᱮ ᱟᱢᱮᱴ ᱟᱠᱟᱜᱼᱟ ᱾ ᱟᱹᱛᱩ ᱠᱷᱚᱱ ᱮᱛᱚᱦᱚᱵ ᱠᱟᱛᱮ ᱵᱟᱡᱟᱨ ᱫᱷᱟᱹᱵᱤᱡ ᱡᱚᱛᱚ ᱴᱚᱴᱷᱟ ᱨᱮᱜᱮ ᱠᱨᱤᱠᱮᱴ ᱟᱡᱟᱜ ᱴᱷᱟᱶ ᱮ ᱟᱴᱮᱫ ᱟᱹᱪᱩᱨ ᱟᱠᱟᱜᱼᱟ ᱾
ᱠᱨᱤᱠᱮᱴ ᱫᱚ ᱤᱸᱜᱽᱞᱚᱸᱰ ᱨᱮᱭᱟᱜ ᱡᱟᱹᱛᱤᱭᱟᱹᱨᱤ ᱠᱷᱮᱞᱚᱸᱰ ᱾ ᱱᱤᱛᱚᱜ ᱫᱚ ᱮᱴᱟᱫ ᱫᱤᱥᱚᱢ ᱨᱤᱱ ᱠᱷᱮᱞᱚᱸᱰ ᱫᱩᱞᱟᱹᱲᱤᱭᱟᱹ ᱠᱚᱦᱚᱸ ᱱᱚᱶᱟ ᱮᱱᱮᱡ ᱥᱮᱫ ᱟᱹᱰᱤ ᱡᱩᱨ ᱠᱚ ᱴᱟᱱᱟᱣ ᱟᱠᱟᱱᱟ ᱾ ᱵᱷᱟᱨᱚᱛ, ᱯᱟᱠᱤᱥᱛᱟᱱ, ᱵᱟᱸᱜᱽᱞᱟᱫᱮᱥ, ᱥᱨᱤᱞᱚᱝᱠᱟ, ᱚᱥᱴᱨᱮᱞᱤᱭᱟ, ᱱᱭᱩᱡᱤᱞᱟᱸᱰ, ᱣᱮᱥᱴ ᱤᱱᱰᱤᱡᱽ ᱟᱨ ᱡᱤᱢᱵᱟᱣᱣᱮ ᱟᱹᱰᱤ ᱫᱤᱥᱚᱢ ᱨᱮ ᱱᱚᱶᱟ ᱨᱮᱭᱟᱜ ᱫᱩᱞᱟᱹᱲ ᱵᱟᱹᱲᱛᱤ ᱜᱮᱭᱟ ᱾ ᱢᱚᱱᱛᱨᱤ ᱠᱷᱚᱱ ᱮᱛᱚᱦᱚᱵ ᱠᱟᱛᱮ ᱢᱩᱞᱤᱭᱟᱹ ᱫᱷᱟᱹᱵᱤᱡ ᱡᱚᱛᱚ ᱞᱮᱠᱟᱱ ᱦᱚᱲ ᱜᱮ ᱱᱚᱶᱟ ᱮᱱᱮᱡ ᱟᱡ ᱥᱮᱫ ᱮ ᱢᱩᱦᱱᱤ ᱟᱠᱟᱫ ᱠᱚᱣᱟ ᱾ ᱯᱟᱹᱴᱷᱩᱣᱟᱹ ᱠᱩᱲᱤ ᱠᱚᱲᱟ ᱜᱤᱫᱽᱨᱟᱹ ᱟᱹᱰᱤ ᱨᱟᱹᱥᱠᱟᱹ ᱥᱟᱶᱛᱮ ᱱᱚᱶᱟ ᱠᱷᱮᱞᱚᱸᱰ ᱠᱚ ᱧᱮᱞᱟ ᱾ ᱫᱤᱥᱚᱢ ᱮᱴᱟᱜ ᱫᱤᱥᱚᱢ ᱨᱮ ᱥᱟᱯᱲᱟᱣᱜ ᱠᱟᱱ ᱱᱚᱶᱟ ᱠᱨᱤᱠᱮᱴ ᱠᱷᱮᱞᱚᱸᱰ ᱦᱮᱯᱨᱟᱣ ᱧᱮᱞ ᱞᱟᱹᱜᱤᱫ ᱛᱮ ᱴᱤᱠᱮᱴ ᱠᱤᱨᱤᱧ ᱛᱟᱞᱢᱟ ᱠᱚᱨᱮ ᱟᱹᱰᱤ ᱵᱟᱹᱲᱛᱤ ᱦᱚᱲ ᱵᱷᱤᱲ ᱦᱩᱭᱩᱜ ᱠᱟᱱᱟ ᱾ ᱡᱟᱦᱟᱸᱭ ᱠᱷᱮᱞᱚᱸᱰ ᱯᱩᱲᱤᱭᱟᱹ ᱥᱮᱱᱚᱜ ᱞᱟᱹᱜᱤᱫ ᱫᱟᱣ ᱵᱟᱠᱚ ᱧᱟᱢᱮᱜᱼᱟ, ᱩᱱᱠᱩ ᱫᱚ ᱠᱷᱮᱞᱚᱸᱰ ᱚᱠᱛᱚ ᱨᱮ ᱨᱚᱲᱭᱚᱢ ᱟᱨ ᱧᱮᱱᱮᱞᱚᱢ ᱥᱩᱨ ᱨᱮ ᱫᱩᱲᱩᱵ ᱠᱟᱛᱮ ᱠᱷᱮᱞᱚᱸᱰ ᱨᱮᱭᱟᱜ ᱨᱟᱹᱥᱠᱟᱹ ᱠᱚ ᱢᱟᱨᱠᱷᱚᱛ ᱮᱫ ᱛᱟᱠᱚᱣᱟ ᱾
