Клавдий Птолемей

Найвеце познатый як автор геоцентричного моделу свѣту. Математичный модел свѣту од Птолемея мав глубокый вплыв на середновѣку астрономию, быв он геоцентричный и постуловав, же явно неправилны траектории Сонця, Мѣсяця и планет насправдѣ были комбинациев даколькых регуларных круговых рухох, позорованых в перспективѣ з нерухомой Землѣ. Птолемей выхосновав роботы попередных астрономох, котры до нас не дошли, хоть и не одкликовав ся на них. Тото засвѣдчив Тихо Браге, котрый указав на конкретны припады резултатох, якых автором не годен быв быти Птолемей.

Хоть модел Птолемея быв фалошный, его софистичны математичны формулы и таблицѣ дозволяли наступным астрономам при вецейразовых коректурах хосновати тот модел такой через повдруга тысячроча, аж докля Й. Кеплер на объявив законы руху планет.

Астрология
Птолемей не поважовав астрологию за псевдонауку, е автором четыритомного астрологичного трактата Тетрабиблос.
География
Географичны трактаты Птолемея (8 книг), де занимать ся переважно картографиев, захранили свою вартость до XVII. стороча (42 выданя за рокы 1475–1600).
Математика
В истории математикы заняв Птолемей честне мѣсто. Став ся автором первых таблиць тригонометричных функций и новатором в сферичной тригонометрии.
Механика
Византска енциклопедия X. стороча Суда подавать, же Птолемей мав написаны тыж три книгы о механицѣ, але о тых до нашого часу нич инше не дошло.
Музика
В трактатѣ Гармоника (3 книгы) подав теорию звуковысотной системы (гармонии) в музицѣ своей добы.
Оптика
В оптицѣ (5 книг) Птолемей подавать законы ламаня и одбиваня свѣтла, властности зеркал, яко первый описуе атмосферну рефракцию. Розберать розличны зроковы кламы, зокрема пояснять видяче ся звекшѣня небесных свѣтил при горизонтѣ.

• Prof. Jones, Alexander Raymond (20 Jan. 2021). Ptolemy, Egyptian astronomer, mathematician, and geographer. Encyclopedia Britannica. https://www.britannica.com/biography/Ptolemy. [перевірено 2021-02-12]. англ.
• Suda: Ptolemaios. Suda On Line: Byzantine Lexicography. https://www.cs.uky.edu/~raphael/sol/sol-entries/pi/3033. [перевірено 2021-02-13]. англ.
• Городецкий М. Л., Лебедев С. Н. ПТОЛЕМЕЙ //Большая российская энциклопедия. Том 27. Москва, 2015, стр. 725–726 Верзия: 2018. Одчитане: 12.02.2021[1]