Middeleuropa oder Zentraleuropa is en Region in Europa.
Se liggt twuschen West-, Oost-, Süüdoost-, Süüd- un Noordeuropa. Vun de Geographie her gifft dat keen eendüdige Kriterien, um dat aftogrenzen.
Wenn een vun de Geographie her kieken deit, könnt to'n Afgrenzen dat Klima un de Natur rantagen weern. U.a. weer dat mööglich, to kieken, wat for Planten dor wasst un wie dat mit de Tektonik utsütt. Groffweg kann seggt weern,datt in'n Westen un Noordwesten de Rhienstroom de Grenz is, in'n Norden de Noordsee un de Eider (oder de Skagerrak/Kattegat). Denn slutt sik de Oostsee as Schede an. In'n Osten könnt Wiessel un Oostkarpaten de Grenz ween, na Süüdosten to de Unnerloop vun den Donaustroom un de öösterriekschen Alpen. Man ganz kloor aftogrenzen is Middeleuropa vun de Geographie her nich.
In Düütschland warrt dor wiethen nich an twiefelt, datt de gröttste Deel vun Düütschland to Middeleuropa tohören deit, man ok Öösterriek, de Swiez, Luxemborg, Liechtensteen, Polen, Tschechien, de Slowakei un Ungarn. Bi meist all Länner, de an düsse Staten angrenzen doot, gifft dat Speelruum. Je nadem weert se mol to Middeleuropa totellt, mol to annere Regionen vun den Kontinent. Vundeswegen warrt ok Slowenien faken as en Deel vun Middeleuropa ankeken, hen un wenn ok Kroatien, de Balt’schen Staten, Rumänien, Belgien un de Nedderlannen.
Faken sünd de Gemarken an'n Rand nich eendüdig in'e Reege to bringen un weert na „Geföhl“ oder (polietsche) Ansicht un Meenung insorteert.
To de middeleuropääsche Tiedzone (MET) höört düsse Länner in Europa to:
Albanien, Andorra, Belgien, Bosnien un Herzegowina, Dänemark, Düütschland, Frankriek, Italien, Kosovo, Kroatien, Liechtensteen, Luxemborg, Malta, Monaco, Montenegro, Nedderlannen, Noordmakedonien, Norwegen, Öösterriek, Polen, San Marino, Swiez, Sweden, Serbien, Slowakei, Slowenien, Spanien (ohne Kanaar’sche Inseln), Tschechien, Ungarn un Vatikanstadt.
De Tied geiht na de Oortsttied vun den 15. Meridian, de um un bi an de Grenz twuschen Polen un Düütschland langsloppt. Vunwegen, datt de Eer in 24 Tiedzonen updeelt is, möss de Westgrenz vun de MET normolerwiese an de Grenz twuschen Düütschland un de Nedderlannen langslopen. Man ok Frankriek, wat veel wieter na Westen to liggt, un sogor Spanien höört to düsse Tiedzone mit to. Vundeswegen verscheelt sik in de ganze, grote Tiedzone bannig, wo de Sunne to Middag steiht.
This article uses material from the Wikipedia Plattdüütsch article Middeleuropa, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Der Inhalt ist verfügbar unter CC BY-SA 4.0, sofern nicht anders angegeben. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Plattdüütsch (DUHOCTRUNGQUOC.VN) is an independent company and has no affiliation with Wiki Foundation.