ᱢᱤᱫ ᱟᱹᱰᱤ ᱢᱟᱨᱟᱝ ᱠᱷᱮᱞᱚᱸᱰ ᱜᱚᱰᱟᱨᱮ ᱱᱚᱶᱟ ᱠᱷᱮᱞ ᱫᱚ ᱥᱟᱯᱲᱟᱣ ᱦᱩᱭᱩᱜᱼᱟ ᱾ ᱵᱟᱨᱭᱟ ᱜᱟᱫᱮᱞ ᱨᱤᱱ ᱠᱷᱮᱞᱚᱸᱰᱤᱭᱟᱹ ᱱᱚᱶᱟ ᱜᱟᱫᱮᱞ ᱨᱮ ᱫᱟᱣ ᱠᱚ ᱦᱟᱛᱟᱣᱟ ᱾ ᱡᱚᱛᱚ ᱜᱟᱫᱮᱞ ᱨᱮᱜᱮ ᱜᱮᱢᱤᱫ ᱠᱟᱛᱮ ᱠᱷᱮᱞᱚᱸᱰᱤᱭᱟᱹ ᱠᱚ ᱠᱷᱮᱞᱚᱸᱰᱼᱟ ᱾ ᱡᱟᱦᱟᱸᱭ ᱠᱷᱮᱞᱚᱸᱰᱤᱭᱟᱹ ᱜᱮ ᱠᱷᱮᱞ ᱞᱟᱹᱜᱤᱫ ᱫᱟᱲᱮ ᱵᱟᱝ ᱠᱷᱟᱱ ᱩᱱᱤ ᱴᱷᱟᱶ ᱨᱮᱜᱚ ᱟᱨ ᱢᱤᱫ ᱦᱚᱲ ᱠᱷᱮᱞᱚᱸᱰᱤᱭᱟᱹᱭ ᱥᱮᱞᱮᱫᱚᱜᱼᱟ ᱾ ᱱᱚᱶᱟ ᱮᱱᱮᱡ ᱞᱟᱹᱜᱤᱫ ᱫᱚ ᱵᱮᱴᱹ ᱵᱚᱞ, ᱥᱴᱚᱢᱯ (stump), ᱵᱮᱞ (bails) ᱮᱢᱟᱱ ᱞᱟᱠᱛᱤᱜᱼᱟ ᱾ ᱵᱟᱨᱭᱟ ᱵᱚᱞᱤᱝ ᱠᱨᱤᱡᱽ ᱛᱟᱞᱟᱨᱮ ᱛᱟᱦᱮᱸᱱ ᱢᱚᱬᱮ ᱯᱷᱩᱴ ᱚᱥᱟᱨ ᱛᱷᱟᱱ ᱫᱚ ᱯᱤᱪ (pitch) ᱠᱚ ᱢᱮᱛᱟᱜᱼᱟ ᱾ ᱯᱤᱪ ᱨᱮᱭᱟᱜ ᱵᱟᱱᱟᱨ ᱯᱟᱦᱴᱟ ᱨᱮ ᱯᱮᱭᱟ ᱠᱟᱛᱮ ᱥᱴᱚᱢᱯ ᱠᱚ ᱵᱤᱫ ᱠᱟᱜᱼᱟ ᱾ ᱯᱮᱭᱟ ᱥᱴᱚᱢᱯ ᱨᱮᱭᱟᱜ ᱥᱮᱞᱮᱫ ᱫᱚ ᱣᱤᱠᱮᱴ (wicket) ᱠᱚ ᱢᱮᱛᱟᱜᱼᱟ ᱾ ᱯᱮᱭᱟ ᱥᱴᱚᱢᱯ ᱪᱮᱛᱟᱱ ᱨᱮ ᱵᱟᱨᱭᱟ ᱵᱮᱞ ᱵᱟᱣᱩᱱᱜᱚᱡᱽ ᱠᱚ ᱫᱚᱦᱚ ᱠᱟᱜᱼᱟ ᱾
