Kigali

Kigali is de Hööftstadt un mit 965.398 Inwahners (Stand 2009) togliek ok de gröttste Stadt vun Ruanda. Se liggt in de Mitt vun’t Land, an’n Kagera-Nil. De Stadt liggt ’n beten süüdlich vun’n Äquater op en Hööch twüschen 1.433 m un 1.645 m. Dat Klima is dat hele Johr över teemlich mild vun wegen de Hööch.

 

 

De Stadt is in en bultige Landschop boet worrn un breedt sik dorüm twüschen veer Bargrüchen un de Dalen dortwüschen ut. De Stadtmitt liggt op een vun disse Bargrüchen un bargt den gröttsten Deel vun de staatlichen Inrichten. De Bargen hebbt en dörsnittliche Hööch vun 1.600 m, wiel de Dalen ruchweg 300 Meter deper leegt. De grötteren Hüüs un Ämter sünd tomeist an de högeren Steden to finnen. De armeren Lüüd leevt tomeist in de Dalen. Ümgeben is de Stadt to’n gröttsten Deel vun hoge Bulten oder Bargen. De hööchste dorvun is de Kigali mit en Hööch vun 1.850 m över NN, de an’n westlichen Stadtrand liggt un de Stadt ehrn Naam geven hett.

Kigali is in dat Johr 1970 grünnt worrn, neemlich vun den dormiligen düütschen Residenten Richard Kandt, de en Steed twüschen dat Daal vun’n Nyabarongo un de Bargen Jali un Kigali utsöcht harr. Bit 1916 weer Kigali en Deel vun Düütsch-Oostafrika. 1922 weer dat Rebeet as Ruanda-Urundi ünner belgsch Völkerbundmandat stellt.

In der Johr 1962, na de Delen in de unafhangigen Staaten Ruanda un Burundi is Kigali Hööftstadt vun Ruanda worrn.

De Völkermoord, de 1994 in Ruanda an de Tutsi veröövt weer, güng dormols in Kigali los. In de Stadt sünd dorbi 100.000 Inwahners ümkamen, wiel in dat hele Land Ruanda in den 100 Daag anduern Völkermoord ruuchweg een Million Minschen ümbröcht worrn sünd.

De wichtigsten Hannelsgöder för Kigali sünd Koffie, Veeh un Ierz vun Tinn, dat in de Neeg afboet warrt. De Hannel mit disse Saken billt de Grundlaag vun de Weertschop tosamen mit de Textil- un de cheemsche Industrie as ok de Industrie, de dat Tinn verabreiten deit. Bedrieven leegt ründ üm’t Stadtrebeet vun Kigali.

An’n ööstlichen Rand vun de Stadt liggt de Kigali International Airport, vun den över Nairobi un Addis Abeba jeden Dag Flaagverbinnen na Europa un wichtige afrikaansch Länner bestaht. Kigali liggt an en Feernverkehrsstraat, de de Stadt mit Burundi in’n Süüden un mit Uganda in’n Noorden verbinnt. De Straten sünd nomalerwies in en go’en Tostand.

In Kigali gifft dat en belgische School, an de in Franzöösch ünnerricht warrt, un en engelschsprakige School. Bito is de Stadt Sitt vun en technische Hoochschool.

  Kigali. Mehr Biller, Videos oder Audiodateien to’t Thema gifft dat bi Wiki Commons.

• Kigali bi Rwanda Tourism (engelsch)
• Philipp Lichterbeck: "Der Aufbruch von Kigali" - Tagesspiegel vun’n 4. Oktober 2009