बस्फरस जलसन्धि
बस्फरस जलसन्धि युरोप व एसियाया दथुइ दयाच्वंगु छगू जलसन्धि ख। बस्फरस, मार्मारा सागर व दार्दानेल्स जलसन्धिं तर्किश जलसन्धि दयेकि। थ्व जलसन्धि एसिया व युरोपया सीमाना ख। अन्तराष्ट्रिय नाविक ज्याया निंतिं छ्येलिगु दकलय् चिब्याःगु थ्व जलसन्धिं कृष्ण सागरयात मार्मारा समुद्रनाप स्वाइ, मार्मारा सागरयात दार्दानेल्सं एजियन सागर व भूमध्यसागर नाप स्वाइ।
बस्फरस जनसन्धिया सीमा उत्तरय् रुमेली फेनेरी (Rumeli Feneri) व एनादोलु फेनेरी (Anadolu Feneri)या जःछेँ व दक्षिणय् कदिकोइ इन्सिबुर्नु फेनेरी (Kadıköy İnciburnu Feneri)या जःछें नं निर्धारित याइ। थ्व परिधिया दुने थ्व जलसन्धिया हाकः ३१ किमि व ब्याः उत्तरय् ३३२९ मि व दक्षिणय् २८२६मि दु। थ्व जलसन्धिया द्कलय् चकंथासय् थुकिया ब्याः ३४२०मि दु धाःसा दकलय् चिब्याःगु थासय् थुकिया ब्या ७०० मि दु। दकलय् चिब्याःगु थासय् लःखः संकेत थाकु छाय् धाःसा थन लःखःयात ४५ दिग्रि चाहिके माः नापं थ्व थासय् बाहा ७-८नट थ्यनेफु। दक्षिणय् येनिकोइ (Yeniköy) धाःगु थासय् ८० दिग्रि तक्क लःखः चाहिके मा।
बस्फरस जनसन्धि १३ निसें ११० मितर तक्कया गालय् ला। औसतय् थ्व जलसन्धि ६५मितर गालय् दयाच्वंगु दु। थ्व जलसन्धिया दकलय् गाःवंगु थाय् कन्दिलि (Kandilli) व बेबेक (Bebek) धाःगु थाय्या दथुइ करिब ११० मितर गाः वंगु थाय् ख। थ्व जनसन्धिया दकलय् म्हो गाः वंगु थाय् कादिकोय् इन्सिबुर्नु (Kadıköy İnciburnu) नापंया उत्तरी थासय् करिब १८ मितरया व दक्षिणपाखे एसियान पोइन्त (Aşiyan Point)य् करिब १३ मितरया थाय् ख। गोल्देन हर्न (Golden Horn) खुसिमुहान मू जलसन्धिं उत्पति जुइ। थुकिलिं दयेकातःगु खुसिचां पुलां इस्तान्बुलयात सामरिक दृष्टिं रक्षा याइ।
थ्व जलसन्धिया सिथय् दूगु बंय् यक जनघनत्त्व दु। थ्व जलसन्धिया निखें हे इस्तानबुल नगर दयाच्वंगु दु। थ्व नगरया जनसंख्या करिब १कोटि २०लखः दु। कृष्ण सागर व मार्मारा सागरया दथुइ घनत्त्वया आधारय् लः बाहावनिगु खं न्हापा निसें हे स्युगु खं ख। बस्फरस जुसें थथे बाहावनिगु लःया धाः स्वया तःधंगु हलिमय् ५ता जक्क खुसि दु।
स्वयादिसँ
This article uses material from the Wikipedia नेपाल भाषा article बस्फरस जलसन्धि, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Content is available under CC BY-SA 4.0 unless otherwise noted. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki नेपाल भाषा (DUHOCTRUNGQUOC.VN) is an independent company and has no affiliation with Wiki Foundation.