ᱚᱱᱠᱟ ᱧᱮᱞ ᱞᱮᱠᱷᱟᱱ ᱠᱨᱤᱠᱮᱴ ᱵᱚᱞ ᱨᱮᱭᱟᱜ ᱦᱟᱢᱞ ᱫᱚ ᱕᱕.᱙ ᱜᱨᱟᱢ ᱠᱷᱚᱱ ᱠᱟᱹᱡ ᱦᱩᱭᱩᱜ ᱫᱚ ᱵᱟᱝ ᱞᱟᱹᱠᱛᱤᱜ ᱠᱟᱱᱟ ᱾ ᱨᱤᱛ ᱞᱮᱠᱟᱛᱮ ᱱᱚᱶᱟ ᱨᱮᱭᱟᱜ ᱩᱡᱩᱱ ᱫᱚ ᱑.᱖᱓ ᱜᱨᱟᱢ ᱠᱷᱚᱱ ᱵᱟᱹᱲᱛᱤ ᱦᱩᱭᱩᱜ ᱦᱚᱸ ᱵᱮᱥ ᱵᱟᱝᱟ ᱾ ᱵᱮᱵᱷᱟᱨᱚᱜ ᱠᱟᱱ ᱵᱚᱞ ᱨᱮᱭᱟᱜ ᱯᱚᱨᱤᱫᱷᱤ ᱫᱚ ᱒᱒.᱔ ᱥᱮᱱᱴᱤᱢᱤᱴᱚᱨ ᱠᱷᱚᱱ ᱒᱒.᱙ ᱥᱮᱱᱴᱤᱢᱤᱴᱚᱨ ᱵᱷᱤᱛᱨᱤ ᱨᱮ ᱛᱟᱦᱮᱸ ᱞᱟᱹᱠᱛᱤ ᱾ ᱠᱨᱤᱠᱮᱴ ᱵᱮᱴ ᱨᱮᱭᱟᱜ ᱡᱤᱞᱤᱧ ᱫᱚ ᱙᱖.᱕ ᱥᱮᱱᱴᱤᱢᱤᱴᱚᱨ ᱠᱷᱚᱱ ᱵᱟᱹᱲᱛᱤ ᱫᱚ ᱵᱟᱝ ᱦᱩᱭᱩᱜ ᱞᱟᱹᱠᱛᱤ ᱾ ᱱᱚᱶᱟ ᱨᱮᱭᱟᱜ ᱚᱥᱟᱨ ᱫᱚ ᱡᱟᱦᱟᱸ ᱴᱷᱟᱶ ᱨᱮᱜᱮ ᱑᱐.᱘ ᱥᱮᱱᱴᱤᱢᱤᱴᱚᱨ ᱠᱷᱚᱱ ᱵᱟᱹᱲᱛᱤ ᱫᱚ ᱵᱟᱹᱲᱤᱫ ᱜᱮᱭᱟ ᱾ ᱥᱴᱚᱢᱯ ᱨᱮᱭᱟᱜ ᱢᱟᱬᱟᱝ ᱯᱟᱦᱴᱟ ᱚᱛ ᱠᱷᱚᱱ ᱗᱑.᱑ ᱥᱮᱱᱴᱤᱢᱤᱴᱚᱨ ᱪᱮᱛᱟᱱ ᱨᱮ ᱛᱟᱦᱮᱸ ᱞᱟᱹᱠᱛᱤ ᱾ ᱵᱮᱵᱷᱟᱨᱚᱜ ᱠᱟᱱ ᱵᱟᱨᱭᱟ ᱵᱮᱞ ᱑᱑.᱑ ᱥᱮᱱᱴᱤᱢᱤᱴᱚᱨ ᱡᱤᱞᱤᱧ ᱦᱩᱭᱩᱜ ᱞᱟᱹᱠᱛᱤ ᱾ ᱡᱚᱛᱚ ᱣᱤᱠᱮᱴ ᱨᱮᱭᱟᱜ ᱥᱚᱢᱟᱱ ᱥᱟᱺᱜᱤᱧ ᱨᱮ ᱯᱮᱭᱟ ᱥᱴᱟᱢᱯ ᱵᱤᱫ ᱠᱚᱜᱼᱟ ᱾
ᱠᱷᱮᱞᱚᱸᱰ ᱮᱛᱚᱦᱚᱵ ᱢᱟᱬᱟᱝ ᱨᱮ ᱴᱚᱥ ᱦᱩᱭᱩᱜᱼᱟ ᱾ ᱡᱟᱦᱟᱸ ᱜᱟᱫᱮᱞ ᱨᱤᱱᱤᱡ ᱠᱟᱯᱴᱮᱱ ᱴᱚᱥ ᱮ ᱡᱤᱛᱠᱟᱹᱨᱚᱜᱼᱟ, ᱩᱱᱤ ᱜᱟᱫᱮᱞ ᱵᱮᱴᱤᱝ ᱞᱟᱹᱜᱤᱫ ᱮ ᱴᱷᱟᱹᱣᱠᱟᱹ ᱫᱟᱲᱮᱭᱟᱜᱼᱟ ᱟᱨ ᱵᱟᱝᱠᱷᱟᱱ ᱵᱳᱞᱤᱝ ᱟᱨ ᱯᱷᱤᱞᱰᱤᱝ ᱫᱟᱲᱮᱭᱟᱜ ᱟᱭ ᱾ ᱠᱟᱯᱴᱮᱱ ᱪᱮᱛᱟᱱ ᱨᱮ ᱱᱚᱶᱟ ᱫᱚ ᱞᱟᱫᱮ ᱛᱟᱦᱮᱸᱱᱟ ᱾ ᱢᱤᱫᱴᱟᱹᱝ ᱜᱟᱫᱮᱞ ᱨᱤᱱ ᱜᱮᱞ ᱦᱚᱲ ᱠᱷᱮᱞᱚᱸᱰᱤᱭᱟᱹ ᱠᱚ ᱟᱣᱴ ᱮᱱ ᱛᱟᱭᱚᱢ ᱟᱨᱵᱟᱝ ᱚᱱᱟ ᱜᱟᱫᱮᱞ ᱨᱤᱱᱤᱡ ᱠᱟᱯᱴᱮᱱ ᱤᱱᱱᱤᱝᱥ ᱛᱷᱩᱠᱟᱹᱢ ᱮᱱᱟ ᱢᱮᱱᱛᱮᱭ ᱞᱟᱹᱭ ᱥᱚᱫᱚᱨ ᱞᱮᱠᱷᱟᱱ ᱮᱴᱟᱜ ᱜᱟᱫᱮᱞ ᱮ ᱵᱮᱴᱤᱝ ᱟ ᱾ ᱢᱤᱫᱴᱟᱹᱝ ᱤᱱᱱᱤᱝᱥ ᱮᱱᱮᱡ ᱠᱮᱫ ᱛᱟᱭᱚᱢ ᱵᱮᱴᱤᱝ ᱮᱫ ᱛᱟᱦᱮᱸᱫ ᱜᱟᱫᱮᱞ ᱫᱚ ᱵᱳᱞᱤᱝ ᱟᱨ ᱯᱷᱤᱞᱰᱤᱝ ᱟᱠᱚ ᱾ ᱢᱤᱫᱴᱟᱹᱝ ᱢᱮᱪᱨᱮ ᱡᱚᱛᱚ ᱫᱚᱞ ᱜᱮ ᱦᱟᱨᱭᱟ ᱤᱱᱱᱤᱝᱥ ᱠᱚ ᱮᱱᱮᱡᱼᱟ ᱾ ᱡᱟᱦᱟᱸ ᱜᱟᱫᱮᱞ ᱨᱤᱱᱤᱡ ᱜᱮ ᱠᱟᱯᱴᱮᱱ ᱵᱟᱭ ᱛᱟᱦᱮᱸᱱ ᱵᱮᱲᱟᱨᱮ ᱡᱚᱜᱚ-ᱠᱟᱯᱴᱮᱱ ᱟᱜ ᱛᱟᱹᱨᱤ ᱨᱮ ᱠᱷᱮᱞᱚᱸᱰ ᱦᱩᱭᱩᱜᱼᱟ ᱾
This article uses material from the Wikipedia ᱥᱟᱱᱛᱟᱲᱤ article ᱠᱨᱤᱠᱮᱴ, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Content is available under CC BY-SA 4.0 unless otherwise noted. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ᱥᱟᱱᱛᱟᱲᱤ (DUHOCTRUNGQUOC.VN) is an independent company and has no affiliation with Wiki Foundation.